Monday, April 30, 2007

يا خساااااااااااااااااااااااااااااااااااااره

دخلت المدونه النهارده ..... سمعت حاجه غريبه أوي أوي أوي ..هتقولي أغنية عمرو مصطفي "لمستك"..طيب ودي فيها إيه ؟؟........ إنتي شكلك كده ... ولا بلاش.. لا تزعلي مني... يا عم خليك معايا... ركز معايا ... أنا مش مجنونه علي فكره.... هقولك سمعت إيه وإنت تحكم.... سمعت ... سمعت... سمعــــــــــــــــــــــــــــــــــت ...خير اللهم اجعله خير... صوت زغاريت... من نوع لووووولوووووووولوووووووووووي.... أه ... صدقني... ليه مش عايز تصدقني ... شكلك كده هتقول المدونه دي مسكونه عفاريت..و صاحبتها ترللي ولاسعه.... وناوي ما تدخلش المدونه دي تاني.... يا إبني ما تتسرعش إسمع للآخر.... مش إحنا متفقين إنك هتديني ودنك.... صدقني مش هقول توووووووووووووووووووووت.... وأخرمهالك علي الفاضي.... هقول توووووووووووووووت ... بس براحه ... ما علينا خلينا في الزغاريت اللي ملأت المدونه ..... إيه بدأت تسمعها.... شكلك كده بدأت تسمعها.... طيب يا بنت أو يا ولد ياللي في المدونه اللي جانبي سامعين..... شكلكوا كده سمعتوا.... صوتها عالي أوي... أوي ... أوي.... صاحبتكوا اللي هي أنا إتخضت.... وقلت يمكن بوست شم النسيم بزغاريته أثر علي عقل المدونه و إترجمت الزغاريت المكتوبه إلي زغاريت مسموعه..... و أنا هغلب نفسي ليه ..... أنا هسأل المدونه بتزغرتي ليه يا مدونتي العزيزه .... إوعي تقول البت رحاب إتهبلت .... أنا مش قايله قبل كده إني بحب المدونه.... أيوه يا سيدي بكلمها وبترد عليا..... شكلك كده هتقول المجنونه أهي..... الله يسامحك لو كنت قلتها ... ويسامحك برده لو عقلك بيقولك قولها..... نرجع لمرجوعنا .... كنت بقول إيه.... توهتني يا شيخ .... أأأأأأأأأأأأه... كنت هقولك أنا قلت إيه للمدونه وأنا بسألها عن الزغاريت

أنا : إنتي إتهبلتي يا مدونتي... يا حبيبتي ... إهئ إهئ إهئ... ولا تكونيش فرحانه علشان طلعت أينشتين... ولا تكونيش متوقعه إني هتجوز قريب مثلا .... فقلتي تفرحي من قبلها

المدونه: ههههههههههههههههه....و هي دي حاجه تفرحني يا بنتي

أنا : إخص عليكي.... بقي ما تفرحليش أنا.... أمال مين اللي فرحانه له أوي كده وهاتك يا زغاريت.. في حد مهم عندك أهم مني

المدونه الندله الزباله : طبعا يا رحاب... في .... إنتي مش عايشه في الدنيا .... ما عرفتيش إن جمال كتب كتابه علي ديجه يوم السبت اللي فات والفرح يوم 4 مايو... و طبعا دول مش فرح واحد .... دول إتنين.... لأنه نفس يوم عيد ميلاد الريس التسعه وسبعين .... طويل العمر يطول عمره يزهزه عصره ....هاهي

أنا: حتي إنتي يا مدونتي إتعلمتي النفاق وهتهيصي في الهيصه... إنتي مش مضايقه من اللي بيحصل في الناس... اللي بيتجوز ده ولي العهد .... فرحانه أوي كده ليه.... ربنا يتم له بخير... بس يحل عننا

المدونه المنافقه: بصي يا أختي ..إنتي مش عايشه في الدنيا...ما هو علشان هو ولي العهد و علشان هو عمره ما هيحل عننا لازم أعمل كده...ده نظيف بعت برقيه للريس النهارده يهنيه بعيد ميلاده وبيتمني له عمر مديد وهو بيحمي مصالح محدودي الدخل... وأنا أنضف منه وبدأت الزغاريت من بدري ... أه ... مفيش حد أحسن من حد

أنا بإنكسار شديد : يا خساره ... حتي إنتي كمان

المدونه اللي واضح إنها بقت واقعيه : كده كده مش طايلين حاجه .... يمكن لو هيصت أطول حاجه

أنا بسخريه: وإنتي هطولي إيه يا مدونه يا حقيره

المدونه الزباله: أصلي إنتي فقر.... وأنا عايزه أبقي مشهوره ومهمه.... لازم أهلل... علشان أوصل... وأبقي في مواقع الصف الأول... يمكن أعجبهم ويعملوني موقع لأمانة السياسات... وأترقي مع جيمي وأبقي موقع لرئاسة مملكة مبارك العربيه... بصي أنا عندي طموح سياسي... و إنتي معطلاني بشعاراتك الفارغه

أنا: يا خساره... أنا كنت عملاكي علشان تبقي صوتي.... وفي الآخر تقلبي عليا

هي : هاتي ودنك ................. توووووووووووووووووووووووووووووووووووت

لو مش مصدق إن ده حصل..... هات ودنك... ما تجيب .......... تووووووووووووووووووووووووووووووووووت

79 comments:

smraa alnil said...

ههههههههههههههههههه
ههههههههههههههههه

انا لو منك اخاصمها

كدومنك طلعت واطية اوي بس عارفة هي واقعية
عندها حق
اصلها لو مش اتحزمت ورقصت
هتخسر كتير
اذا كن الشعب المتحضر كله هيطلع في التلفزيون والرفحة مش سايعاهم عشان جيمي وديجا هيتجوزوا
مستخسرة علي مدونتك انها تفرح
بقولك ايه انا هروح اشوف مدونتي وزعت الشربات ولا لسة

واحد من الناس::طارق:: said...

خيااااااااانة
تبقى عايشة مع المدونة وانتى اللى مربياها وفجأة تلاقيها باعت القضية ويأست من اللى بيحصل وقررت تبقى حزب وطنى ..اكيد المدونة بتاعتك كانت بتتفرج على القناة الاولى وبتقرا جرايد الحكومة ..
يا اخونا ... كل واحد يخلى باله من مدونته يشوفها بتقرا ايه وبتتفرج على ايه وبيتكلم مين ... محدش ضامن حاجة اديكو شوفتوا اللى حصل مع رحاب
استر علينا وعلى ولايانا وعلى مدوناتنا يا رب

SomeOne said...

اه ياودني

بس والله فيها الخير انها كانت صريحة معاكي

ما تسمعي كلامها يمكن هو ده اللي ينفع في الزمن ده
:)

الربان said...

تحياتي

اولا ربنا يفرح الجميع...و ان شاء الله تعم الافراح مصر كلها... ربنا يفرح الجميع..

ثانيا.. بلاش نسبق الاحداث بالنسبة لولاية العهد... هو نفي...فلننتظر ما ستأتي به الايام...

ثالثا: أحييك علي اسلوبك الساخر غير الرتيب و لا الممل.

رابع : ارجو ان الاختلاف في الراي لا يفسد للود قضية...
خامسا: انا احترم رايك رغم اختلافي معك
فيما جاء فيه.

تحياتي

reri said...

samraa alnil

شفتي ... حتي المدونه خاينه وما لهاش أمان وزباله ... أنا لسه شاربه الشربات عندك... هههههههههههه...إلحقيها قبل ما تديها عشره بلدي ..ههههههههه

سلامااااااااات يا أنوج

reri said...

واحد من الناس طارق

تصور يا طارق لقيتها بتتفرج علي عمرو عبد السميع وبتقرا لعبدالله كمال في روزا اليوسف... وأسامه سرايا في الأهرام.... هههههههههههه... خاينه وزباله... خلي بالك من مدونتك لا تقلب هي كمان... فتح عنيك علي الآآآآآآآآآخر

سلاماااااااااااااات

reri said...

شادي فادي

علي فكره أنا في شئ لله... كنت لسه بقول عايزه أدخل مدونة شادي فادي... لقيت سيادتك هنا... أهلا بيك في أول زياره... وآسفه لو ودنك وجعتك في أول زياره.... هههههههههه... و المدونه الزباله دي أنا هربيها و مش هسمع كلامها

سلاماااااااااات

reri said...

الربان

أهلا بيك.... والأيام بننا ... طبعا الإختلاف في الرأي لا يفسد للود قضيه... بس الشواهد كلها هي اللي مخلياني أميل للرأي ده... ولك مطلق الحريه في أن تميل لرأي آخر
منور
وسلاماااااااااااات

micheal said...

هههههههههه....حرام عليكي يا بنتي ..ده أنتي أطلتي ودني أنتي و مدونتك...هههههههههه
بس تعرفي و الله الحوار لذيذ و شيق..يعني بصراحه كده مزهقتش منه خالص
و ألف ألف مبروك لجيمي و يجعله عزبه بابي عمار عليه و علي أولياء العهد
تحياتي لكي

سندباد said...

جميل اوي الحوار ده وجميل اوي الصراحة اللي بينك وبين مدونتك بس اعتقد ان هايكون في عتاب جامد اوي بينكم بس مش قدام الناس صح ولا انا فاهم غلط

King A.S.R said...

سيبك منه يا مدونة :d
بوست جميلة

(( هرتلة ليلية ))
www.nightlyhartalh.blogspot.com

بسمه عبدالباسط said...

هههههههههههههههه
يا خرابى بقى بعد ما تعمليها وتكبريها تقلب عليكى الواحد بقى خايف والله على نفسه
بس بوست هايل
تحياتى

Anonymous said...

3'ayari el sa3a ya reri

shermen said...

هاتي ودنك انتي
توووووووووووووووووووووووت
شوفتي ذي ما عملتيها فيا
مدونتك بتغرد
آدي آخرة تربيتنا فيهم
نكبرهم ونعلهم
وفي الآخر يبهدلونا
حسبي الله ونعم الوكيل
طلعت أنضف من نظيف
خير إن شاء الله
خير
خير
خير

الدبور said...

مش فاهم اي حاجه
خالص
؟ممكن تفهميني الموضوع ماشي فين
واتوبيس كام بيروح فين ؟
اصل انا تايه في البوست

Ummah said...

loooool

asl amsalek men el 7akeden homa elly mebawazen el balad :D

MaMaDo said...

يااااااا
بقى بعد الى عملتي معاها تعمل فيكى كده فعلا دى الخيانه العظمه
انا لو منك اغيرها عشان اعرفها ان فى زيهاا كتييير
هههههههههههههه

تحياتى ليكى

حبيبة الرحمن said...

مدونه لذيذه بس ودنى وجعتنى من تووووووووت دى :)

اوعى تخاصمى مدونتك علشان تفضلى تكتبى حاجات حلوه

واذا كان على النفاق ياخبر ابيض بكرهه كره العمى والمشكله انه متوافر جدا وفى كل حته على رايك ده لو كمان الاشياء زى المدونه والقلم و..
بقت منافقه ده انا انتحر

حبيبة الرحمن said...

صحيح مدونه عضت الايد اللى كتبت فيها :)

إبـراهيم ... said...

لأ إنتي كده ... برااافو عليكي خاااالـــص ....، يعني شويتين كمان وتاخدي دكتوراة تانية خاااالص !!! .. ف حاجات تانية خاااالــــــــــص ...
.
.
.
أمـا أنا فما زلت أصحح غلطتي اللي الناس فهمتني فيها غلط ، أيوة عندي ف المدونة
... تحياااااااتي

The Alien said...

مدونتك لاهي خاينة ولا قلبت عليكي
مدونتك طلعت فاهمة
بتدور علي مصلحتها
والمفروض تفرحيلها
عشان لو هي مزغرتتش
فيه غيرها هيزغرد
يبقي هي أولي

تحياتي

Shreif fahmy said...

ميرسي جدا لتشريفك مدونتي المتواضعة وتعليقك على المدونة
منتظر تعقيبك على بوست تاني
http://sfahmy78.blogspot.com/2006/01/art-1958.html

مصر هى أمى said...

حتى انت يا نيرون

الخيانة جاتلك يا رحاب من اقرب الناس ليكى

بس انتى عارفة كده مدونتك منش هتتحاسب ولا هتتهم بالجاسوسية وانها انضمت للجماعة المحظورة

وساعتها ممكن المدونة تستسمح البهوات ليكى وميخوكيش على امن الدولة بتهمة انك مباركتيش للبهوات

Aardvark EF-111B said...

قولي لمدونتك, بما إن صاحبتها أينشتين, وليها شعبيه, و عايزه توصل

Join
http://payperpost.com/

يجعله عامر

Ahmed taher said...

لا انا كده هسحب منك شارة العبقرية وتاج عمنا اينشتين رحمه الله ...
انت ازاي تعترضي على جواز الراجل وعايزاه يحل عننا كمان واضح انك ابتديتي تخرفي بجد ....
تحياتي ليكي يا مدونتها انت طلعتي اعقل منها
ويجعلا عامر بحسك وصوتك دايما ...
هههههههههههه
تحياتي يا جميل

david santos said...

Thanks for you work and have a good day

My next work goes to be made in Arab. The heading is: Egipto, the mother of the World.

اسكندراني في الغربة said...

معلش يا مدونة حظك وحش وقعك في واحدة ليسا عايشة على الشعارات الي مش جيبة همها
نصيحة ادام انتي مدونة بتفهمي غيري الباسوورد بتاعك وخلي صحبتنا تقول توووووووووووووووت بجد

•«ρяoιd»•™ said...

ههههههههههههههههه

ايه النداله دي

مدونات اخر زمن

كل اللي عنده مدونه يلمها بقي عشام ميحصلوش اللي حصل ده

كعادتك بجد روحك عاليه قوي

ربنا يخليكي يا رب

انتي من المدونات اللي بدخلها ببتسم و بضحك بجد

في وسط عالم من المدونات النكد

و انا اولهم يعني

هع هع هع

تحياتي

حصان بري said...

شكلك كده هتقول المدونه دي مسكونه عفاريت..و صاحبتها ترللي ولاسعه
:) ده رايي من اول مادخلت عندك اصلا يا رحاب

طبعا بما ان مدونتك طلعت عميله
فيشرفني ادخل اعلق عندها في يوم عيد ميلاد الريس (طويل العمر يطول عمره ويزهزه عصره وينصره علي مين يعاديه هاي هيء)صاحب ازهي الانجازات اللي معيشنا في ازهي عصور الديموقراطيه
وجواز المحروس ولي العهد اللي هيبقي عصره اكيد ازهزه واكثر دمقرطه
وياريت تكلملنا حد من المسؤلين يعمل مدونتي ريسيكل بن لابن علاء الصغنن

ابقي تعالي عندي في المدونه اكلمك علي راحتي (الواحد يدخلك شايل صوره الريس بعد كده)

:)بالمناسبه طلعت جون كنيدي
والفيلم raiders of the lost ark
اهو اقله فيلم معروف
كان نفسي في اينشتين عااااااااااااااا

reri said...

micheal

ياللا برد عليك من ورا المدونه الخاينه أصلها راحت الفرح دلوقت... شفت الخيانه... قلت أرد براحتي ... أصلها هتوصل أخباري للبالي بالك ....هههههههههههههه... ملت شرم الشيخ زغاريت... سامعها طبعا... ههههههههههه
سلاماااااااااات يا باشا

reri said...

sendbad

أعاتبها... إسكت يا عم أصلها بقت واصله وأنا خايفه منها... بقولك راحت الفرح ... ههههههههههه

سلامااااااااااااات

reri said...

king asr

أهلا بالكينج وبهرتلته الليليه ... شكرا علي المروووووووووووور
سلامااااااااااات

reri said...

bos bos

أهلا يا بسبس منوره... شفتي الندله... ولا أقولك بلاش ... أصلي بخاف منها ... خلاص دي بقت جامده أوي... هاتي ودنك ... دي راحت الفرح في شرم الشيخ ... ههههههههههههه

سلاماااااااااااات

واحـــد مـــــن الـنـــاس said...

اللهم صلي عالنبي

لا حول ولا قوة الا بالله

اللبن المغشوش عمل تأثيره اهوا بين الشباب

انا قلتلكم من الاول يا جماعة مصدقتونيش

امبارح واحد ماشي يشد في شعره في الشارع ويقول البخ البخ عو عو

ودلوقتي الاخت رحاب عمالة تكلم في مدونتها

وبكرة هنلاقي واحد ماسك الكومنتز بتاعته
وعمال يقول

انا مش قصير قزعة ..انا طوييل واهبل


صباحو قشطة

reri said...

anonymous

غيرتها ... والله شكرا ليك... لو ما قلتش ولا كنت هاخد بالي.. مين بقي اللي فكرني ؟؟

reri said...

shermen

هاتي ودنك ... المدونه راحت الفرح... خدي بالك كل كلامك وصل لفوق ... خلاص عدت... وصلت وبقت جامده...هههههههههههه... بقت نضيفه بشكل
... منوره في أول زياره ياريت تتكرر
سلاماااااااااااات

reri said...

الدبور

هههههههههههههههه... ليه كده؟؟؟... ده حتي الأتوبيس ما إتأخرش... وحتي لو إتأخر إستني اللي بعده..إنت باين عليك كده مستعجل.. خد تاكسي ... لو فاهمه أكيد هفهمك... ههههههههههههه... إيه يا دبور... بطل زن علشان ودني لإتخرمت من زغاريت المدونه وزن سيادتك..ههههههههههههه

سلامااااااااااات يا أسامه

reri said...

omas

يا لهوي ... انا من الحاقدين ... طيب لووووووووووووووووووووووووووووووووووووولللللللللللللللللللللللللي
شفت... أنا زغرت أكتر منك كمان ...ههههههههههههه
ده مصر اليوم في عيد
ههههههههههههه

سلاااااااااااااااام

reri said...

mamado

إنت كده رحت في داهيه .هههههههه.. محدش يتكلم عليها كده... بقولك واصله ... وراحت الفرح .. وزمانها متحزمه وهاتك يا رقص هناك ... يجعل كلامنا خفيف عليه
أهلا بيك في أول زياره.. ما تقطعش الجوابات ولا الزيارات

سلاماااااااااااات

reri said...

kitty

ههههههههههههه... حلوه حكاية مدونه عضت الإيد اللي كتبت فيها دي... كلبه بقي... ولا أقولك بلاش أغلط فيها ... أصلها بقت علي صله بالناس اللي فوق
يا ريت أشوفك تاني يا بت يا كيتي ومعلش لو كانت ودنك وجعتك في أول زياره .. بس برده هاتي ودنك ... وما يهمكيش .. ههههههههههه

سلاماااااااااات

reri said...

إبراهيم معايا

ميرسي خاااالص... إنت يا إبراهيم معايا خاااااااالص... و كده يبقي حقي خااااااااالص ... هههههههههههه... خااااالص.. إنت علقت خاااااااالص

سلامااااااااات خاااااااالص

reri said...

the alien

وأنا شكلي هطلع أشطر منها وأديها زغاريد جامده... من فرحتي ليها.. منورني

سلاماااااااااااات

reri said...

shreif fahmy

أهلا بيك يا شريف ..والعفو يا سيدي...وإن شاء الله هعلق عالبوست التاني
سلامي ليك

reri said...

ahmed taher

حتي أنت يا فرويد... المدونه خلاص خارج السيطره ... راحت الفرح.. وأنا إنتهزتها فرصه وهاتك يا شتيمه فيها ... هعمل إيه ... خلاص عدت وبقت واصله... ههههههههه
سلاماااااااات يا أحمد

reri said...

david santos

مصر هي أمك ..طيب ليه يعني ؟؟..هتعمل بوست بالعربي عنها .... علي رأي مايكل ... حد يشوف الراجل ده عايز إيه ؟؟؟

reri said...

مصر هي أمي

هههههههههههههه... لو عايز واسطه قول وما تتكسفش... المدونه وصلت عالآخر... وراحت الفرح دلوقت... ههههههههههه... ناس بتفهم ... خلينا إحنا نشتم و خلاص

سلاماااااااااااااات

reri said...

aardvark ef111b

هقولها حاضر ,, ربنا يسهل
سلامي ليك

reri said...

اسكندراني في الغربه

ههههههههه... إنت بتحرضها عليا... هي ناقصه .. منور .. وياريت تكررها
سلامااااااااات

reri said...

proid

ما تغلطش فيها... إنت مش سامعني وأنا عماله أحذر المدونين.... هقولك تاني... هات ودنك .. المدونه واصله... تصدق راحت الفرح النهارده.. وزمانها قايمه بالواجب زغاريت ورقص... هههههههههه.. ربنا يخليك يا رامي .. وشكرا ليك

سلاماااااااااااات

reri said...

حصان بري

هههههههههههههههههه
هههههههههههههههههههههههه
جامده جدا حكاية الريسيكل بن لإبن علاء الصغنن... هقولها تكلمهم ... هي دلوقتي في الفرح بتقوم بالواجب... لما تيجي هقولها علي الموضوع... هههههههههههه

ميرسي علي رأيك في المدونه ... هههههههه... وصاحبتها ... فهمتني علي طول ... ههههههههه

و بعدين ماله كنيدي... عينك في أينشتين ... هبقي أسلفهولك لفه ..هههههه.. كفايه عياط .. ههههههههههه

منور يا باشا
سلامااااااااااااات

reri said...

واحد من الناس

أهلا يا علي ... أخبار الإمتحانات إيه يا باشا ؟؟.. إوعي تشرب لبن اليومين دول خالص ... لتهيس في الإمتحانات تبقي مصيبه... شفت اللي جرالي يا علي ... عاااااااااااااااااا... أنا مش قصيره أزعه أنا طويله و هبله
هههههههههههههههههههههههه

سلاماااااااااااااات

Anonymous said...

بقى المدونه الى طلعت للنور على ايديكى تعمل كده
حاجه عجيبه
بس صحيح انتى ايه الى مزعلك .. الراجل عايز يكمل نص دينه فيها حاجه دى..اما امرك غريب يا شيخه
وبعدين انا شايفه انك تسمعى كلام ستك وتاج راسك المدونه عشان تاكلو عيش........ولا عيش ليه هما مش هيوزعو جاتوه ولا ايه
:))))
ياكلو بيتى فور .. ياكلو جاتوه .. ياكلو كل الى يحبوه
ولا ايييييييييييييييييه

صاحب البوابــة said...

تحياتي لأسلوبك العذب

لكني حزين على مدونتك التي خانتك لكي تصل

كما يخون كل الناس اليوم انفسهم

لكي يصلوا

تحياتي لقلمك المبدع

متغيرة شوية said...

ههههههههههههههههه
أما مدونة منافقة صحيح
تعرفيانا لو منك اهريها بقى بوستات ضد العيلة الملكة واخلي مسئوليتي...فهي الللي تروح اللومان لوحدها

Layla said...

ههههههههه

خيااانة....لا يسلم الشرف الرفيع من الاذى حتى يراق على جوانبه الدم

اقفلوا الخائن

safa7_karmooz said...

صباحوو لسعان

كان نفسى مدونتى تبقى زيك

بس انا قاطع لسانها

ههههههههههههههههههههه

-_- said...

بصى يا رحاب .. هي قنبلة صغيرة و فجرى المدونة بالبلوجسبوت و ريحي دماغك

احنا ناقصين ياختى

!!!

Anonymous said...

السلام عليكم

الموت للخائن


بس حاسبي احسن تروح تفتن عليكى



مودونتك جميلة
:)

reri said...

shayma

جاتوه وبتي فور وكله اللي يحبوه يا شيمو.... كله ... ههههههههه... تصوري راحت تبارك النهارده في الصباحيه ... ههههههههههه

سلامااااااااااات

reri said...

صاحب البوابه

مدونه عارفه سكتها ... مش زي صاحبتها
سلامي ليك

reri said...

متغيره شويه

هههههههههههههه... خدي بالك إنها بتوصل كل حاجه للناس اللي فوق .. والناس اللي تحت... ما تغلطيش أوي... ههههههههههه.. أنا بحذرك هتتخدي في الرجلين .. أه ماليش دعوه يا سلمي

سلامااااااااات

reri said...

marvel

ههههههههههههه... في رأيك نخلص عليها ونخلص .... البوست بتاعك الأخير كفيل إنه يقضي عليها ... هههههههه.. ده لو بتحس وبتفهم... ما تقطعش الزيارات ولا الجوابات

سلامااااااااااات

reri said...

safa7 karmoz

ههههههههههههههه.مساؤه طآآآآن..طبعا مش سفاح ... بقولك تاخد كام وتخلص ... ههههههههه

سلاماااااااااااااات

reri said...

sharm

ههههههههههههه..أنا عارفه يا أخويا .... أفكاركوا كلها دمويه ... تاخد كام وتخلص يا أحمد... أصل قلبي رهيف .. هههههههههه

سلاماااااااااااااات

reri said...

mesh2dra

هي لسه هتروح تفتن .... ماهي فتنت ووصلت لهدفها ... هي راحت تبارك لجيمي في الصباحيه... هههههههههه
أهلا بيكي ... ويا ريت أشوفك تاني

سلامااااااااااات

Tamer Nabil Moussa said...

بعدين بقى سبيها تفرح

احنا فى زمن الفرح فية قليل

ولما بيكون بينور ظلام الليل

ربنا يوفقك ويكرمك

تحياتى

Dr. Magdy Almaghraby said...

HI Rihab
Now you are modifying the well known idea of cosidering the {insight} as a person who can talk to yourself, and you made it a separate personality who can attend the weddings and acts very gladly,and showing emotions by voice and body language!!!!!!!!!, I have a question to you, whom exactly has been to the wedding of Jemmy and Diga, YOU or YOUR INSIGHT??
In both cases , You are lost,Or you are physically dissociated!!!
Have a good day yahatla yabint elhatla
Magdy Almaghraby

حسام مراد said...

بقولك هاتى ودنك كده
ههههههههههههههههههه
هههههههههههههه
مدونتك واقعيه شويه وعايز تعييييييييييييش
بس تعملى ايه احنا فقريييين ومش عايزنهم
ههههههههههههه اوعى تسمعى كلامها
تحياتى
سلامااااااااااااااااااات

أسوور said...

بوست سهلك من الضحك
فضلت أدور على اللى مفرح المدونة المنافقة دى لحد ما فهمت
:))))

على فكرة متشكرة قوى على التهنئة اللطيفة بعيد ميلاد جنى
تحياتى

ابو العربى said...

انا ولا هقول مجنونه ولا اى حاجة خالص مالص الجنون فنون وربنا يكملنا بالعقل
وعلى مدونتك يعنى الى انتى بتكلميها وطلعت بتنافق تلقيها عقلها ضرب منك

اما بقى على موضوع هات ودنك انا مبديش ودنى لحد انا دايما متعود اسيبها فى البيت

تحياتى

هشام علاء said...

دمك زى العسل على فكرة

و المدونة بتاعتك محتاجة حد يظبطلها دماغها احسن الحالة تزيد عليها و تبلغ عنك

خللى بالك على نفسك من مدونتك

و ربنا يستر

Van Gogh said...

الى زميلة المهنة اللى خرمت ودانى

انتى اللى دلعتى مدونتك..لو كنتى من الاول كتبتى فيها كام صفحة
ceutical
ولا كام رسمة
industrial

كانت عرفت ان الله حق
ونسيت هى مدونة ولا برشامة امتحانات

اول مرة ليا هنا...بش اكيد مش الأخيرة

reri said...

tamer nabil

بتها تفرح علي الآخر... فضحتني بالفرحه بتاعتها

سلاماااااااااااااااات

reri said...

magdy

إيه يا خالي الفضايح دي ؟؟؟.,الله ... مش تحترمني شويه ... بس حلو التحليل النفسي بتاعك ده .... مش عارفه مين اللي راح ... لما هعرف هقولك هههههههههه

سلاماااااااااااات

reri said...

حسام مراد

إنت غيرت الصوره يا شغال ... بس برده عرفتك ...هههههههههههه... إحنا وش فقر .... ههههههههههههه

سلامااااااااااااات يا شغال

reri said...

ياسمين

منوره ياجميل .... شفتي النفاق ... عيني عينك ... والعفو يا ياسمين ... وكل سنه وهي طيبه كمان مره

سلاماااااااااااات

reri said...

ضد الظلم

إيه ده ؟؟؟ إنت تقصد إن عقل المدونه ضرب من صاحبتها ... يا عم الله يسامحك ... وبعدين هتيديني ودنك يعني هتديهالي ... هههههههههههه... الجنون فنون قال

سلامااااااااات

reri said...

hesham

شكرا ليك ... أديني بحاول أظبطها ... عقلها ضرب بعيد عنك ...ههههههههه... بس برده فين برقيتك لسيادة الرئيس ... ياعم قولها ... وما تخافش من الأمن .... مدونتي واصله هتتوسط لك ...هههههههههه... ولا بلاش أحسن ,,هههههههههه

سلامااااااااااااات

reri said...

van gogh

ههههههههههههههه.. تصدق مش هيعدلها إلا برشامة
ceutical
فكرتني بأجمل ماده ..هههههههههه
أهلا بزميل المهنه في أي وقت

سلامااااااااااااات