ستون عام يا اسرائيل

أنا زي زيك مش فرحانه بالمناسبه دي

ومش هقول هابي بيرث داي يا إسرائيل

ولا هقول ده يوم نكبة فلسطين ومش إنشاء إسرائيل

لأنه بإختصار شئنا أم أبينا إسرائل موجوده الآن

اه موجوده

ده الواقع

وبوش راح واحتفل معاهم وخطب في الكنيست خطاب أعتقد إنه خطاب تاريخي

بعد سماعي لخطاب بوش

ما قعدتش ألعن وأسب فيه وفي كلامه وفي سياساته المنحازه

الراجل صادق مع نفسه بيعبر عن قناعاته

بوش مااداش الغاز لإسرائيل وبعدين ما شاركش معاهم في إحتفالهم

بوش بيساند إسرائيل سرا وعلانيه

الدور والباقي علي خفافيش الظلام

ولو إن ده مش موضوعي دلوقت بس الكلام جاب بعضه

بعد خطابه لقيت نفسي بعمل مقارنه بسيطه بين دوله إتعملت من ستين سنه ودوله عمرها سبعة آلاف عام عايشه في أغنية ورده شوف كنا في إيه وصبحنا في إيه

إسرائل في ستين سنه بتحارب وفي المقابل عملت دوله ديموقراطيه بجد الشعب فيها بيختار من يمثله وبيحاكموه لو غلط ولذلك حصلت عندهم تنميه وعملوا إقتصاد قوي يعني عملوا دوله صح لأنهم بيعملوا اللي مؤمنين بيه ليهم مبدأ وقضيه بيدافعوا عنها

في المقابل دول عربيه حوليها حالهم إيه بقي؟؟

فلوس مع تيوس عايمين علي النفط وحكام عايزين يتألهوا

أو دول غرقانه في فساد حراميه قعدوا علي الكراسي ولزقوا فيها

للأسف ده حالهم وده حالنا

ربنا يخلصنا من إسرائيل ومن بوش ومن حكامنا

ما تسمعونا آمين؟؟؟؟؟

أنا والإضراب وهواك

تابعت أمس إضراب مصر

وبما إنني في خارج مصر فلم أكن شاهد عيان علي أي حدث

تابعت فقط الأحداث من خلال التليفزيون ومن خلال مواقع الإنترنت

رغم تضارب الأخبار بين نجاح وفشل الإضراب

الحكومه تصر إنه لم يكن هناك إضراب وكما أكد عنوان جريدة الجمهوريه الغراء إنه إضراب فشنك

والمعارضه تؤكد إن الإضراب نجح

إلا إنني أري أن الإضراب نجح ونجح بشده ويكفي الهلع الأمني الشديد

لأول مره أشعر أن الأمن مرعوب من الشعب

ورغم أن السلبيه هي السمه الغالبه علي المصريين وكان الدافع الرئيسي لإمتناع البعض عن الخروج هو الخوف من حدوث أحداث تدفع الأمن إلي ما يحمد عقباه فالكثير خاف ليسلم

ثقافه دامت لسنوات في وجدان المصريين

إلا أن رمزية هذا الإضراب تعني الكثير

تعني الكثير لدي الشعب

وتعني أكثر لدي الأمن

الشعب بدأ الخروج من الشرنقه التي فرضها الأمن لسنوات

والأمن والنظام اصيبا بالهلع

وهذا في حد ذاته نجاح

وده ميعاد الإضراب الجاي

يوم عيد ميلاد ريسنا

اللي مهنينا

ودي هدية عيد ميلاده

هنستني ايه تاني

المصريين أكلوا حميير ميته

وعجبي

من المملكه العربيه السعوديه أحييكم
في نص شهر مارس كان عيد ميلاد المدونه دي
يوم 15 مارس بدأت أدون في المدونه دي
مر عام من عمرها
كل سنه وانتي طيبه يا مدونتي
وفي شهر مارس كان عيد الأم
مر عليا وأنا بعيده عنك يا أمي
صحيح كلمتك وبكلمك كل يوم
وتقريبا النت مخلينا عايشيين مع بعض بس حضنك له شكل تاني

كم أشتاق إلي حضنك

أنا عارفه إني مقصره في حق المدونه جدا
بس الفتره اللي فاتت كنت مشغوله جدا
عوده أتمني أن لا تقطعها مشاغل الحياه

مستنينكوا

مستنينكوا يا رجااااااااااااااااااااله
الكل مستنيكوا
ليه في الكوره أو مش ليه
مستنيكوا
عارف إيتو و دروجبا أوما سمعش عنهم
مستنيكوا
فرحتوا 75 مليون
عملتوا المعجزه وفرحتوا شعب كان في طريقه إنه ينسي معني الكلمه دي
جمعتوا شعب مش عارف يتجمع علي حاجه
سواء جيبتوا الكاس الليله أو لا قدر الله ما جيبتهوش
برده فرحتونا ومستنينكوا
شرفتونا
فرحتنا يا حضري .. ورفعت راسنا يا عمرو زكي .. إنت وأبو تريكه .. وجننتنا يا زيدان .. وفاجئتنا يا أحمد فتحي .. والله عليك يا حسني عبد الربه
وبقيت بطلنا القومي يا حسن يا شحاته
مستنينكوا كلكم يا رجااااااااااااااااله

وهتفرحونا بإذن الله

وهتبقي ليلة الأحد الكبيره أوي

ربنا معانا

ونرجع بالكاس من غانا

إلي الأقصر وأسوان

النهارده رايحه يا دووووووووب
مشوار صغير كده... يا دوب فركة كعب
مشوار كان نفسي أروحه من فتره طويله
أنا هخطف رجلي وأوصل للأقصر وأسوان

أشوفكم بعد لما أرجع
ومعي أهم الأخبار
كانت معكم مراسلتكم من الأقصر وأسوان

حين ميسره

كنت قاعده لا بيا ولا عليا قدام شاشة التلفزيون

لقيت البيت بيتك شغال ومحمود موجود ... قلت أشوف محمود سعد جايب مين

لقيته مستضيف راجل من رجالة وزارة الداخليه الجاااااامدين ... وكانوا بيتكلموا عن التطور اللي في السجون المصريه

ولا أخفيكم سرا إني من كتر الجمال اللي شفته علي الشاشه إتمنيت أدخل السجن ... كفترة إستجمام ... من الزحمه والقرف ... تقولش مصحه نفسيه .... وعلي طول إفتكرت فيلم البرئ بتاع أحمد زكي لما وفد أجنبي زار المعتقل ... وقال محمود عبد العزيز ليهم إنهم مش في سجن بالمعني المعروف ... وإنهم في مصحه ... أو في حاجه زي كده

إيه الحلاوه اللي أنا شوفتها دي ... لأ وهيدخلوا هناك كمان تليفونات وهتبقي عيشه ...والحياه بمبي ... ما تيجوا نتلم جماعه ونروح هناك !!!... قلت ده الواحد ياخد بعضه ويعمله جريمه ويروح يستجم شويه هناك .... وفي عز إندماجي مع البرنامج إفتكرت حين ميسره ... فيلم حين ميسره لخالد يوسف اللي عمل ضجه جامده وكلام عن سمعة مصر وسنيما اليسار ونغمه كده... مش عارفه هم عايزين السنيما تبقي بمبي والأفلام اللي فيها بمبي ...ومفيش فيلم يعدي ما يكونش فيه أغنية بمبي الحياه بقي لونها بمبي .... الفيلم عاجبني جدا رغم إنه مش بمبي ..والممثلين كل واحد عامل دوره صح أوي من أول سميه وعمرو سعد لغاية هاله فاخر... علي قد ما عجبني علي قد ما صدمني ... يمكن كلنا نكون بنسمع أو بنقرا عن العشوائيات ... واللي جابه خالد يوسف في الفيلم مش جديد علي حد فينا ... وكونه بيعتذر في النهايه لأنه ما قدرش يقدم الواقع لأنه أقسي من الفيلم بكتير ... فهو معاه حق ... المهم جهه في بالي علشان الناس اللي مش عاجبها السينما اللي مش بمبي ... وخايفين علي سمعة مصرمن سينما اليسار اللي شايفه الدنيا سوده في مصر مع إنها بمبي ... إنهم يعملوا فيلم من النوع البمبي عن السجون المصريه ... وبكده صورة مصر هتبقي ميه ميه ... وسمعتها هتبقي فل الفل ....أو إنهم يقترحوا علي الحكومه بما إنها بتصرف علي السجون ووقايمه باللي عليها ومخلياها مصحات نفسيه والحياه فيها بمبي .... إنها تجيب الناس اللي في العشوائيات وتدخلهم السجن ... وطبعا هم مش هيمانعوا ... لأنه أحسن وأكرم ليهم مليون مره ... أو إن الحكومه تصرف الفلوس دي في العشوائيات ... وساعتها الناس في السجون هتقل ... ومش هيحتاجوا يصرفوا عليهم كتير ... طبعا إنت بتتريق عليا وبتقول هي دي حلول دي ... وبتقول شايف الهبله اللي شايفه الحياه بمبي ... هو في سجون تاخد الناس اللي في العشوائيات ... دول زي الرز ... يا سيدي سبني أتخيل ...علي فكره دخول السجون هيبقي عليه طوابير ولا بتاعة العيش .... وإحتمال يكون بالواسطه ... أنا بقولك أهو علشان ما تقولش يا مواطن إن مفيش حد نبهك ... فظبط نفسك وشوفلك واسطه تكون جااااامده علشان تحجز مكانك من الآن ... ولا إنت مش عايز تلحق حته في البمبي وماسك في السواد بإيديك وإسنانك يا متشائم ويا ملوث لسمعة مصر

حين ميسره فيلم إسود وللأسف جاي في الزمن البمبي

نحن في زمن البمبي

come back

حسب توقيت تلك المدونه

تلي رمضان مباشرة عيد الأضحي المبارك

وبذلك تجنبنا الخلاف الأزلي في بداية الشهور الهجريه ونهايتها

وتلاشينا السؤال هو النهارده أول ذي الحجه في مصر ولا الثاني مباشرة

ما علينا

توقف له أسبابه

فات تلك المدونه الكثير من الأحداث التي تمنت أن تشارك فيها برأي أو بكلمه ... كم كانت تتمني أن تشارك

ولكنه ذنب صديقتها الوحيده والمتحكمه في مصيرها

الذنب ذنبي

حقك عليا يا مدونتي

عموما ما إتأخرتش كتير

مش ورا رمضان برده العيد

أنا جيت في العيد

كل سنه وإنتوا طيبين

رمضان كريم

إرهاصات حول إشاعة صحة الرئيس

يا كلاب بقي ده كلام تقولوه علي رئيسكو

اللي حاميكوا وساتركو

وبالحكمه مغرقكو

إخص عليكوا وعلي تربيتكو

لو لفيتوا مش هتلاقوا واحد غيره يستحملكو

ويستحمل فقركوا وغتاتكو

يعيش في هنا وسعاده .. وتتحبس أنفاسكو

بطلوا إشاعات علي صحة ريسكو

ده من غيره مصر هتبقي زي نادي إسكوا

معقوله ده كلام ..رضيت زمتكوا

واحد لا بياكل أكلكوا ولا بيشرب ميتكو

ولا بيشم هواكوا ولا عايش عيشتكوا

هيتعب من إيه ؟؟؟ ... من رقص الديسكو؟؟؟

يا سم ... تموتوا كلكوا

ويعيش ريسكو

بالروح بالدم نفديك يا نادي إسكوا

وللتدوين فوائد أخري

أنا أدون ... إذن أنا علي قيد الحياه

فترة إنقطاع هي الأطول في حياة تلك المدونه القصيره

كنت فيها الحاضر الغائب

أتابع عن بعد

صدمني خبر وفاة شيماء صاحبة مدونة شيكو أون لاين رحمها الله

كتبت بوست من حوالي إسبوعين ... عندما عرفت الخبر من مدونة إنجي ...ولكني فضلت عدم نشره

لا أنكر أنا هذا الخبر من العوامل الأساسيه للإنقطاع

كلما أجلس أمام الكمبيوتر وأحاول كتابة بوست بعيد عن شيماء رحمها الله أو عن الموت

لا أستطيع

الف ألف وأرجع تاني وأتحدث عنه وعن أناس لم أتوقع أن يصل إليهم ولكنه وصل .. رغم أنف الجميع

لم أعرف شيماء ولم يحدث أن مررت علي مدونتها صدفه

ولكني تأثرت بوفاتها وكأني أعرفها جيدا

قرأت آخر بوست لها وتأملت كلماته لأتسائل

هل يشعر الإنسان بإقتراب الموت منه

آخر بوست لها عنوانه

غياب لأجل يعلمه الله

سبحان الله

هكذا كانت الفتره السابقه

صراع مع كذا بوست جميعهم عن الموت

في النهايه حسم الصراع ... وكتبت هذا البوست الأقل في مستوي الكآبه من السابقين له

لأخرج من فترة الإنقطاع بأقل كآبه ممكنه

كم نحن ضعفاء

للأوراق والصور وإكتشفت أخيرا ..أن للمدونات أعمار أطول من أعمرانا

وإذا بي أكتشف إكتشاف آخر أجده إيجابي جدا في وسط هذا الزخم الكئيب

أن للتدوين فوائد أخري

أن تجد من يحزن عليك ولم تربطه بك أي صله

أن تجد من يدعو لك وأنت لم يسبق لك أن إلتقيته لو حتي صدفه

فائده أخري للتدوين غير التي نعرفها جميعا من فوائد وأنت حي

فائده لم أفكر فيها من قبل ... لم تخطر ببالي إلا بوفاة شيماء

رحمك الله يا شيماء

ما زلت أردد وللتدوين فوائد أخري

إرتباط شرطي

دائما ما ترتبط لدي المناسبات والأعياد بأغاني معينه أو أفلام معينه

لاأشعر بالمناسبه إلا بسماع الأغنيه المرتبطه بها أو مشاهدة الفيلم الذي غالبا ما أكتفي بمشاهدة مشهد واحد منه وسلام عليكم علشان بس ما يأثرش علي جهازي العصبي كتر تكرار الأفلام

إرتباط شرطي

مجرد إرتباط ولا أعرف متي وكيف بدأ هذا الإرتباط

عيد الأم .... من غير أغنية ست الحبايب لفايزه أحمد ... يبقي عيد البطيخ

شم النسيم .... لازم لازم أسمع أغنية الدنيا ربيع لسعاد حسني

بعدها خلاص أقول النهارده كان شم النسيم

أما بقي عيد تحرير سيناء فلازم وإجباري أشوف مشهد من الطريق لإيلات ... ساعتها أعرف أنا أجازه ليه

وخاصة بقي المشهد بتاع يا ريتني كنت معاهم

رمضان .... أجمل شهر في السنه ... قلبي بيفرح بجد أوي لما بسمع أغنية رمضان جانا بتاعة عبد المطلب

مات محمد عبد المطلب بس متهيألي مهما مر الزمن مفيش رمضان من غير أغنية رمضان جانا ... ومفيش أغنيه بديله تنفع تحسسك برمضان غيرها .... وحوي يا وحوي حلوه برده هي ومعظم أغاني رمضان التانيه بس رمضان جانا جامده أوي ... أغنيه لازم تفضل ... عبد المطلب هيفضل موجود بيها

لما تبدأ أغنية تم البدر بدري والأيام بتجري ... بعرف إنه خلاص رمضان قرب يخلص ويبدأ قلبي يبقي حزين إن رمضان بيودع

وبمناسبة الكلام علي رمضان كنت مره في سكشن .... وكان تقريبا تاني يوم هيكون رمضان والناس كلها بتهني بعض صاحبتكوا بقي اللي هي أنا بقول لأصحابي أنا بحب رمضان أوي ماتوا علي نفسهم من الضحك .... لأن كان معانا واحد في السكشن إسمه رمضان وقالولي لو حد سمعك وإنتي بتقولي كده يقولوا البت واقعه في رمضان

تيجي ليلة العيد ... والله ما أحس بيها أبدا من غير ما أسمع أغنية أم كلثوم يا ليلة العيد ... أغنيه عبقريه ... لو الناس نسيوا كل أغاني أم كلثوم متهيألي دي إستحاله ... الناس بتوع زمان دول عملوا أغاني فعلا للزمن

يوم العيد الصبح لازم ترن في ودنك الأغنيه السخيفه في وجهة نظري بتاعة صفاء أبو السعود أهلا أهلا بالعيد

سته أكتوبر بقي ... ده لازم أسمع فيه موسيقي رأفت الهجان .... العمل الوطني اللي إتربينا عليه ... وأشوف كام مشهد كده .. أهمهم وهو بيودع شريفه أخته ... والتاني ويوسف شعبان بيقوله مصر أمانه يا رأفت ... والتالت وهو بيودع أسرة شارل سمحون في المينا ويجيله يوسف شعبان من وراهم ... بحب المشهد ده أوي ... وده غير إنك لازم تلاقي الكام فيلم الساقطين اللي عمري ما إتفرجت ولا هتفرج عليهم ... من عينة فيلم رصاصه لا تزال في جيبي وإخواته

إمبارح كنت أجازه ... ببص في الساعه ... لقيتها بقت واحده ... قلت أقوم أنام ... وبعدين قلت يا نهااااااااار أبيض ويا وقعه بمبي ... ده أنا ما شفتوش ... والساعه بقت واحده ... مسكت الريموت وهاتك يا تك ... وما لقيتهوش ... كنت خلاص هفقد الأمل ... لحد ما هداني تفكيري إني أجيب القناه الأولي المصريه الأرضي ... وقلت أكيد هلاقيه عليها ... وفلح إحساسي ... ولاقيته ... لقيت علي قاعد مع إنجي علي البحر ... ما سمعتش ولا كلمه من حوارهم ... بس كده خلاص حسيت أنا كنت أجازه ليه ... قلت لنفسي كده خلاص النهارده كان عيد الثوره ... والدليل هو علي وإنجي ... قلت لنفسي كل عيد ثوره وإنتي بخير يا رحوبه ... ياللا تصبحي علي خير بقي علشان تعرفي تصحي بكره ... وخلص اليوم الأجازه

أه أصلي نسيت أقولكوا إن عيد الثوره عندي الإرتباط الشرطي بتاعه هو فيلم رد قلبي

يا تري نفس الأغاني والحاجات اللي قلتها برده عامله عندكوا إرتباط شرطي؟؟؟؟

عقبال الأجازه الجايه والإرتباط الشرطي بتاعها

مصر كانت هبة النيل

مصر هبة النيل

هكذا تعلمناها في المدرسه

وكتبناها في كل مواضيع التعبير بمجرد رؤية كلمة النيل

كنا نسطرها هكذا دون تفكير

قال عنه هيروديت أن مصر هبة النيل

عندما قرأت وشاهدت ما يحدث في بعض محافظات مصر اللي... هي هبة النيل... ما يحدث من غلق طرق والخروج في تظاهرات حاملين جراكن الماء الفارغه باحثين عن قطرة ماء تروي عطشهم ....في حادثه سيذكرها التاريخ علي أنها ثورة الجراكن

في عصر الإنترنت ..والجيل الثالث لشبكات المحمول.. والتكنولوجيا التي تحرص عليها حكومتنا النظيفه قبل حرصها علي توفير الماء الصالح للإستخدام الآدمي ... حكومه نظيفه بحق ... والدليل أنها حريصه علي توصيل الخدمات النظيفه ...أن هؤلاء المتظاهرون يضطروا إلي الحفر في الأرض للوصول إلي الماء التي تكون مياه صرف صحي غالبا ... فالحكومه وجدت أنها أكثر نظافه ...وصحيه أكثر من ماء الشرب العادي من النيل ومن المياه المعدنيه ... ونظرا لإهتمامها المفرط بصحة المواطن... قررت الحكومه أن تغير المقوله الشهيره التي حفظناها عن ظهر قلب وهي مصر هبة النيل والمصريين ... لتصبح مصر هبة الصرف الصحي والمتنيلين

نظرا للفوائد العميقه للصرف الصحي

وعليه رأت الحكومه أن الصرف الصحي هو رمز للمصريين المعاصرين... لذا سيكون شعارا لهم بدلا من تقديس المصريين القدماء للبتاع اللي ولا ليه أي فايده حاليا غير المسخره ...والكلام الفاضي والحبيبه اللي واقفين يتأملوه ويحبوا بعض عليه.. ولم تجد الحكومه له أي فوائد أخري

وطبعا هي أدري بمصالحنا العليا

ولذلك أيضا سيكون شعار مهرجان القراءه للجميع الذي يقام تحت رعاية كل السيدات الفضليات ... هذا العام شعار له مغزي يرسخ عند الأجيال القادمه المقوله الصحيحه ...حتي يكون لدينا جيل أكثرا وعيا وأكثر فهما لمقتضيات ومتطلبات وتحديات العصر ... وأكثر قدره علي إستخدام خدمات الجيل الثالث للمحمول

الشعار هو

مصر هبة الصرف الصحي والمتنيلين

وطبعا المتنيلين علشان ما ننساش الشعار القديم برده وعلشان مفيش حد يفهمه غلط هو نسبه للنيل وليس للنيله

الصيف

أول كلامي سلاماااااااااااااااااااااااااااات

وثانيه وحشتيني يا مدونتي ويا كل المدونات

وثالثه شكرا لكل الناس اللي كتبوا تعليقات

علي البوست اللي فات

والرابعه برده شكرا لكل اللي سأل عن سر السكات

والخامسه شكرا برده لكل اللي فات من هنا من سكات

وبعد التشكرات

في إعتذارات لأني ما ردتش علي تعليقات البوست اللي فات

ولأني ما بدخلش مدونات

ولا بعلق علي موضوعات

واللي فات بقي مات

بدأ الصيف بحره وبقرفه .... بس برده لذيذ !!!! .... أه والله لذيذ

فيه كل الذكريات الحلوه ... والضحكه المصحصحه المجلجله .. وكأن حرارة الجو تشعل في الناس حب التنكيت والضحك .. وخاصة في ليالي الصيف الحاره الساخنه التي تجبر الناس علي السهر في الشوارع أو حتي في البيوت

ويا سلام علي البطيخ الساقع لذيذ بشكل في الصيف

الصيف كان يعني أجازه ... حاليا حر وبهدله في المواصلات وإنت راجع من الشغل

الصيف كان يعني نوم طول النهار وسهر طول الليل ودائما تجد من يشاركك السهر وتبادله السمر... حاليا تقوم تنام زي الجذمه والناس كلها لسه بتقول يا يوم إبدأ علشان تقدر تصحي بدري

الصيف كان يعني الإستمتاع بالفراغ الممتع والتنقل بين التلفزيون والقراءه والشطرنج والكوتشينه والدومينو والطاوله ولا بنك الحظ والليدو والسلم والتعبان والسيجا ... كل لعبه ليها ذكري تموت من الضحك والعامل المشترك بين كل الألعاب دي إنها كانت في الصيف .... حاليا لو لعبتلك دور سوليتير ولا فيفا علي الكمبيوترلوحدك وحط مليون خط تحت لوحدك يبقي كتر خير الدنيا

الصيف كان يعني السنيما ودخول كل الأفلام ... حاليا لو دخلت فيلمين برده يبقي عملت إنجاز

الصيف كان يعني البحر اللي بتقعد قدامه تتحايل علي الموج ياخد منك همومك ويشيلها عنك وما بيتأخرش عنك .. بيشيل سرك ويصونه ... ويساعدك تنسي .. حمال الأسيه البحر ده... أمواجه تحمل هموم البشر .. كل منا تحاور معه .. كل منا حمله أسراره وهمومه وأفراحه .. له كل الحق إن ثار علينا في الشتاء وعلت أمواجه فقد تحملنا طوال الصيف ... أليس من حقه أن يثور بعد أن تحملنا شهور الصيف ؟؟!!!! ... زمان كنت تروح تترمي في أي مصيف وتقعد براحتك .... حاليا لازم ترجع في ميعاد محدد علشان أجازتك خلصت

رغم كل ذلك بحب الصيف رغم حره وقرفه بحبه ... فيه إنطلاق عجيب حتي لو لم أعد قادره علي الإنطلاق بشكل مطلق ... كما كنت من قبل .. فيكفيني أن أشعر بإنطلاق كل شئ حولي ... لأعرف أني في فصل الإنطلاق

أي في فصل الصيف

كل يوم حار وإنتوا بخير

كل ليلة سهر حلوه وإنتوا بخير

كل يوم في المصيف علي البحر وإنتوا بخير

كل قصة حب جديده في الصيف وإنتوا بخير

أصلهم بيقولوا كل قصص الحب بتبدأ في الصيف

كل شهر صيف وإنتوا بخير

تقريبا .. غاويه نكد

أخييييييييييييييييييييييرا

وبعد شوية كوسه وواسطه والذي منه

وبعد إنتظار دام لفتره

وبعد محاولتين أخدت فيهم بومبه

لدرجة أني بدأت أنسي

إستطعت نقل تكليفي من مكان نص كم شويه

إلي مكان له كُم وكويس

ولأني كنت بدأت آخد علي المكان النص كم أو بالأصح الكات اللي أنا فيه وبدأت أتأقلم وأحب العيال إصحابي هناك

وإتعودت عليه خلاص ... والعشره خليتني أنسي عيوبه ... وأنسي إنه كات ... فللأسف مش فرحانه بالخطوه دي

تقريبا غاويه نكد

يمكن علشان رايحه مكان جديد ... خايفه ... يمكن علشان لسه مش عارفه هرتاح هناك ولا هيطلع هناك بكُم لدرجة إني أموت من الحر ... وأنا أخدت علي الشغل الكات بتاع وزارة الصحه وما أدراكم ما وزارة الصحه ... يمكن علشان النقل جهه متأخر بعد ما خلاص كنت نسيته .. وكنت فقدت الأمل فيه ..وكنت بدأت أتأقلم ... يمكن لو كان جهه من أول محاوله كنت هفرح بيه

عارف زي لما تكون مستني واحد صاحبك أوي ونفسك تشوفه أو حبيب مستني حبيبه وبعدين يديله بومبه وما

يجيش .. وتاني مره يعملها فيه وبرده ما يجيش ... في المره التالته هيبقي عايز يشوفه بس علشان يقوله ""تصدق بالله إنت ما عندكش دم "" .... دايما لما الحاجه اللي نكون مستنينها أوي وتتأخر عن ميعادها وننساها وبعدين تييجي بنفقد فرحتنا بيها ... وتقول لنفسك .. مش كانت جت بدري شويه .. كانت أكيد فرحتك بيها هتختلف

مكتوب عليا كل لما أتعلق بحاجه أو بشخص لازم لازم نبعد ... ده علي طول علي فكره ... طول حياتي كده

مش بقولوكوا غاويه نكد

المفروض ده خبر كويس

والناس اللي عرفت بتقولي مبروك

بس مش عارفه ليه قلب عليا مواجع حياتي

بجد بدأت أحس إني غاويه نكد

إدعولي يا جماعه... بجد إدعولي

أين عمري

زمان وأنا صغير كنت بحلم أبقي كبير

الحلم ده يهيئ لي أنه داعبنا جميعا

داعبنا من زمان

ننظر لمن أكبر علي أنهم هدف نريد اللحاق به

كنا بنتسابق مين فينا أكبر من التاني أنا والعيال أصحابي ... دي أكبرمن دي بشهر ... تحس بقي بفخر.. وتقولنا إنتوا عيال ... كنت وأنا عندي 13 سنه أقول يااااااااااااه إمتي يبقي عندي 20 ... ده لسه كتير أوي ....نفسي أكبر بقي وأبقي زي فلانه وأبقي بنت كبيره كده .. وآنسه وطبعا أدخل الجامعه ويكمل الحلم طبعا... وأقابله... زي ما كل

الأفلام والمسلسلات أوحت لي إن في الجامعه هقابله يعني هقابله...((طلعوا كدابين أوي ))...و محدش يقولي هتقابلي مين؟؟؟ ... أي حد والسلام

حلم إن الواحد يكبر ده فضل معايا .. وبيكبر معايا ... إلي أن وصلت العشرين ... وتك تك تك تك بقوا 24... إزاي إمتي ؟؟!!!!!!!!... طيب والنبي هرجع في كلامي ومش عايزه الحلم المنيل ده ... إستحاله !!!!!!!!... مفيش تفاوض ... هي كده تك تك تك تك وبقوا 24 ..... طيب مفيش إختراع يوقف عداد العمر اللي نازل يرف علي دماغي من غير مناسبه ده ... أبدا ... مفيش تفاوض .... تك تك تك تك وهم ال 24 ... طيب عندي حل ... ما كفايه الأربع تكات دول ... ونقفل عليهم .... نو واي ... مفيش تفاوض ... والمفاجئه الساره إن فاضلك تكايه صغنونه وتبقي 25 .... يا نهار كارو

يا عمري كفايه وبلاش التكايه

بعترف إني كنت هبله لما حلمت الحلم ده ... يا ريتني فضلت هبله

بعترف إن كان عندي تخلف عشوائي .... لما حلمت أخلص الإبتدائي

بعترف إن كان عندي دربكه سلوكيه .... لما حلمت آخد الإعداديه

بعترف إن كان عندي سحابه ضبابيه .... لما فرحت إني إرتحت من الثانويه

بعترف إن كان عندي إعاقه ذهنيه .... لما حلمت أوصل رابعه كليه

كنت وأنا في الكليه كل سنه دراسيه ببص علي أي جدول وأقول يا رب إمتي أبص علي الخانه الأخيره فيه ....اللي هي خانة سنه رابعه

مش هنسي بعد لما خلصت أول تيرم في تانيه " بعد إعدادي " لما قلت لرشا ... فات نص الطريق وباقي نصه بالظبط ... كنت للأسف بقولها وأنا مبسوطه ... ما كنتش عارفه إن ده كله من عمري بيفوت

أتذكر أول يوم في الجامعه وكأنه أمس ... بكل تفاصيله ... كنت لابسه إيه ؟؟ ... قابلت مين ... يمكن أكون نسيت كنت لابسه إيه إمبارح أو حتي شفت مين

ليه إتسرقت مني كده يا عمري؟؟؟؟؟؟؟؟؟؟؟؟؟؟؟؟؟؟؟؟؟؟

نفسي ألحقك يا عمري .... نفسي أعيشك .. إديني فرصه أحس بيك .. حساك أسرع مني

أسرع من طاقتي علي الجري

عارفه إني مش هقدر ألحقك

نفسي ألحقك وأقولك طلب واحد ... ممكن بس ما تجريش

إنت ليه ما بتسمعنيش

لأنك أسرع من الضؤ وأسرع من الصوت

يا تري هلحقك يا عمري قبل ما تفوت

ولا هتسبقك وتسبقني لحظة الموت

حل عبقري جدا جدا

قعدوا البنات في البيوت "" .... "" ألاقي شلة بنات واقفه وعمالين يضحكوا وقال شايلين كتب "" .... "" لما سألت يقولوا البنات مستنين ياخدوا الدرس "" ... "" والآخر يقولوا إلحقونا ""... البنت إتجوزت عرفي ... البنت إتنصرت ... البنت حامل ... البنت إتهببت وإغتصبت

علي طريقة الشيخ في فيلم عمارة يعقوبيان لما قال نريدها "" إسلاميه..سلاميه "" ... ردد شيخ مسجد من المساجد السنيه التي يكون روادها غالبا من الملتحيين مقصري الجلباب والمنتقبات...يكون الأمن فيها غالبا أكثر من المصليين أو حاضري الدرس تلك العبارات السابقه في أحد الدروس بهذا المسجد الذي يقع بالقرب من منزلي ... كنت أمر بجوار هذا المسجد أثناء الدرس الذي يكون علي ما أعتقد كل أربعاء ... وصلتني تلك العبارات وأنا أسير في الشارع ... وجذبني للتركيز فرط إنفعال الرجل في الحديث

وجد هذا الشيخ الذي يلقي الدرس الحل لمشاكل مجتمعنا من إغتصاب وتحرش وزواج عرفي و تغيير الدين ... وجد حلا لكل هذه المشاكل ... حل عبقري وهو

"" قعدوا البنات في البيوت ""

أحييه هو وكل رجال الدين علي هذه الحلول العبقريه السابقه لعصرها

هذا الحل العجيب الغريب دفعني لتساؤلات عديده ... هل المرأه هي مصدر كل الشرور في المجتمع ... هل إذا إختفي هذا الكائن "المرأه" الذي يضايق وجوده كثير من شيوخ هذا الزمن ستحل أزمات المسلمين بصفه خاصه والمجتمعات العربيه بصفه عامه... لا أعرف مصدر هذا الحل الفلته العبقري ... ولكني أراه بعيد كل البعد عن الإسلام ... أنا لن أتكلم في الدين لأني لست حجه لهذا ... مع إن زماننا أصبح زمن فتوي لكل مواطن ...كل من هب ودب يحلل ويحرم علي كيفه ... هذا ليس موضوعنا لأنه موضوع شرحه يطول ويطول

لن أخفي عنكم أن كلام هذا الرجل أزعجني وخضني .وما أزعجني أكثر أنه ليس كلام شخص واحد فقط أو حتي مجموعه قليله من الشيوخ... ولكني أري أن تلك النغمه تعلو و تعلو... وبت أسمع تلك العبارات من الكثير من الشيوخ الذي ينصب كلامهم كله عن المرأه ونقاب المرأه .. وأضع مليون خط تحت نقاب المرأه ... وبالمناسبه أنا لست ضد النقاب نهائي ... لأني أري فيه صوره من صور الحريه الشخصيه ... ولكن أنا ضد أن يصبح هو الحلال وما دونه حرام ... و لكن أن يجعل هؤلاء الشيوخ المرأه هي سبب التحرش وسبب الإغتصاب .. وسبب الزواج العرفي وكأن شريكها في كل تلك الأحداث ملاك مسكين تجذبه للقاع تلك الشيطانه ... وبدل من أن يجد هذا الشيخ أو غيره حلولا عمليه من ديننا الحنيف لما يعاني منه مجتمعنا من إنحلال وإنحدار أخلاقي ... وبدل من أن يدل الآباء والأمهات علي طرق لتربية الأبناء ذكور وإناث ... لجأ لحل عبقري وهو "" قعدوا البنات في البيوت "" حل عبقري

ولا إنتوا مش معايا إنه عبقري جدا جدا جدا جدا جدا ....جدا

"" قعدوا البنات في البيوت ""

التاج التاني .. وإحتمال يكون الأخير

موجه من الإكتئاب تجتاح المدونات وبشده .... كتبت كام سطر لاقيتهم إكتئاب في إكتئاب ...قلت حرام .... أفكاري كلها تجيب إكتئاب.... لقيت نفسي بقول ستووووووووووووووب ..وصلني تاج من شادي صاحب النظاره السوداء..... وفكرني إن في سلطانيه تاجات مش تاج عليا ... وشكلهم هيكونوا آخر تاجات في حياتي التدوينيه القصيره ... قررت إني أقلبها تاجات لحين إشعار آخر

التاج حدفته
شيماء
http://shayma-m.blogspot.com
ومعاها
رامي
http://mr-proid.blogspot.com


إسم مدونتك؟؟؟؟؟
هات ودنك

لماذا إخترته وما هي نيتك من وراء إختياره ؟؟؟؟؟
هي جت كده ... نيتي من وراء إختياره إنك تديني ودنك ... وصدقني مش هتندم.. بس كده

هل فكرت في إغلاق مدونتك ... والسبب؟؟؟؟
إلي الآن لسه... بس إن شاء الله مش هيحصل

صورتك في المدونه رمزيتها ؟؟؟؟
طفله حاطه إيدها علي خدها ... رمزيتها عندي إنها بتوصف حالي ...وحده وإبتسامه ... تناقضات وحاجات كده داخله في بعضها

لماذا دخلت عالم التدوين من الأساس؟؟؟؟
سمعت عن التدوين والمدونات بعد حكاية كريم عامر ... قريت مدونات كتير ... عجبتني الفكره ... لقيتها هتديني فرصه أخرج حاجات كتير جوايا ... وفعلا بقرب من نفسي أكتر

أجمل جمله قيلت لك في وصف مدونتك ؟؟؟؟
والله أي حد بيقول كلام حلو في حق المدونه بعتبره أجمل جمله ... مفيش حاجه محدده

التعليقات بالنسبه لك ... أهميتها ؟؟؟؟
مهمه جدا ... كفايه إني بحس إن في حد قرأ كلامي وإهتم ... بتحسسني إني مش لوحدي

أحلي بوست كتبته ... ضع اللينك ...لماذا ؟؟؟؟
أكتر بوست بيعجبني ليا وبيضحكني كل لما أقراه ... ساعات بحس إن مش أنا اللي كاتباه
بوست شم النسم
http://r7oba.blogspot.com/2007/04/blog-spot_08.html


أفضل مدونه قرأتها؟؟؟؟
كتير ... أي مدونه بتابعها بتكون عاجباني

أفضل بوست قرأته ... وضع لينكه ؟؟؟؟
برده كتير ... أي بوست بعلق عليه بيبقي حقيقي عاجبني

حد قل أدبه في التعليق إيه رد فعلك ؟؟؟؟
هلغي تعليقه .... ولو كررها ههزأه ... بس هي الحمد لله لحد دلوقتي ما حصلتش

أسوأ مدونه ؟؟؟؟
كل مدونات المثلييين .... بجد بيخرجوني عن أعصابي ... ربنا يهدي

أسوأ بوست ... أسوأ مدون ؟؟؟؟
نفس الحكايه

______________________________________________

هيحصل إيه في إيميلك لما تموتي ؟؟؟؟
ضحكتني وأنا ما ليش نفس.... بس عموما ممكن الواحد يعمل خزنه في البنك فيها الباسوورد علشان برده أهله يورثوا الإيميل ... هو مش ممتلكات خاصه برده

إديتي الباسوورد لحد قبل كده ؟؟؟؟
نو

كانت إيه طبيعة علاقتك بيه ؟؟؟؟
ولا أعرفه ... إنت تعرف مين نو

إسمك؟؟؟؟
رحاب

المشهور بيه وسط أصحابك؟؟؟؟
رحوبه ... ريري ... ريرو ... رحبه ... روبي ... أي حاجه تييجي في بال حد بيقولها

عمرك؟؟؟؟
وليه الإحراج ده ... 24

برجك ؟؟؟؟
الميزان ... برج العقل كله والإتزان ... مالك مستغرب كده ليه ؟؟... مش شايف عقلي يوزن بلد إزاي

مجال دراستك ؟؟؟؟
صيدله

شخصيتك نوعها إيه ؟؟؟؟
يا سلااااااااااااااااام... تقصد أي شخصيه فيهم ... بس عموما هي من النوع المألوف

السفر بالنسبه ليك ؟؟؟؟؟
حريه وإنطلاق وخروج عن المألوف

المود بتاعك ؟؟؟؟
جاوبت مسبقا في أول البوست.... بس هو برده مود مألوف

وقت فراغك بتعملي فيه إيه ؟؟؟؟
عالكمبيوتر ... بقرأ ... بتفرج علي التلفزيون

الأكله المفضله ؟؟؟؟
كتير ... بس بفضل الأكل المألوف ... بحب المحشي جدا

الصفات اللي أخدتيها من بابا ؟؟؟؟
الذكاء وحب التفكير

الصفات اللي أخدتيها من مامتك؟؟؟؟
الإندفاع وشوية عصبيه بس طبعا صغيرين جنبها

أكتر ست حاجات بكرهها؟؟؟؟
النفاق .... الكذب .... النكد ....الحقد... الغباء ...التدخل في حياة الآخريين

أكتر ست حاجات بحبها ؟؟؟؟
نفسي ....أهلي ....بلدي ....الدنيا.... الحب .... البحر

الشغل بالنسبه لك ؟؟؟؟
شر لا بد منه

الإنترنت بالنسبه لك ؟؟؟؟
كل حاجه ليا حاليا ... بيملا حياتي بجد

________________________________________________________________

هل كنت طالب شاطر في المدرسه ؟؟؟؟
أه

إيه أكتر ماده حبيتها في المدرسه وفي الكليه ؟؟؟؟
في المدرسه حبيت الكمياء.... بس لما دخلت صيدله كرهت الكمياء بكل أنواعها

إيه أكتر ماده كرهتها في المدرسه والكليه ؟؟؟؟؟
وأنا في المدرسه كان موتي وسمي العربي ... والأحياء
في الكليه كرهت العقاقير والكمياء الصيدلانيه

كنت عايز تطلع إيه وإنت صغنن ؟؟؟؟
بوليس ومان... شرطيه يعني

__________________________________________________

section 1... last 1?

last beverage????
معايا كوباية فراوله.. بشرب فيها

last phone call????
من واحده صاحبتي

last instant message????
ما فتحتش الماسينجير من يومين

last cd played????
بقالي كتييييييييييييييييييييييير ما شغلتش سي دي

last time you cried????
مش فاكره ... بس من فتره

last text message????
من بابا وقالي وحشتيني يا رحبه

---------------------------------------------------------------

section 2.....have you evers??

dated someone twice????

أبدا أبدا ....نو

been cheated on????

في الحب أبدا نو ... في الحياه ييييييييييييييييييييييييييييييس وكتيييير

kissed someone and regretted it ????

إيه التاج قليل الأدب ده ... بس برده أبدا نو

lost someone special????

كتير ... أنا بلوست بالهبل أصلا... سبيشيال بقي ... مش سبيشيال ... كله البشر عندي غالبا في الوست

been depressed????

هأوأوأو.... من كتر ما هو بقي الطبيعي ما بقتش أعد

been drunk and threw up????

التاج ده نيته مش سليمه ... بس برده أبدا نو

---------------------------------------------------

section 3.....

list 3 favorite colors????

الروز

الأبيض

الأزرق

------------------------------------------------------

section 4....

this month have you..... made a new friend????

نو

fallen out of love????

نووووووووووووو

loughed until you cried????

أه تصدق

met someone who changed your life????

نووووووووو... لا الشهر ده ولا اللي قبله

found out who your true friends were????

لأ الحكايه دي من زمن

is there is something you want to tell to someone????

نو.... نهائي

would you kiss anyone on your top friends????

هو إيه حكاية البوس مع التاج ده

how many people in your top friends do you know in real life????

مادام توب فريندز يبقي أكيد

how many kids do you want to have????

نقول سته سبعه

do you have any pets????

نوووووووووو.. بكرههم وبقرف منهم

do you wanna change your name????

نوووووووووو

what did you do for your last birthday????

ولا الهواااا

what time did you wake up today????

11

what were you doing at midnight last night????

بتفرج عالتي في

name something you cannt wait for????

من أول ما الحر بدأ وأنا نفسي أروح إسكندريه ... نفسي أشوف البحر جدا

last time you saw your father???

من شهر

what is one thing you wish you could change about your life????

نفسي أبطل الكسل

what are you listening to right now????

أغنية شيرين من الغباء

have you ever talked about someone behind their back????

ههههههههههههه... كتييييييييييييييير

what is the last piece of clothing you borrowed from anyone????

عمرها ما حصلت

who is getting on your nerves right now????

مفيش

most visited webpage????

البلوج بتاعي

coke or pepsi????

ميرندا تفاح

mac or pc????

pc....الكمبيوتر بتاعي

بس برده يعني إيه mac

هييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييه

مش ممكن أمرر أي تاج من دول لأي حد ... لأني مش بكرهه حد من المدونين للدرجه دي

رحاب أغمي عليها

تهييييييييييييييييييييس وهرتله صباحيه

صباح الهرتله والتهييس كمان

النهارده يعني توداي ... دخلت سيده في مكان شغلي ""اللي بقضي فيه التكليف "" ... و كنت ماسكه الدستور اليومي

بتصفحه وتحديدا كنت بقرأ مقال بلال فضل و مندمجه معاه وبضحك علي كلامه كالعاده .... قالت السيده لي ((إيه ده إنتي كده تاخدي مخالفه ))..... ضحكت كعادتي وقلت في سري هو أنا راكنه عربيه في الممنوع يا ست إنتي علشان آخد مخالفه ... عادي فوتي يا رحاب وصباح الهرتله والتهييس ... ده عقلي اللي قالي كده ... بس برده السوس جوايا عايز يعرف الست دي تقصد إيه ؟؟؟.... قلتلها تقصدي إيه .... قالتلي هو الدستور ده وطني ولا معارضه ... إبتسمت كده و قلتلها معارضه .... قالتلي أصل المعارضه بقت تخرف أوي ....الواحد يقرا الأهرام الأخبار الجمهوريه.. غلط عليكي كده ...أصلها ضد الحكومه ... صاحبتكوا اللي هي أنا أخدتها الجلاله و عليت صوتي و قلتلها طيب ما أنا ضد الحكومه .... ضحكت بإزبهلال ... إلا صحيح يعني إيه إزبهلال ... اللي فيكوا عارف يقولي ... و بعدين قالتلي ما كلنا ضد الحكومه ... وفتحت زي الراديوا شتيمه في الحزب الوطني ونوابه و فضيحة عمنا حيدر البغدادي والسيديهات الفاضحه بتاعته ... صباح الهرتله والتهييس ... الست بينها ضربت ... ما كانت من شويه بتنصحني ما أقراش غير جرايد الأخ سرايا وأخوه القط وإبن عمهم محمد علي إبراهيم ......الست طلعت الشحنه بتاعتها وزميلتي صرفتلها الدوا وخرجت .... وأنا بقول في سري طبعا .... يا حول الله ... شعب عايز يروح السرايا الصفرا ...

صباح الهرتله والتهيييس اللي بقي عند الناس

من حوالي إسبوع .... يعني من حوالي وييك .... شوفتوا ترجمه فوريه أهي ... ومحدش يقول دي هرتله ولا تهييس لا سمح الله ..... دخل عليا ... مش عارفه إيه حكاية الناس اللي بتدخل عليا ...بس المره دي دخل عليا في الصيدليه... أول لما شفته قلت الخلقه دي مش غريبه عليا .... بس برده قلت صباح الهرتله والتهييس ... تلاقيها تهيئات من اللي بتجيلي... هبقي أحكيلكوا عليها بعدين .... خلينا دلوقتي في الخلقه ... قصدي في الشخص اللي دخل عليا ... قعد يبتسم بدون مناسبه و يسألني علي شفرات حلاقه لورد .... وريته اللي عندي ... قعد يقولي لأ مش عارف هي ولا لأ....و أنا أقول يا صبر أيوب في عقلي .... أنا شفت الخلقه دي فين .... فتحها وطلعت مش هي ... وطبعا إتدبس في تمنها .... و قعد يوصفلي اللي هو عايزها ... وأنا مش فاهمه حاجه ... وبينت إني فاهمه يقصد إيه ... أمال أطلع جاهله .... و هو الإبتسامه مرسومه علي وشه شبرين .... و أنا أقول شفت فين الخلقه دي .... ومستغربه من التناكه اللي هو فيها .... ده إنت حتي عايز شفرات لورد..... المهم مشي .... وكل يوم طول الإسبوع اللي فات ينطلي... يسأل عن الشفرات .... يا صباح الهرتله والتهيييس .... هو مفيش صيدليه غيرنا .... وأخيرا بدأت أفتكر مين هذا الشخص .... و إسترجعت شريط ذكريات زي الهباب .... وهو إن الواد ده ساكن جنبنا و ما أقلكوش ... صااااااااااااااايع قليله عليه .... وكان مره إتخانق مع أخويا الصغير اللي هو من سنه خناقه كبيره ... المهم إنه كل يوم ييجي .... فأنا بقول للدكتوره إنتي ليه ما طلبتيش الشفرات للواد ده علشان أستريح منه .... قالتلي يا دكتوره هو مش عايز شفرات .... ده بيدور علي عروسه صيدلانيه .... قلت في عقلي ... يا خرابي .... حتي أنت طمعان تعمل المشروع ... وتقعد جنبه ... صباح الهرتله والتهييس ... صاحبتكوا عايزها كوبري للصيدليه ... صباح الهرتله والتهييس .... عايز يتجوز واحده أكبر منه ومش فارق معاه أي حاجه .... كل اللي يهمه الصيدليه ...

صباح الهرتله والتهييس اللي بقي عند الشباب

يا خساااااااااااااااااااااااااااااااااااااره

دخلت المدونه النهارده ..... سمعت حاجه غريبه أوي أوي أوي ..هتقولي أغنية عمرو مصطفي "لمستك"..طيب ودي فيها إيه ؟؟........ إنتي شكلك كده ... ولا بلاش.. لا تزعلي مني... يا عم خليك معايا... ركز معايا ... أنا مش مجنونه علي فكره.... هقولك سمعت إيه وإنت تحكم.... سمعت ... سمعت... سمعــــــــــــــــــــــــــــــــــت ...خير اللهم اجعله خير... صوت زغاريت... من نوع لووووولوووووووولوووووووووووي.... أه ... صدقني... ليه مش عايز تصدقني ... شكلك كده هتقول المدونه دي مسكونه عفاريت..و صاحبتها ترللي ولاسعه.... وناوي ما تدخلش المدونه دي تاني.... يا إبني ما تتسرعش إسمع للآخر.... مش إحنا متفقين إنك هتديني ودنك.... صدقني مش هقول توووووووووووووووووووووت.... وأخرمهالك علي الفاضي.... هقول توووووووووووووووت ... بس براحه ... ما علينا خلينا في الزغاريت اللي ملأت المدونه ..... إيه بدأت تسمعها.... شكلك كده بدأت تسمعها.... طيب يا بنت أو يا ولد ياللي في المدونه اللي جانبي سامعين..... شكلكوا كده سمعتوا.... صوتها عالي أوي... أوي ... أوي.... صاحبتكوا اللي هي أنا إتخضت.... وقلت يمكن بوست شم النسيم بزغاريته أثر علي عقل المدونه و إترجمت الزغاريت المكتوبه إلي زغاريت مسموعه..... و أنا هغلب نفسي ليه ..... أنا هسأل المدونه بتزغرتي ليه يا مدونتي العزيزه .... إوعي تقول البت رحاب إتهبلت .... أنا مش قايله قبل كده إني بحب المدونه.... أيوه يا سيدي بكلمها وبترد عليا..... شكلك كده هتقول المجنونه أهي..... الله يسامحك لو كنت قلتها ... ويسامحك برده لو عقلك بيقولك قولها..... نرجع لمرجوعنا .... كنت بقول إيه.... توهتني يا شيخ .... أأأأأأأأأأأأه... كنت هقولك أنا قلت إيه للمدونه وأنا بسألها عن الزغاريت

أنا : إنتي إتهبلتي يا مدونتي... يا حبيبتي ... إهئ إهئ إهئ... ولا تكونيش فرحانه علشان طلعت أينشتين... ولا تكونيش متوقعه إني هتجوز قريب مثلا .... فقلتي تفرحي من قبلها

المدونه: ههههههههههههههههه....و هي دي حاجه تفرحني يا بنتي

أنا : إخص عليكي.... بقي ما تفرحليش أنا.... أمال مين اللي فرحانه له أوي كده وهاتك يا زغاريت.. في حد مهم عندك أهم مني

المدونه الندله الزباله : طبعا يا رحاب... في .... إنتي مش عايشه في الدنيا .... ما عرفتيش إن جمال كتب كتابه علي ديجه يوم السبت اللي فات والفرح يوم 4 مايو... و طبعا دول مش فرح واحد .... دول إتنين.... لأنه نفس يوم عيد ميلاد الريس التسعه وسبعين .... طويل العمر يطول عمره يزهزه عصره ....هاهي

أنا: حتي إنتي يا مدونتي إتعلمتي النفاق وهتهيصي في الهيصه... إنتي مش مضايقه من اللي بيحصل في الناس... اللي بيتجوز ده ولي العهد .... فرحانه أوي كده ليه.... ربنا يتم له بخير... بس يحل عننا

المدونه المنافقه: بصي يا أختي ..إنتي مش عايشه في الدنيا...ما هو علشان هو ولي العهد و علشان هو عمره ما هيحل عننا لازم أعمل كده...ده نظيف بعت برقيه للريس النهارده يهنيه بعيد ميلاده وبيتمني له عمر مديد وهو بيحمي مصالح محدودي الدخل... وأنا أنضف منه وبدأت الزغاريت من بدري ... أه ... مفيش حد أحسن من حد

أنا بإنكسار شديد : يا خساره ... حتي إنتي كمان

المدونه اللي واضح إنها بقت واقعيه : كده كده مش طايلين حاجه .... يمكن لو هيصت أطول حاجه

أنا بسخريه: وإنتي هطولي إيه يا مدونه يا حقيره

المدونه الزباله: أصلي إنتي فقر.... وأنا عايزه أبقي مشهوره ومهمه.... لازم أهلل... علشان أوصل... وأبقي في مواقع الصف الأول... يمكن أعجبهم ويعملوني موقع لأمانة السياسات... وأترقي مع جيمي وأبقي موقع لرئاسة مملكة مبارك العربيه... بصي أنا عندي طموح سياسي... و إنتي معطلاني بشعاراتك الفارغه

أنا: يا خساره... أنا كنت عملاكي علشان تبقي صوتي.... وفي الآخر تقلبي عليا

هي : هاتي ودنك ................. توووووووووووووووووووووووووووووووووووت

لو مش مصدق إن ده حصل..... هات ودنك... ما تجيب .......... تووووووووووووووووووووووووووووووووووت

جانا التاج.... أهو جانا التاج

جالي تاج من

shayma ((heart, mind and soul))

http://shayma-m.blogspot.com

أول تاج في حياتي التدوينيه القصيره

أنا شبهه مين من المشاهير؟؟؟؟؟؟؟؟؟؟؟؟

What Famous Leader Are You?
personality tests by similarminds.com

يا خبر!!!!!!!!!!!!!!...... طلعت أينشتين ..... وأنا مش حاسه..... أينشتين يا ولاد

إيه أكتر فيلم كلاسيكي بيعبر عني

What Classic Movie Are You? personality tests by similarminds.com

الفيلم ده أول مره أسمع عنه...... بس أكيد حلوونكد وأكشن ودراما ولا إيه

أحب أمرر التاج لميييييييييييييييييييييييين؟؟؟؟؟؟

لأي حد عايز يجرب حظه ويعرف هو شبهه ميييييييييييييييييييييييييين؟؟؟؟

بحبك يا مدونه

خنقه وضيقه .... وأحاسيس كتير ملخبطه كتير مسيطره عليا....هبدأ شغل جديد في صيدليه... وكعادتي حاسه إني مش هكمل.... التعامل مع أصحاب الصيدليات بيجيب حالة قرف... كلهم زي بعض... قبلت فقط من باب إني لازم أشتغل... أنا مش بحب مهنتي للأسف...... مش بحس بنفسي فيها... أنا من النوع اللي مش بقدر أتظاهر بعكس ما بداخلي... وفي مهنة الصيدلي لازم تتعامل مع كل نوعيات البشر... تستوعبهم... تتحمل كلامهم الممل أحيانا... لأ مش أحيانا... ده علي طول... مطلوب مني أضحك في وشه حتي لو إنسان خنيق وممل... مطلوب مني أسمع شكوي الستات الفاضيين... اللي تيجيي تقولي أنهو أحلي شامبو بانتين ولا صانسلك؟؟؟... و أنا ممكن أكون ما إستعملتش الإتنين!!!.. بس تقول إيه في ستات رخمه ورجاله رزله الراجل منهم يبقي عارف الدوا ده بتاع إيه وبياخده من قرن وقال بيختبرك ويتفذلك ويسألك هو الدوا ده مضاد حيوي... وهو دوا الضغط بتاعه... لو قعدت أعد سخافات الناس مش هخلص... مطلوب مني أجامل البنات وأتكلم معاهم... حتي لو كلامهم بايخ وتافهه... مشكلتي إني بمل بسرعه جدا... وفي ناس بتبقي داخله متخيله إنك مفروض تقعد تسمعه .... و طبعا لا تظهر ضيق من كلامه... ببقي هاين عليا أقوم أضربه ...... صدقوني لو إنسان مريض عمري ما هحس بالأحاسيس دي.... بس الناس بقي عندها حاله كده من فرض النفس بطريقه مستفزه... كلام كلام كلام... يفضل يرغي في أشياء لا يستهوني الكلام فيها... ومطلوب من رحاب إنها تسمع وتتأثر وتبين تأثرها حين تحكي أحدهم عن رحلتها في محاولات تبييض بشرتها .... وتضحك رحاب حين يحكي أحدهم حاجه سخيفه تضحكه......و تلك ليست طبيعتي.... أنا في الفتره الأخيره أصلا زاد موضوع مللي السريع... إخترت أن تكون رحاب داخل رحاب..... أراحني هذا الإختيار.... يزعجني التداخل... يزعجني الكلام وكثرة السؤال... وهذا أكثر أسباب لجؤئي للتدوين .... أحببت مدونتي .... أري فيها روحي ونفسي .... أتنفس حين يدخلها أحد يشاركني التنفس.... لا أري فيها الشكل المزعج في التعاملات الخارجيه للبشر.... أقول ما أشعر به دون خجل... أري أناس جدد... تمنيت لو القدر جمعني بتلك العقول .....لا أحب النفاق.... وأشعر أن هذا ما تحتاجه مهنتي حتي أصبح إنسانه ناجحه في هذه المهنه..... حاسه إن البوست ده ملخبط.... بس يمكن علشان بيعبر عن اللخبطه اللي جوايا... بحبك يا مدونه... أشعر بالراحه وأنا أكتب علي الكيبورد كل ما يجول في نفسي دون تجميل الذي أضطر أن ألجأ إليه في صخب الحياه..... مش عارفه العيب فيا إني مش بقدر أجاري الناس المختلفين عني تماما.... لا أستطيع أن أتواصل مع من لا أجد بيني وبينه مساحه من الإتفاق ولو حتي 1%... لا أستطيع أن أظهر شئ وأنا عقلي في شئ آخر....هذا ما أعاني منه علي أرض الواقع

و أخيرا ... عايزه أقولك سر يا مدونتي.. بس إوعي تقوليه لحد ... و هو

إني بحبك يا مدونه
يا اللي أنا إنتي ... وإنتي أنا

مسلسل شم النسيم

تتر البدايه
المصريين أهمه............حيويه وعزم وهمه **********************************************

المشهد الأول : في فيلا في المنصوريه

الواد : صباح الخير يا مان

أمه : مان !!!..... مان إيه يا قليل الأدب يا سوفاج.... بطل الكلام بتاعك ده يا ولد

الواد : خلاص يا مامي ... ذاتس فور فن .... هتروحي فين إنتي وداد في شم النسيم ؟

أمه : أبوك ...هو فين أبوك ؟؟!!... أبوك سايبني ومشغول في البيزنيس بتاعه ... وأنا هروح مارينا مع سوسو صاحبتي

الواد : أبوك... إيه أبوك دي يا ماما ... ده إنتي بقيتي بيئه طحن

أمه : بس يا ولد يا قليل الأدب .... هتيجي معايا ... ولا زي أبوك مش فاضيلي ؟؟

الواد : لأ يا ماما أصل مارينا بقت بيئه مووووووووت...أنا هروح شرم مع أصحابي ... ماشي يا جميل... شغااااال كيك... موبايلات بقي

************************************************************************

المشهد التاني : في شقه 200 متر في أي حته

الراجل : جيبتي الفسيخ يا أم أحمد

مراته : لسه... إيدك علي ميت جنيه

الراجل : ميت جنيه لييييييييييييييييه؟؟؟!!!... وطي يا واد الزفت اللي عمال تسمعه ده !!!... خليني أعرف أكلم أمك

مراته : إنت مش عايش في الدنيا....ده كيلو الفسيخ بأربعين جنيه ...هجيب إتنين كيلو ده غير كيلو رنجه وكيلو سردين ... ده غير البصل والذي منه

الراجل : أربعين جنيه!!!!!!!!..وليه ده كله... ده حتي ريحته ما تديش سعره ... وبعدين هتجيبي الكميات دي كلها ليه ؟؟؟... هتأكلي الشارع كله ولا إيه؟؟؟!!!...يا واد قلتلك حول الزفت اللي بتسمعه في التلفزيون ده ولا إستني كده...مين اللي بتغني دي يا واد ؟؟؟؟

الواد : دي روبي يا بابا

الست : إنت في اللي بتغني ولا في إيه ؟؟!!... إنت ناسي إن أختك وجوزها وأختي وجوزها وولادهم هييجوا يتغدوا معانا

الراجل : ومين اللي كان عزمهم إن شاء الله ؟؟!!!!...يا واد هي مش روبي دي بتاعة العجله... إيه اللي حصلها ؟؟؟؟؟

الواد : ما خلاص يا بابا... إعتزلت ركوب العجل وبقت الست روبي

الست : والله إنت راجل تافهه... قاعد تتكلم مع الواد في حاجات تافهه.... هات يا واد الريموت لما نجيب قناة الناس

الشيخ في قناة الناس: الإحتفال بشم النسيم حرام

الراجل : سامعه أهو بيقولك حرااااااااااااااااااااام... مفيش فلوس... بلا فسيخ بلا زفت... جت من عندك يا رب


***********************************************************************

المشهد التالت : في شقه100 متر أو أصغر في حي شعبي

((من بعيد صوت أغنية الدنيا خربانه للمطرب الشعبي اللي ما أعرفش إسمه ... ومعها صوت أغنية العنب ))

الراجل : إيه الريحه الزفت دي يا وليه

الست : زفت لما يبقي يلطشك دي ريحة السردين علشان شم النسيم يا راجل

بنتهم : بابا...هتوديشنا فين في شم النسيم

الراجل : إيه رأيكوا نروح جنينة الحوانات

الست : يا راجل...هو كل مره جنينة الحوانات ... غير ...نروح الحديشقه الدوليه ولا القناطشر الخيريه

البت : أه ... نروح القناطشر....وناخد مركب في النيل... حلوه الفكره دي يا مامتشي

الست : إنتي أحلي يا حبيبتشي....و هناخد الترمس فيه الشاي ...والكور... والحبل ... خلي العيال تفرح... لما أقوم أقول لأم ممدوشح ....علشان يجهزوا ويروحوا معانا

***************************************************************************

المشهد الرابع : عشه في العشوائيات

((في راديو صغير شغاله أغنية ما تقولش إيه إدتنا مصر))

الست وهي علي تشت الغسيل : إطفي يا واد المحروق الراديو ده ... والنبي لو الحوجاره خلصت ما أنا جيبالك واحده جديده

الواد : إنتي هتذلينا بأم البتاع الترانزستور بتاعك ده ....إنتي ما سمعتيش عن التلفزيون والراديو أبو كهربا... وديني لأكسرهولك

الست : يا لهوووووووووووووووووووووووووووووووووي...((قامت عالواد بالشبشب)) ... هي إيه بصحيح

الكهربا دي يا واد.....يا لهووووووووووووووووووووووووووووووووي

الجيران : يا لهوووووووووووووووووووووووووووووووووووووووووي ...في إيه يا أم شحته

الواد : بلا نيله....أنا سيبهالك مخضره.... أنا خارج أقعد في مقلب الزباله اللي ورانا شويه

الست : بعد إما كسرت الراديو....يا لهوووووووووووووووووووووووووووووووي

وأثناء الصريخ ينطلق صوت الراديو

(( ويأتي صوت سعاد حسني(( الدنيا ربيع ... والجو بديع

الست : لولولولولولولولوييييييييييييييييييييييييييييييييييييييييييييييييييييييييييييييييييييييييي

جاراتها :خير يا أم شحته ؟؟؟

الست : عقبال عندك يا أم شربات ...الراديو نطق وبيقول الدنيا ربيع

جارتها : لولولولولوييييييييييييي ...لولولولولييييييييييييي

الجيران : لللللللللللللللللللللللللللللللللللللللللللللللللللووووووووووووولولولولولوييييييييييييييييييييييي

يللللللللللللللللللللللللللللولولولولولولولولولولولولوييييييييييييييييييييييييييييييييييييييييييييييي

**************************************************************

تتر النهايه

الدنيا ربيع والجو بديع ....قفلي علي كل المواضيع.....قفل قفل قفل

**************************************************************************

كل شم فسيخ وإنتو بخير

من واحده بتكرهه ريحة الفسيخ إسمها رحاب

عدوته صادقه في كدبة إبريل

في فترة الأجازات اللي فاتت دي سافرت .... رحت أشوف أهلي وأقضي معاهم يوم... الواحد بيفرح أوي لما يكون كل أهله متجمعين ... كبار وصغيرين في بيت جدي... بحس إن لسه الدنيا فيها خير...المهم ..ما علينا ...لما رجعت وفتحت المدونه قلت أشوف في تعليقات عالبوست الأخير ولا إيه النظام... و لقيت ردود... وأثناء قرائتي للردود لقيت آخر رد من مجدي المغربي ..... هتقولوا ودي فيها إيه يعني ؟؟؟... أنا قعدت أفرك عيني ... يمكن أكون قريت الإسم غلط ولا حاجه ... ولا يمكن حد عامل في مقلب ... وهيطلعلي لسانه في الآخر ويقولي ضحكت عليكي ... دي كانت كدبة إبريل.... بس إتأكدت لما قريت الكلام اللي في التعليق إنه فعلا مجدي المغربي.... ولقيت نفسي مبسوطه أوي وفرحانه....هتقولوا إيه الهبل اللي إنتي فيه ده؟؟؟ مين يعني اللي لما علق علي البوست فرحتي أوي كده؟؟؟...هقولوكوا هو قال إيه وبعدين أقلكوا هو مييييييييين؟؟؟...
نص تعليقه
البت دي أنا عارفها كويس جدا جدا جدا ....لأن أنا اللي مولدها علي إيديه دول ,وكبرت علي إيدي وأول ما تعلمت الكلام و بقت تمشي كانت كل ما تشوفني تجري وتتحدف علي وتقول إرفعني فوق ...وبعد ما أرفعها عدة مرات وتقطع نفسي ...تجلس في حجري وتقولي قول عدوته ((تقصد حدوته))...ولو إني لا أذكر أي عدوته من تلك التي كنت أقصها عليها ولكن والله أعلم كانت عواديت أقصد حواديت سياسيه ...لكن لما كبرت واتخرجت من كلية الصيدله إكتشفت إن كل العواديت معششه في دماغها ... وكل ما كانت لا تدركه من عواديتي نبشت عليه وأعادت الإستماع إليه ...وأدركت كثير من المعاني التي أثقلت جوانحي , بعيد عنكم عيله غاويه نكد وسياسه...و علي فكره إبقي فكريني يا بت أقولك حدوته أو عدوته لانج.....سلام يا هاط....ولا بلاش
الإنسان الجميل ده خالي.... فخوره جدا إن لي خال شكل في وجداني الكثير والكثير... جميل أن يكون رفيق لأي ذكري من الطفوله ...أول حد شافك في الدنيا كلها لأنه هو من ولد أمي...أول حد برده ضربك علشان تعيط وتبدأ تتنفس ... ولو الطفل بينزل من بطن أمه بيشوف يبقي أول حد عينك وقعت عليه في الدنيا كلها....أول رفعه لفوق للسقف تخض قلبك وكل لما تشوف طفل بيترفعها تحلم إنك ترجع صغير علشان حد يرفعك تاني فاكرين إحساس الخضه الممزوجه بفرحه ورغبه في التكرار ....أول أغنيه حفظتها في طفولتي وهي دبدوبه التخينه... أول مره تشوف الأهرام وإنت صغير وأول مره تروح الملاهي والقلعه والمتاحف ...أول حواديت أو عواديت سمعتها وداني وفضلت في عقلي ودخلت وجداني..أول حد يضحكك من قلبك وإنت بتلعب معاه... أول كل حاجه حلوه في حياتك...أول ... أول...أول... دائما ما يكون الشئ الأول مختلف... قد يتكرر ويتكرر ولكن تبقي فرحة المره الأولي محتفظه برونقها وبهائها وجمالها ... زي مثلا أول مره تحب وقلبك يدق... حتي لو كنت صغير وعبيط... بس بتفضل فاكرها ومعلمه جواك أكتر من أي مره بعد كده...خالي مجدي كانت له اللمسات الأولي في حياتي وأنا طفله صغيره ...إرتبط وجوده معي بأول كل شئ جميل باللعب والمرح والحواديت... أنا بالصدفه قلت أمامه إني عملت مدونه وما توقعتش إنه يكون برده أول حد من أهلي يحفظ إسم المدونه ويدخل عليها و يعلق ....سلامي ليك يا خالي يا أول من عرفت معه جمال الطفوله

مشاعر صادقه جدا شعرت بها أوي وأنا بقرأ كلامه وأيضا وأنا بكتب عنه في البوست ده ....وتعجبت إن إحنا في شهر
الكدب
شهر إبريل ...معقوله ؟؟؟ طيب ما في حاجات صادقه أوي أهو في شهر الكدب.. وبما إني جبت سيرة كدبة إبريل.... عايزه أسألكم حد يعرف ليه كدبة إبريل بالذات... يعني مثلا ليه مش كدبة أي شهر تاني... لها سبب تاريخي مثلا... أنا بتخيل إن في زعيم وعد شعبه بحاجه و كالعاده إداهم بومبه و كان الوعد ده في شهر إبريل ... أو مثلا في قصة حب كانت مشهوره وبعدين واحد من الطرفين طلع زباله وإدي التاني بومبه وفرقعه.. بعد ما كان وعده إنهم هيتجوزوا في شهر إبريل... وعندي تخيل تالت وهو إن في زمن جه والناس كانت صادقه فيه زياده قاموا قرروا يعملوا شهر يكدبوا فيه ... كنوع من الترفيهه... اصل ساعات كتر الصدق بيخنق... يعني فور فان...أو ممكن برده يكون في زمن كتر فيه الكدب أوي ومش عارفيين يخلوا الناس تبطل كدب فإتفقوا إنهم يحاولوا يبطلوا ... وقرروا يكدبوا شهر واحد بس وهو شهر إبريل... أما إختيار شهر إبريل بالذات فده برده له تفسير((كل حاجه النهارده عندي لها تفسير))... ألا وهو إن القرار ده طلع في آخر مارس فالناس قالت خلاص هنكدب شهر كمااااااااااان ... وبعد كده نبطل... وأظن إنهم مبطلوش.... وفضلوا يكدبوا أكتر... فأصبح شهر إبريل هو نفسه كدبه كبيره ...لأنهم خدعوا أنفسهم... ووهموا نفسهم إنهم هيبطلوا شئ موجود فيهم... جزء منهم.... ألا وهو الكذب....آه الكذب موجود فينا كلنا.... جزء من تركيب العنصر البشري ...موجود في الحمض النووي بتاعه الدي إن إيه .... جزء يصعب فصله من النفس البشريه.... إختلفت أسماؤه و أنواعه فهناك مثلا الفشر والمعر والنتش والكدب الأبيض والكدب الكاروه....و بمناسبة شهر إبريل ((شهر الكدب)) عايزه كل اللي يعلق عالموضوع يكتب شوية كلام كدب نفسي أسمع شوية كدب.... أصلي خلاص... مش لاقيه في زماننا ده غير الصدق... كل لما أمشي في حته بتكعبل فيه ... وزهقت وعايزه نيولوك ...أووووووووووف زهقت من السدك والسادكين اللي حوليا .... عايزه أغير....ممكن تسمعوني شوية فشر أو معر أو نتش ...بليز
أنا هبدأ بنفسي وأسمعكوا شوية سدك يجننوا ..أصلي ما أقدرش أكدب..أحدث سدك في أبريل 2007
*الحب إنتشر ..... وكتروا الأحبااااااااااااااااااااب
*واو ...الفقر إختفي وبقي مجرد سرااااااااااااااااااااااااب
*الشعب بياكل كل يوم كباااااااااااااااااااب
*و بيوصلهم العيش من غير عذااااااااااااااااااااااااب
*خلاص راح الإكتئااااااااااااااااااااااااااب
*مفيش مكان في بلادنا لمنافق أو كداااااااااااااااااااااااب

إلي لقاء وكل كدبة إبريل وإنتو سادكين وطيبين

مفيش فايده ....أريد حلا

أنا ((وأعوذ بالله من كلمة أنا))... واقعه في حيره مالهاش حدود ...أصلي مش عايزه أكتب في السياسه...جالي تشبع سياسي و إحتمال يكون عندي إنفلوانزا سياسيه... خصوصا بعد التعديلات الدستوريه ...والأخبار اللي جايه من السعوديه عن القمه العربيه.....ييييييييه....برده إتكلمت في السياسه... مش بقولوكوا جاتلي إنفلوانزا سياسيه...و تقريبا أعراضها كلها ظاهره عليا...و هي إني مش قادره أبطل أسمع نشرات إخباريه... أو أشتري جرايد الدستور وصوت الأمه والإسبوع الإسبوعيه...و أعدي بالريموت علي قناة الجزيره وشقيقتها العربيه.....و مصره أهتم بالأحداث اللي حوليا... و لما أدخل عالنت أقرا المصري اليوم والصحف القوميه....ده غير .....ييييييييييييييه برده بتكلم في السياسه... الأعراض واضح إنها زادت عليا....حاولت أدور في الصيدليه ....علي أقراص تخليني أبطل العادات ديه....بس للأسف مش لاقيه... مش عارفه أشتري دماغي وأبطل...مش عارفه يبقي عندي لامبالاه سياسيه.... يووووووووووووه...أنا مش عايزه أتكلم في السياسه... فعلا عايزه أبعد شويه.... خلاص هبدأ في حكايه تانيه...النهارده كان عندنا في البيت الواحده اللي بتساعد ماما ((كما تحب أمي تسميتها...فأمي لا تفضل كلمة خادمه ...تقريبا عندها المبادئ الإشتراكيه .. مش دي اللي إتلغت في التعديلات الدستوريه)).... يووووووووووووووووووووه...سياسه تاني....ما علينا... كعادتي في نكش الناس((ودي عاده تانيه...عايزه أبطلها))...سألتها قولتلها روحتي الإستفتاء ((برده سياسه...خدو بالكوا المرض خطييييييييييير)).... قالتلي إيه ..يعني إيه؟؟؟؟؟؟؟!!!!!! وبصتلي كأني بتكلم لاوندي...قولتلها حاجه كده الناس بتروح زي الإنتخابات وبيقولوا فيها نعم ولا لأ.... قالتلي هيدوني فلوس يعني وياخدوا صوتي ؟؟؟!!!!!.... قولتلها توافقي؟!!!!..... قالتلي طبعا ودي عايزه كلام ..طيب يا ريت يجيي واحد ويقولي هاتي صوتك ويديني خمسين جنيه... قولتلها توافقي بخمسين جنيه... قالتي يا سلام آه طبعا أوافق..... إلي هنا أنهيت نكشي البعيد عن السياسه خالص ليها..... يووووووووووووووووه.... برده إتكلمت معاها في السياسه......بس قعدت بعديها... ونفسي ما أفكرش فيها.... اللي هي البعيده السياسه...يجعل كلامنا خفيف عليها... تقريبا راكبني جني بيها... لقيت نفسي بقول... ده شعب يستاهل .... يا تري يستاهل ولا هو شعب غلبان... مش عارفه إحترت أكتر من حيرتي في المرض اللي عندي.... و بقت حيرتي حيرتين في مرضي و في الشعب المصري .... اللي شوفته علي الفضائيات ((اللي نفسي أبطل فرجه عليها))... شكلهم يفضح وهم رايحيين الإستفتاء وبتوع الجزيره والعربيه والقاهره اليوم نقوا شوية ناس !!!!!!!!!!... ولما سألوهم جايين ليه.... كانت الردود فضيحه.... و طبعا معظمهم ستات ما بتفكش الخط و كانت الإجابات كالتالي ....أنا جايه علشان قالولي ده هيبقي كويس للتموين.... والله سمعتها بوداني... لو مش كده مش هصدق... واللي تقولك مش عارفه !!!... هم قالولي روحي ...و تخيلوا إنتو باقي الإجابات.... فضايح.... والله كانت فضايح علي الفضائيات..و الفضيحه الكبري كانت في النتيجه النهائيه...اللي الشعب قال فيها كلمته بحريه... و السته وسبعين في الميه ...اللي قالوا نعم للتعديلات الدستوريه......برده إتكلمت في السياسه .....داء واللي فيه داء بقي.... محدش عنده أقراص لامبالاه...أو حتي حاجه من الطب البديل بتاع عادل عبد العال اللي النائب العام منعه بعدما صال وجال في الفضائيات علي كيفه وبراحته...أي حاجه يا ناس... أختكوا مريضه... سامحوني... بس الناس إستفزوني..و رغم إني كنت ناويه في البوست ده ما أجيبش سيرة البعيده... ((مش هقول إسمها... يمكن أخف منها)).. بس واضح إن علي رأي سعد زغلول لما قال ......مفيش فايده...............أريد حلا

الدعوه عامه..... وهتبقي لمه

دعوه لكل المصريين
حبايبي الحلوين المقطقطين
الطعمين الكبار العاقلين
إفهموا وما تبقوش متخلفين
بابا بتاعكم يا وحشين
عازمكم يوم الإتنين
علي إيه يا منيلين
علي إستفتاء بتاع الناس العصريين
مش زيكو يا متقندلين
إستفتاء إيه يا أبو الناس المطحونين
هقولوكم... هو إنتو علي طول كده مستعجلين
معلش يا بابا بقالنا 25سنه مستنين
بطلوا سربعه يا متسربعين
ما هو ده اللي مخليكوا مش كويسين
إستفتاء عالماده تمانيه وتمنين
ودي هتضمن نجاح كل المزورين
الله..هيه...قول كمان يا بابا...سامعين
و عالماده ميه تسعه وسبعين
و بتاعة إيه دي ؟؟ مش فاهمين
دي بتاعة الناس اللي نشك إنهم معارضين أو إرهابيين
هنتصنت عليهم وندخل بيوتهم وهم مش حاسين
و إحتمال ندخلها متخفيين
و ظباط الشرطه يدوهم بالجذمه وهم ساكتين
معلش يا بابا إحنا عارفين إن إحنا رخمين
بس هي إيه الجذمه دي علشان مش عارفين
الجذمه دي اللي هتتحط علي دماغكوا يا معفنين
هيه هيه...هيه هيه... كاب يعني يا بابا ... بجد متشكرين
قولوا بس أي حاجه إطلبوا لو عايزين
ميرسي يا بابا ... يا نصير الغلبانين
ده في تعديل علي مواد كتير تانيين
يجيلهم أربعه وتلاتين
طيب والماده سبعه وسبعين
مين اللي بيتكلم ؟؟؟.... أكيد من الإخوان أو المعارضين
الحاقدين اللي مش عايزني ألزق في الكرسي سنين وسنين
طبقوا عليه الماده ميه تسعه وسبعين
إيه رأيكوا يا مصريين
مبسوطين يا زباله وفرحانين
و هنرقص كمان يا بابا زي النواب الوطنيين
هيه هيه هيه هيه هيه هيه.... من كتر الفرحه مش مصدقين
و خلاص هنقع ميتين
هيه هيه هيه هيه هيه هيه

وسيظل المصريين مهللين فرحين مرددين """ يا ولاد بلادنا يوم الإتنين..... هننضف ونبقي مستحميين.... والدعوه عامه وهتبقي لمه .... وهيبقي لينا في البيت وريث"""
حتي يأتي يوم الإثنين.... الذي سيذكره المؤرخين .....أنه يوم ميلاد المصريين

رحاب ..... واحده من المهللين

نعم......لم نلتقي

إلتقينا .... لا لم نلتقي ..... تقابلنا ..... لا لم نتقابل ..... رأيتها ..... لا لم أراها ..... كنا يوما ما روحا واحده في جسدين ... صحيح أنهما جسدان صغيران بوجوه تحمل براءة العالم بوجوه الطفوله... التي كانت تملأنا حيويه وإنطلاق ورغبه مستمره في الشغب واللعب المتواصل ..... صحيح أننا كنا لا نفترق و كنا نخاصم فلان سويا ونصالحه سويا .... أخاصم فلان فقط لأنها خاصمته و هي تصالح فلان لأني فقط صالحته ..... لم أتذكر يوما عدنا من المدرسه ونحن متشاجران ...كنا نتشاجر كثيرا ولكن نعود كما كنا دون أن نتذكر ما هو سبب الشجار ...كل منا كانت تحمل أسرار الأخري .. تلك الأسرار التي نراها حين نكبر أنها كانت ساذجه جدا ...أن تحب هي فلان زميلنا في الفصل ....و أنا سعيده لأنها لم تقل لأحد غيري ...سعيده بتلك الثقه التي منحتني إياها ... وكيف إني سأصون هذا السر عن أقرب الناس لي كأمي مثلا.. ذكريات طفوله كثيره حملها قلبي وتذكرها عقلي حين رأيتها .... تفرقنا ... نعم تفرقنا ... فرقتنا الأيام اللعينه التي تجعل من صديق اليوم ذكري الغد... وصديق الأمس ذكري اليوم .... رأيتها تقف أمامي لأتأمل كيف تغير شكلها فوجدتها أصبحت بدينه من الممكن لأنها حامل... تغير شكل أنفها ... تغيرت نظرة عينها .... و سألت نفسي هل ياتري هي الأخري تراني تغيرت .... بالطبع تغيرت ولكني أري نفسي في المرآه كل يوم وبالتالي لا ألمس هذا التغير بشكل ملحوظ .... و سألت نفسي هل لو إنقطعت عن المرآه التي لا أكف النظر فيها ليل نهار لعام أو لعامين.... هل سألاحظ التغيرات التي طرأت علي؟؟؟؟ .... لماذا أتوقع ألا يتغير شكلها ؟؟؟؟!!!... بالتأكيد سيتغير .... لقد مر علي آخر لقاء بيننا حوالي 14 عام ....14 عام بأحزانهم وأفراحهم .... سنوات ليست بالقليله حتي أتوقع أن أراها الطفله الصغيره بنفس الملامح والجسد النحيل ...... هي الآن زوجه وستصير أم بعد عدة أشهر .... من الممكن أن عقلي لم يستوعب هذا التغيير لأن صورها لدي هي صور تلك الطفله....التي تقف في حفلات المدرسه الإبتدائيه .... تعجبت من عقلي الذي توقف عند التغيير في الشكل مع إنه شئ طبيعي جدا .... فأنا أيضا لم أعد تلك الطفله بضفائرها المنسدله علي ظهرها فأنا الآن عندي 24 عام .... بالطبع هي أيضا لن تراني كتلك الطفله .... تبادلنا التحيه والسلام .... لم يخطر ببالي كثيرا قبل هذا اليوم كيف سيكون شكل اللقاء بصديق قديم ....و لكن يهيأ لي أن حرارة هذا اللقاء ستكون بمقدار الذكريات التي أحملها لهذا الشخص .... وأيضا بنوعية هذه الذكريات .... أي لو أنها ذكريات جميله وغاليه سيكون بالتأكيد لقاء حار وجميل ينعش تلك الذكريات في القلب ..... أما لو كانت ذكريات مش ظريفه .... فاللقاء سيكون بارد نوعا ما لأنك لم تذكر لهذا الشخص ما يجعلك تستقبله بحفاوه وحراره..... ولكن ..... وأه من كلمة لكن .... في لقائي مع تلك الصديقه العزيزه القديمه ..... لم أشعر بتلك الحراره بداخلي ولم ألمحها في نبرات صوتي .... أقسم بالله أني بحثت عن الحراره وفتشت عنها و لكني لم أجدها ....و نفس الشئ لم أجده لديها .... تصنعت ....نعم تصنعت.... لم أجد بديل غير التمثيل .... وحاولت أن يبدو طبيعيا ....لكني بالطبع لست ممثله بارعه ... وهي أيضا ... حاولت ... وحاولت.... ولكن كل شئ كان ينم أن ما يحدث ليس من القلب .... شعرت بحواجز وحواجز.... منعتني تلك الحواجز من أحتضانها من أعماق قلبي .... من أن أشعر بفرحه من قلبي لأني رأيتها ... وهي التي كنت أحزن لو غبت أو غابت عن المدرسه يوما .... لأني لن أراها في هذا اليوم .... لم أشعر بالسعاده التي كنت أشعرها يوم السبت و أنا أراها بعد الأجازه الإسبوعيه .....سألت نفسي لماذا .... لماذا حين نلتقي بصديق قديم لا نستطيع أن نستعيد نفس السعاده حين كنا نراه ؟؟؟؟.... لماذا لم أشعر بوجود نهال ؟؟؟؟.... لما تلك كل الحواجز التي شعرت بها ؟؟؟؟ و التي جعلت اللقاء رسمي ويفتقد الود؟؟؟؟....هل لأننا إفترقنا لسنوات ؟؟؟؟ هل لأننا تغيرنا ...و لم يعي كل منا ما الذي حدث للآخر في كل تلك السنوات ؟؟؟؟....أسئله كثيره لم أجد لها إجابات شافيه .... و وجدتني أتسائل هل إلتقيت بنهال صديقة الطفوله ؟؟؟؟.... فرددت علي نفسي لا لم نلتقي .... من إلتقي شخصان آخران... شخصان غير نهال ورحاب أصدقاء الطفوله .....نعم لم نلتقي.....

مش فاهم حاجه... هات ودنك

• لا أعرف ما هو السبب الحقيقي الذي دفعني للتدوين من الممكن لأنني أصبحت مدمنه للإنترنت هذا العالم السحري الذي يجعلك في حاله من الإنبهار المستمر.... جايز يكون ده سبب.... ممكن يكون لأني قرأت مدونات كتير و عجبتني الفكره,.... الله أعلم كل شئ برده في زماننا ده جايز .... ولكن هناك سبب أجده الأقوي عندي للتفكير في التدوين .... إحساس بالفراغ الرهيب يسيطر علي و ليس فراغ بالمعني المعروف فأنا والحمد لله أعمل أي لا أعاني من البطاله التي تجعل من الفراغ حبل المشنقه الذي يلتف حول رقبة الإنسان العاطل .... و لكن بالفعل إحساس الفراغ لا يأتي من فراغ الحياه من حولك فقط ولكن أري أن الفراغ المفزع بالنسبه لي هو الفراغ الداخلي .... أن تشعر أن كل من حولك في وادي وأنت في وادي لأن عقلك وقلبك يفكران في شئ آخر .... دائما أعاني أن من حولي لا يشعرون بما يجول في خاطري.... من الممكن لأن طريقتي في التفكير تختلف عن كل من حولي .... حتي أقرب الأصدقاء أشعر أنهم لم يستطيعوا أن يعرفوني كما أنا بداخلي ..... أريد أن أقترب أنا مما يجول داخلي ..... لم أجد أفضل من المدونات لتفريغ طاقة الفراغ الداخلي .... توهتكوا أنا عارفه ..... بس هات ودنك ومش هتخسر .... ممكن أوي تكسب كتير .... يمكن تعرف اللي أنا مش قادره أعرفه أو تفهم اللي أنا مش قادره أفهمه .... و سلام مؤقت