Sunday, May 20, 2007

حل عبقري جدا جدا

قعدوا البنات في البيوت "" .... "" ألاقي شلة بنات واقفه وعمالين يضحكوا وقال شايلين كتب "" .... "" لما سألت يقولوا البنات مستنين ياخدوا الدرس "" ... "" والآخر يقولوا إلحقونا ""... البنت إتجوزت عرفي ... البنت إتنصرت ... البنت حامل ... البنت إتهببت وإغتصبت
علي طريقة الشيخ في فيلم عمارة يعقوبيان لما قال نريدها "" إسلاميه..سلاميه "" ... ردد شيخ مسجد من المساجد السنيه التي يكون روادها غالبا من الملتحيين مقصري الجلباب والمنتقبات...يكون الأمن فيها غالبا أكثر من المصليين أو حاضري الدرس تلك العبارات السابقه في أحد الدروس بهذا المسجد الذي يقع بالقرب من منزلي ... كنت أمر بجوار هذا المسجد أثناء الدرس الذي يكون علي ما أعتقد كل أربعاء ... وصلتني تلك العبارات وأنا أسير في الشارع ... وجذبني للتركيز فرط إنفعال الرجل في الحديث
وجد هذا الشيخ الذي يلقي الدرس الحل لمشاكل مجتمعنا من إغتصاب وتحرش وزواج عرفي و تغيير الدين ... وجد حلا لكل هذه المشاكل ... حل عبقري وهو
"" قعدوا البنات في البيوت ""
أحييه هو وكل رجال الدين علي هذه الحلول العبقريه السابقه لعصرها
هذا الحل العجيب الغريب دفعني لتساؤلات عديده ... هل المرأه هي مصدر كل الشرور في المجتمع ... هل إذا إختفي هذا الكائن "المرأه" الذي يضايق وجوده كثير من شيوخ هذا الزمن ستحل أزمات المسلمين بصفه خاصه والمجتمعات العربيه بصفه عامه... لا أعرف مصدر هذا الحل الفلته العبقري ... ولكني أراه بعيد كل البعد عن الإسلام ... أنا لن أتكلم في الدين لأني لست حجه لهذا ... مع إن زماننا أصبح زمن فتوي لكل مواطن ...كل من هب ودب يحلل ويحرم علي كيفه ... هذا ليس موضوعنا لأنه موضوع شرحه يطول ويطول
لن أخفي عنكم أن كلام هذا الرجل أزعجني وخضني .وما أزعجني أكثر أنه ليس كلام شخص واحد فقط أو حتي مجموعه قليله من الشيوخ... ولكني أري أن تلك النغمه تعلو و تعلو... وبت أسمع تلك العبارات من الكثير من الشيوخ الذي ينصب كلامهم كله عن المرأه ونقاب المرأه .. وأضع مليون خط تحت نقاب المرأه ... وبالمناسبه أنا لست ضد النقاب نهائي ... لأني أري فيه صوره من صور الحريه الشخصيه ... ولكن أنا ضد أن يصبح هو الحلال وما دونه حرام ... و لكن أن يجعل هؤلاء الشيوخ المرأه هي سبب التحرش وسبب الإغتصاب .. وسبب الزواج العرفي وكأن شريكها في كل تلك الأحداث ملاك مسكين تجذبه للقاع تلك الشيطانه ... وبدل من أن يجد هذا الشيخ أو غيره حلولا عمليه من ديننا الحنيف لما يعاني منه مجتمعنا من إنحلال وإنحدار أخلاقي ... وبدل من أن يدل الآباء والأمهات علي طرق لتربية الأبناء ذكور وإناث ... لجأ لحل عبقري وهو "" قعدوا البنات في البيوت "" حل عبقري
ولا إنتوا مش معايا إنه عبقري جدا جدا جدا جدا جدا ....جدا
"" قعدوا البنات في البيوت ""

107 comments:

شادي فايد said...

ايوة طبعا لازم نقعدكم في البيوت
هو انت ليكو لزمة في الدنيا الا كده
مهو ده على اساس ان الراجل مخلف بهيمة مش بني ادمه
يمشيها على كيفة وتفكيره هو
ويحبسها في الزريبة
قصدي البيت
عشان مش يبقى وراها غير التلفزيون
والمسلسلات
والافلام
المليئة بقصص
الحب والرومانسية المستفزة
مهو ده هو اللي مطلع بنات عقلياتها فاضية ومش بتفكر في اي شيء غير في الفارس اللي حيجي يخدها على حصانة الابيض
وبعد كده يخلي حياتها سودة
لانها مش حيبقى ليها لزمة غير انها تطبخ
وتغسل وتمسح وتكنس
وتتفرج على التلفزيون
مهو لو المشكلة في المرأة
يبقى احنا
الرجالة اللي عملنا المشكلة

LOJAIN said...

مقدرش اقول غير حاجة تقرف ومنتهى الاستفزاز و السلبيه و يستغربوا احنا معمول فينا كده ليه؟

اهم قواعد السلفية انهم مستخلفين فى الارض مش مهم امتى دلوقت بعد سنة بعد 100 المهم هم مستخلفين فى الارض
لذلك لا يوجد لهم اى طموح سياسى

الغريب انه الشخص نفسه اللى يقولك اقعدى فى البيت يعنى على الاعدادية و يبقى كرم اننا سبنالك الباب للتحرر ده هو هواه نفسه اللى يقولك لا لما تروحى لدكتور تروحى للطبيبة المسلمة؟؟
يقدر يقولى ازاى هتطلع الطبيبة المسلمة و هى قاعدة فى البيت من 3 اعدادى؟؟
ناس بتناقض نفسها و حث دائم و مستمر على التخلف المقنع المرتدى عباءة الدين واللى اكاد اجزم ان الدين اذا تجسد لكان اول ما نطق به انا برىء منكم و من اقوالكم و ما تثقلون كاهلى به من اتهامات

Regards:
Lojain :)

Aardvark EF-111B said...

باقولك إيه, مش ناقصاكي, يعني طول الإسبوع مواضيع تغم عن المرأه و حال البلد, ممكن تقري التفاصيل عندي

http://myantime.blogspot.com/2007/05/blog-post_18.html

مرارتي مش مستحمله


أما تكية الطشطوشي اللي جمبكم, لو تحبي أبعت عليها 2000 رطل بالليزر و أخليها ضلمه على دماغه

فؤاده said...

طيب ده راجل معتدل
ايه رايك مرةكنت في ندوة عن التحرش بالنساء وجت سيره واحده كانت واقفه في البلكونة وناس عكسوها
قام واحد قال الحل العبقري بتاعه
قالك متقفش في البلكونة

ody911 said...

أولا دى أول زيارة ليا هنا


مش هقول البلوج هايل ولا يجنن

أنا هقول إنى المشكلة مش فى البنات ولا فى الصبيان


أنا هقول المشكلة فى المجتمع ككل

يمكن يكون كلام الشيخ دة بيدى حل للمشكلة مبدأيا

بس مش معنى كدة إنوا هوة الحل الأمثل


بس دة ميمنعش إنى المراة وااااااااااخدة حقها تالت ومتلت

وبعدين مش عاوزين تقعدوا فى البيت


يااااااااااريت

أحنا بقة نفسنا نقعد فى البيت

وانا اول الناس

مش علشان كسلان ومش بحب الشغل

لاء علشان مش لاقى شغل فى بلد بتشغل البنت قبل الولد

يمكن تحسينى متحيز شوية

بس صدقينى أرحم لينا أحنا كشباب قعدة البيت

وإنتوا أشتغلوا وأتجوزونا وأصرفوا علينا بقة


عموما

الأختلاف فى الرأى لا يفسك فى مصر قضية

وعاااااااااادى بقة
أودى

Sharm said...

انتى ترضى انك تقعدي في البيت ؟؟

مصر هى أمى said...

بصى مشكلة مصر فى ان شوية ناس جهلة خدوا كام فرصة انهم يقعدوا على منبر ويفتوا

زى اخر فتوة سمعتها ان لو موظف وموظفة ظروف الشغل بتجبرهم انهم يقعدوا فى غرفة مقفولة لوحدهم

الحل العبقرى
ان الموظفة ديه ترضع الموظف علشان يبقى ابنها فى الرضاعة فمتبقاش خلوة محرمة

شوفتى هبل اكتر من كده طب ما كان يقول ان الموظفة تسيب الشغل اسهل من الحل الغريب ده
والله العظيم البلد ديه ربنا باليها بالحكام والدعاة اللى بيفتوا وخلاص

الشنكوتي الكبير said...

ايوه انتو تقعدوا في البيت وتخدمونا ومتتعلموش وتتجوزوا اي حد ابوكوا يقول عليه واللي هتتعلم تبقى كافره
معلش الدين عمره ما كان بيحمل الذنب على الست لوحدها قالها غطي جسمك واستريه وبرده قال للراجل غض بصرك
قالها كذا قالوا كذا
يعني كل زي بعضوا كانا علينا مسؤليه انما انا مثلا مش قادر اغض بصري عن واحده حلوه في الشارع اقوم اقول كله يخش جوه يا شوية معيز
صحيح في بنات فظيعه لازم الشباب الناصح اللي زينا يعاكسوهم عشان يحرموا يلبسوا كده تاني لكن في بنات محترمه وذكيه (مش قادر اقولها) وساعات اذكى واجدع من الرجاله
وبينفعوا المجمتمع قوي(حلوه المجتمع دي) يعني لو قعدوا في البيت هنخسر طاقه كبيره في مجتمعنا
واعتقد ان حبيبي عمر خالد شرح كتير قد ايه كان دور المرأه في الأسلام
لكن تخيلوا كده لو حبسنا الستات كلهم في جزيره بعيد عن الرجاله وبقى المجتمع كله رجاله يا ترى حال الدنيا هينصلح
انا ساعتها هاهرب على جزيرة الستات واعيش سلطان زماني واتجوز سبعتلاف واحده
يا سلااااااااااااااااااااام ده تبقى عيشه هناء
سلاااااااااااااااااااااااااااااااام

The Alien said...

يقعدوكوا ف البيت
ويلبسوكوا علي مزاجهم
ويأكلوكوا ويشربوكوا اللي هما عايزينه
حقهم
مش هما اللي ف إيدهم السلطة
يبقي يعملوا اللي هما عايزينه

لازم البنات تتحرك وتحارب
متسكتوش علي الكلام دا
متعمليش حاجة إنتي مش مقتنعه بيها
متلبسيش حاجة إنتي مش بتحبيها
علوا صوتكوا ... إشتموا اللي يعاكسكوا
إعملوا أي حاجة عشان إحنا مش عارفين نعمل حاجة

تحياتي

Hannoda said...

عبارة مستفزة جدا

لسة فيه حد في 2007 بيقول .. "قعّدوا البنات في البيت"

أنا معاه إن فيه إنحلال يرعب في بلدنا
بنات أو ولاد.. في تسيب شديد و إباحية و جراءة لدرجه الفظاظة

لكن ايه علاقة خروج البنات من البيت بكل ده؟؟

مش ممكن الناس تكون بالسطحية ده فتفكر في القشور السطحية.. لأ ده حتى مش قشور .. ده أوهام

و الله أنا حزينة على إسلامنا اللي بيتكلّم بلسانه ناس أبعد ما يكون عن الثقافة و المنطق و الحكمة

ناس شايفة إن مرادف الدين.. هو الشّده

الإسلام إتظلم بسبب الناس ده

ليهم حق اللي بيسمعوا اكلام ده يقولوا إننا متخلّفين و بلا عقول

الربان said...

تحياتي...

الموضوع ان الدين أصبح خطب عصماء او محاضرات تلقي من اشخاص غير مؤهلين...و يتلقاها أناس عطشي للدين و لكنهم في نفس الوقت رؤوسهم خاوية...بمعني ان ما يقال في المحاضرة او الدرس لا يخضع للعقل..بل يحفظ عن ظهر قلب... و ليس بمهم ان كان ما يقال خطأ أم صواب.

الحل موجود في ديننا البسيط و السهل التطبيق...
مثلا.. غض البصر، هل هناك أسهل منه، علاج للتحرش ...
كمان مثال : تبسمك في وجه أخيك صدقة، هل هناك أسها من هذا ، علاج للاكتئاب و الضغائن...

يا ريت رجال الدين يركزوا علي سلوك المسلم، و منهاج المسلم في الحياة اليومية، بدون ان يهاجموا أحد او ينتقصوا من قدر أحد...حتي لو كان عاص
لان العاصي يعصي الله و ليس العبد.

هل يتفق ما ذكرته مع ما يسمي تغيير مضمون الخطاب الديني ؟ .

تحياتي و شكري علي الموضوع الذي يفتح الباب لحل مشكلة يومية في حياتنا.

.:.-=- ELGaZaLy-=-.:. said...

اولا الاسلام مظلوم مما يحدث هذا


وانتى جمعتى بدون اى وجة حق لية كدة؟؟

فى شيوخ كثيرة معتدلة بل واكثر من رائعة

بالنسبة لن المراة هيا مصدر كل الشرورو بقى فدة موروث عالمى

عارفة اية اصل كلمة هيستيرا؟؟

رحم ..بالظبط رحم المراة دة موروث عالمى

وبينى وبينك سعات بيكون ليهم حق

بس مش لدرجة القعاد فى اليبيت

اصل لو قعدو فى البيوت هانروح فين؟؟

والنقاب حرية شخصية طبعا

وبوست جميل وتحيز تام ضد الرجل

وهوا ما جعلك تخطئين

الملاح التائه said...

كما قلت ان المجتمع ينحدر اخلاقيا وقد تفرغت النفوس من كل دين فما للعقيدة في نفوس افراد المجتمع وجود
ليس ادعاء جهل بل هو ادعاء شاهد عيان قيل ان أعظم عصور التاريخ هي عصور الإيمان بشئ عظيم
فهل نحن نؤمن بشئ على الإطلاق
كلا
نحن وغيرنا من حاملي الديانات السماويه نتستر خلف الدين نرتدي ردائه وقلوبنا منه فارغه الإيمان ليس بالسهولة التى تتصورونها
هو اجل وأعظم من أن ندعيه لأنفسنا بلا دليل قاطع
ومنه وحده تنبثق الأخلاق كلية ومنه تشرق الحضارة ويبدو التحضر
ليست المرأة وانخراطها فى المجتمع بسبب على الإطلاق إنما السبب هو الإنسان الذي يعيش في هذا المجتمع رجل كان أو إمرأة كلاهما على السواء
فاقد لأهم مقومات الحضارة وبناء الخلق
اتهموا الإنسان دونما تمييز فكلنا متهم
تحياتى سيدتي

KOKKO said...

مش بس عبقري دا هو العبقريه بذات نفسها لازم تكونى فرحانه انك تنولى شرف انك تكونى كرسى من ممتلكات البيه اللى متجوزك
وابقى سلميلى على الجيل الجديد اصله ناقص تخلف

Ahmed taher said...

ايه بس يا رحوبه متعدي يا ستي فيها ايه دي
ده حتي المواصلات تهدا هههههههههههه
وميحصلش فيها مشاكل مكفاية واخدين عربيتين مترو لوحدكوا ههههههههههههههههه
في الحقيقة يا رحوبة نحن دائما ضعفاء نبحث عن السهل دائما لا انكر ان بنات اليومين دول اتغير حالهم كتير سواء من حيث الزي او
اسلوب الحيان ولن اعلق الان حتي لا افرع كما ان البنين ايضا تغير سلوكهم كثيرا
ولاكن ليس ه1ا هو الحل
الحل في كل شخص مؤمن وله عقل وقلب سليمين ان يفكروا جيدا ويهتدوا الي الصواب وان نغير من انفسنا اولا
الحل بايدينا جميعا
يا رحوبة
ولا ايييييييييييييييه
تحياتي

Spyfun said...
This comment has been removed by the author.
Spyfun said...

النساء قتنه للرجال دا كلام الرسول صلي الله عليه وسلم فالشيخ قال بقه نخفي القتنه دي خالص قال يعني حال الرجاله هيتعدل بس ماتنسوش تقعدوا في البيت كمان السجاير و القهاوي و المخدرات والخ الخ
طبعا انا مش معارض شغل و تعليم البنت بس لما تكون زي مالاسلام قال او حتي المسيحيه مش زي المناظر اللي بنشوفها في الشارع و المترو بالاخص بالذات ان معظم الشباب مش عارف يتجوز و مش عنده تدين كفايه علشان يصون نفسه
في الاخر عايز اقول كلمه
البنت مخلوق جميل و من غيره عمرنا ماهنحس بالسعاده بس لما يكونوا بنات بمعني الكلمه

ELHAWARY said...

اللى لاحظته ان ابناءالام المتعلمه بيكون تعليمهم وتفكيرهم افضل بكتير من ابناء الام اللى ماكملتش تعليمها او اللى ماتعلمتش خالص
والاب خارج الموضوع دا خالص
وانا مش هاتكلم واقول السيدة عائشه
ولا اى واحدة من السيدات اللى التاريخ ماليان وفيه الكتير
بس هاسئل سؤال
الواحد يحب يتجوز شغاله ماطلعتش من بيتهم ماتعرفش غيرامبومبه البوتاجازغلصت والواد عاوز لبس جديد
ولا واحدة تديك رائهاوتساعدك فى حياتك
الاختيار مش محتاج تفكير

omas said...

هو موضوع يخنق صراحة فى البلد دى.....و اللى يخنق أكتر أن ده مش تفكير شوية شيوخ ليهم رأى كدة و خلاص...لأ أنا أعتقد أن فى رجال كتيىر جواهم كدة فى أعماقهم يحبوا يكون ليهم اليد العليا و التفكير و الانجاز الأعلى و يدايقهم أو على الأقل يستغربوا أن يكون فى بنت ذكية و ناجحة و لازم يطلعوا فيها المشاكل و العيوب ....خصوصا لو مراته أو أخته ....بيحس بعقد نقص...معرفش ليه.....!!1

احقاقا للحق...أكيد مش كل الرجالة كدة....بس غالبا نسبة كبيرة عندهم نظرة دونية تختلف درجاتها من واحد لتانى...و ممكن يقول لأ معنديش بس ...بس تكون جواه و هو مش حاسس...وتستثار و تظهر فى مواقف جدية....!!!ا

A.SAMIR said...

فكرني الموضوع دة بموضوع كنت ناوي اكتب عليه موضوع وهيحصل ان شاء الله وهو سياسة المنع
بمعنى لما تحصل مشكلة يمنوا الموضوع من اساسه
لو الشارع دة زحمة يمنعوا مرور العربيات فيه
لو واحدة محجبة او منقبة عملت مشكلة في مكان يمنعوا دخول المحجبات المكان دة
لو البنات عاملين مشاكل يمنعوهم ويقعدوهم في البيت
محدش بيحل حاجة وانما سياسة المنع من المنبع
تحياتي ليكي

shermen said...

فاكره الفيلم بتاع مديحة كامل ونوال أبو الفتوح ووداد حمدي
لما عملوا إجتماع وأتفقوا فيه إنهم يقعدوا ف البيوت عشان خاطر إن الرجاله شايفه إننا مالناش لازمة

تيجي نعمل حزب نسائي ينادي
بإن إحنا نقعد ف البيت

ونشوف الحياة هتبقى عامله إذاي

جاتهم الأرف
هو إحنا خدنا منهم ايه غير الأرف

أدينا على الأقل مش هنشوف وشهم طول ساعات العمل وهيرجعوا جعانين
نحطلهم الأكل يأكلوا لوحدهم
وبعدها يتخمدوا

ما إحنا طول النهار واقفين نطبخ وطبعا مش ناسيين نفسنا

ياااااااه

الحياه هتبقى مريحه بشكل

sendbad said...

من قال لا ادري فقد افتي

Rosa said...

جدا جدا جدا جدا جدا ....جدا
هنقول ايه بس لا حول ولا قوة الا بالله
احيكي ريري على الموضوع المهم وطريقة عرضك ليه
لا حول ولا قوة الا بالله

Rosa said...
This comment has been removed by the author.
frozen love said...

elragl 3ayz yry7ko...lol

l2 bossy heya mtt2ash kda..heya m7taga nfhm eltrfen elawl 2emet b3dhm..l2nna f3lan fe bld "b3edan 3n eldeen tamamn"...e7na fe bld thkaftha a2al mn enha t3rf kemet elragl we elmr2a....y3ny elawl elwa3y..we b3den b2a nshof..

safa7_karmooz said...

يلا اهو نريح برضه

بدل ما كل مرة اركب المكيف الاقى بنوتة واقفه ااقوملها...

فتريحونى حبة ...مش كل مرة كده

نفسنا said...

تم أفتتاح العدد الأول من مجلة نفسنا
نتمنى منكم زيارتنا

وينكى said...

كتبت كومينت طويل عريض لكنه اتمسح
م الاخر
حسبى الله ونعم الوكيل

زحل الفلكي said...

تسمحيلي نبص شوية من وجهة نظره
هو قال نقعد البنات في البيوت وده حل غير مقبول الا في حالة واحده وهي انه ينفع تتعلم وتشتغل في البيت وبرضه لازم تخرج علشان تزور الناس مهي مش حتفضل طول عمرها في البيت

يعني حتى الحل بتاع القعاد في البيت ده لازم يتخخله خروج

يبقا نبص للجانب التاني
وهي وجهة نظر برضه جديره بالاحترام
ان البنت لما تنزل من البيت تنزل وهي حاطه في دماغها انها نازلة الشارع وفيه ناس كتير في الشارع متربصين علشان ينهشوها
فتبد تحصن نفسها وتلبس لبس كويس
مش زي مشوفت واحده ماشية في الشارع امبارح لابسة بنطلون احمر قصير ولازق على جسمها اهي دي لما يغتصبوها واللا يخطفوها محدش يقول الشباب هو السبب
بس طبعاً اكيد لو حد عمل كده يبقا غلطان

المهم يعني الخلاصة تنزل لابسة لبس محترم وتحترم نفسها لنفسها

يعني لما تتمشي على الكورنيش وتلاقي ولاد وبنات حاضنين بعض
والبنات لابسين اسدال وايشاربات و و
يعني المفروض يحترموا اللبس اللي هم لابسينه ويخافوا من ربنا

نرجع للشيخ
لو بصينا تاني من وجهة نظره تلاقيه بص لكل اللي حولينا ده ويأس من ان الناس اللي عمالة تتدرج للغلط
يأس انهم يتصلحوا
وده طبعاً انا ضده
فقال نخليهم يقعدوا في البيوت
وده حل انا معترض عليه
لكن ده رأيه ودي وجهة نظره اللي لازم نتعايش معاها
حتى لو رافضينها
علشان اكيد زي مأحنا كلنا عارفين انها مش حتتحقق
واللا ايه

بوست جامد وبيناقش قضيه مهمة اوي

الخص كلامي
لو نزلت البنت مش محترمه نفسها يبقا تقعد في البيت احسن
والولد نفس الكلام بالظبط
ولو نزلت محترمه وصاينه نفسها ومحترمه دينها يبقا تنزل
والولد نفس الكلام بالظبط
مهو الولاد دلوقتي بيلبسوا لبس عره برضه يعني

اسف على الاطالة

ياسمين said...

بجد بوست حلو جدا واسمحيلى أضيفه عندى الى قائمة أحلى البوستات

المخدرات انتشرت والنشالين زادوا والمشردين بلا عدد والحرامية كتييييييييير والسكر على ودنه فى البارات والملاهى الليلية مليانة رجالة رايحين يعملوا كل رزيلة على وجه الأرض .. وفى قتلة وسفاحون وسفاكرى دماء وكمان رؤساء دول ودوا بلادهم فى داهية

كلهم رجال
انا بقول
قعدوا الرجالة بقى فى البيووووووووووت

ياسمين said...

شادى

نسيت ارفع القبعة لشادى فايد

تحياتى

Yosif said...

تحياتي يا رحاب .. ازاي الحال
طبعا الكل متفق علي الاندهاش من الكلام العجيب ده .. لكن هاقولك حاجة .. الواقع و الاوضاع الطبيعية الموجودة أقوي من شوية كلام مش مفروض يستفزنا .. هي المراة لسه مش زي الرجل .. طاقتها و انتاجها في المجتمع اقل منه .. هل فيه حد لسه يرضي انها تتخلي عن عملها و مجهودها و طاقتها و تقعد بس في البيت تخرط بصل وتغير للعيال .. لو فيه حد مش عاجبه .. التطور و الواقع اقوي منه .. اما عن انها سبب مشاكل كتير زي ما ناس بتقول فطبعا الرجل مسئول قبلها و ناس اتكلمت فوق كويس في الموضوع ده ..
تحياتي

كراكيب عادل said...

لا نقعد في البيوت ولا نسكن الشوارع

والنواصي هناك اماكن العلم وهناك المصانع

بس يالا ورونا الهمة

مهو احنا الي غنينا المصريين اهما

Ahmed taher said...

هيا الاخت شرمين بتتكلم عن مين
عننا ولا ايه احنا مين طيب انتوا مين
يا نهار يا نهار
هي بتكلم عن الجنس الااري اللي اسمه الرجال يا نهارك ابيض يا شرمين
طيب حيث كده بقا
الي الجهااااااااااااااااااااااد
ايها الرجاله ارفعوا سيوفكوا في ديش العدو لازم نوقفهم عند حدهم ممكن لحد هناك كده ونرجعهم تاني ههههههههه
ماشي يا شرمين مكنش العشم
جتكوا الارف
ههههههههههههههههههههههههههه
احنا عندنا لسان برده ولا مؤاخذا
اهلا مين ريري ازيك يا رحوببببه
هههههههه

reri said...

شادي فادي

منكم لله ياللي في بالي
إنت اللي قلت وإعترفت ... مليش دعوه .. هههههههه

سلامااااااااااات

reri said...

lojain

قمة التناقض فعلا... ديننا يسر وليس عسر ... بيصعبوا علي الناس بدون طرح بديل .. منوره يا لجين

سلامااااااااات

reri said...

aardvark ef-11b

إيه الإسم الصعب ده ؟؟؟ جبتيه منين ؟؟؟ هههههههههههه.. هتبعتي بالليزر علي تيكية الطشطوشي... في الإنتظاااااااااااار .. لما نشوف ..ههههههههه

سلاماااااااااات

reri said...

فؤاده

أقولك علي حل أوجهه وأكثر عبقريه... المفروض نهد البلكونات ..هههههههه... ليه من الأصل نعمل بلكونات ... هو الغلط في البلكونه

سلاماااااااااااات يا زملكاوي
:)

reri said...

ody911

أولا أهلا بيك يا أودي عادي بقه
ثانيا أنا مش شايفه في كلام الشيخ ولا كلامك حل... أولا أنا لم أقصد عمل المرأه بعينه في البوست .... وما قلتش إن المرأه مش واخده حقوقها
كل ما في الأمر أن بعض الشيوخ هذه الأيام معظم كلامهم عن المرأه وخروجها وأنه سبب مشاكل كثيره وكأنها السبب في هذه المشاكل.... إنت شايف كمان إنها سبب البطاله لأنها بتشتغل وتاخد مكان الولد ... بس هو المفروض إنها تقعد حاطه إيديها علي خدها مستنيه واحد ييجي يذلها ((عادة))... ومش بعمم... وهي تفضل صفر علي الشمال علشان تحل مشكلة البطاله اللي أنا شايفه إن سببها سياسي في المقام الأول وإن سببها الأساسي هو الفساد وعدم تكافؤ الفرص والكوسه والواسطه واللي ليه ضهر إيه؟؟؟؟ خليك واقعي وما ترميش بلاوي المجتمع علي المرأه

وعادي بقه
سلامااااااااااااات

reri said...

sharm

يا ريت يا أحمد
:)

سلامااااااااات

reri said...

مصر هي أمي

فتوي إرضاع الكبير طبعا سمعتها يا محمد .. وما قولكش نوبة ضحك في الأول موت... وبعدين قلت هتودونا فين يا دعاة المسلمين
وطبعا يا حكامهم
ربنا يخلصنا من الغباء

سلامااااااااااااااات

reri said...

الشنكوتي الكبير

ههههههههههه ... الدين مش بيفرق بين راجل وست في الثواب والعقاب ... لكن نظرة المجتمع "حلوه المجتمع دي علي فكره" ههههههه... هي اللي بتفرق ... والشيوخ دول زودوا الطينه بله ... وبدل ما يفهموا الناس ... عايزين يولعوا في أي شئ مؤنث ويخلصوا
علي فكره يا شنكوتي في بنات ذكيه.. عايز تتجوز سبعتلاف واحده هههههههههه ... بس إنت إتشطر وإتجوز واحده ياعم
:)

سلاماااااااااااات

reri said...

the alien

هنعليه اكتر من كده!!!!... معقوله
منور يا بيشو

سلاماااااااااات

reri said...

hannoda

عباره عبقريه ..مستفزه !! وأي إستفزاز يا هند ... دي ناس لغت حاجه إسمها عقل ... وبيعملوا واجهه سيئه للإسلام
الإسلام عمره ما يكون كده .. مش عارفه هم فاهمين الدين إزاي
ربنا يخلصنا

ما تقطعيش الزيارات ولا الجوابات

سلامااااااااااات

reri said...

الربان

بحييك علي تعليقك... الدين عمره ما كان تعقيد لحياة البشر ... الدين طريقه لتيسير حياتنا ولجعلها تسير بالشكل الصحيح ... تقويم لحياتنا... الإسلام دين الوسطيه ... لا أعرف لما يصروا أن يجعلوا منه ستاره لأفكارهم المتشدده

سلامااااااااااااااات

shermen said...

آدي الرد بتاعي أهو يا ريري
على أحمد طاهر
يرضيكي كده بيسيحلي
في المدونات كلها
وإلى الجهاد يا رجال
كفايه لحد هناك ونرجع تاني

هههههههههههههههههه
ههههههههههههههههههه
-------------------------

أنا مش قصدي عليك
ولا على حد معين
أنا أقصد
الرجاله الوحشين بس
هو أنت وحش
------------
ضحكتني والله يا أحمد
خلاص ماتزعلش

أنا كنت برد على بوست ريري
وكنت منفعلة بالكلمة بتاعت خلي البنات تقعد ف البيت

ما انا قاعده اهو ف البيت
أقعد أكتر من كده اذاي
حد يقولي

أنا زهقت من قعدة البيت دي

reri said...

elgazaly

أهلا بيك في الزياره الأولي .. ويا ريت تتكرر... أما عن البوست فأنا أعلم أن هناك دعاه معتدلون وأنا ما جمعتش أو عممت هي مجرد حاله لفت إنتباهي إليها تكرارها وبكثره... نبرة التشدد زادت وخاصة بعد فتح قناه فضائيه معظم شيوخها متشددون وهي قناة الناس ... أنا علي فكره لا متحيزه لرجل ولا لمرأه ... كل ما في الأمر أني أري نظره غريبه من بعض رجال الدين للمرأه

سلامااااااااااااات

reri said...

الملاح التائه

إتهموا الإنسان دونما تمييز ... فكلنا متهم ... أؤيدك في الرأي تماما ولا أجد ما أزيده علي تعليقك
أتمني أن تتكرر الزياره

سلامااااااااااات

جواد بري said...

اولا (وده مش علي موضوع البوست) :) مين البنت العسل اللي حطيتي صورتها دي
بس تعرفي شكلك مهيسه من وانتي صغيره

ثانيا: نتكلم جد بقي .
بالنسبه لرأيي الشخصي انا هحاول اقنع مراتي تقعد في البيت اول مايجي اولاد
وده رايي وليس راي الدين لاني مش نصر فريد واصل لسه

ثالثا: لما يكون فيه مجتمع فيه بطاله وتاخر جواز ونسبه عنوسه عاليه مافيش تربيه بالمعني اللي عرفناه ويتعرض الكليبات او الافلام بالمناظر دي فطبيعي يبقي ده اصل الموضوع وسبب الهياج عند الشباب
مش الحل انهم يقعدوكوا في البيوت (مع الوضع في الاعتبار ان فيه لبس للشارع ولبس مايتلبسش في حمام)
الحل في التدين للجنسين
او علي الاقل التربيه الشرقيه اللي اتعودنا عليها وماعدتش موجوده دلوقتي

وعلشان ماتظلميش الشيخ احنا عموما كشعب شرقي محافظ عندنا الغيره شيء اساسي
ومانقدرش نتطمن علي اختنا او بنتنا او مراتنا انها تمشي في شارع بيعاكسوا فيه المحترمه قبل اللي مش

رابعا::)مانتي بتكتبي في مواضيع جد اهو
ولا علشان دي حقوق المرأه
كويس انك طلعتي من مود الاكتئاب بتاع التاج اللي فات ولو انك طالعه تفتحي النار علي الرجاله
بوست جميل يا رحوبه
وابقي خلينا نشوفك اونلاين

Tamer Nabil said...

ايوة صحيح بتعقدى فى البيت يارحاب هههههههههه


عارفة المشكلة اننا فى زمن اختلاط المعانى والقيم وكثرت الفتاوى واصبحت مثل السرطان تجرى فى اجسام جميع البشر


انا شايف ان الانسان يخكم عقلة هو اللى فاضل لية

تحياتى

reri said...

kokko

نظره متخلفه بيحاول البعض يرسخوها بمفهوم ديني ... ربنا يخلصنا من عنده
منوره يا كوكو
خلينا نشوفك

سلامااااااااااااااات

reri said...

ahmed taher

إنت طمعان في عربيتين المترو .. ههههههههه... أصوت ... حتي المترو عينك فيه ... ههههههههههه
معاك يا أحمد إن الحل في إيدينا كلنا ... أخلاقنا كلنا ...خد بالك أنا لا أدافع عن بنت ترتدي ملابس ليست ملابس ولا أدافع عن ولد تحرش بها ... هي مخطئه وهو مخظئ ... لو كل إنسان بدأ بنفسه حاجات كتير هتتغير

خلينا نشوفك

سلاماااااااااااااااااات

reri said...

spyfun

الراجل عايز يريح دماغه ... فإخترع الحل العبقري ده ... وعلي رأيك يقعد معاهم السجاير والقهاوي والمخدرات في البيت ... معاك في كل ما قلته عن حال الشباب والبنات ... وجامدين الكلمتين اللي عن البنات دول
منور في أول زياره ,,وما تقطعش الجوابات ولا الزيارات

سلامااااااااااااات

reri said...

elhawary

أهلااااااااا...إنت إخترت ... وإختيارك واضح ... ومتهيألي ده إختيار أي شخص سوي نفسيا
أخبار المندره إيه ؟؟؟
:)
خلينا نشوفك

سلاماااااااااااات

مجـلة جــوا نـا said...

هى الست ليه ايه غير جوزه و البيت
طبعا تقعدو فى البيت

...........
بس بس

حبه جد
مش عارف فى حاجات كتير بتحصل و بتكبر فى البلد الواحد مش قادر يحدده
منها الموضوع الى انت بتكلمى فيه
انه كل يوم احد يجى يطلع فتوه جديده
و تيار دينى بقول مش عارف ايه
ناس بتبوظ
ناس بتتطرف
و الباقى بيربى دقنه و يقولك
حراما حراما حرام و مش عارف اى حاجه
ربنا يستر علينا

مامادو

reri said...

omas

أكيد مش كلهم كده زي ما إنتي قلتي...نظره غريبه مش عارفه سببها إيه

خلينا نشوفك

سلامااااااااااااااات

reri said...

a.samir

كله بيريح دماغه ... بيستسهلوا ... لسه هيفكروا في حل ... يمنعوا ويكبروا مخهم

منور يا زميل الكار

سلامااااااااااااات

reri said...

shermen

الكلام ده علي ضمانتك يا شيري ... أصلي بخاف .. ههههههههههه ... ولا صحيح علي رأيك أخدنا منهم إيه غير الأرف ... جاتهم ... ولا بلاش أصلي شايفه أحمد طاهر معتصم وناوي يفتح النار علي البنات ويبوظ البلوج .. هههههههه

ما تقطعيش الزيارات ولا الجوابات

سلاماااااااااات

reri said...

sendbad

يا ريييييت الكلمه دي حد يقولها ... ده أي حد تسأله في أي حاجه لازم بفتي ... إستحاله يقول ما أعرفش ... تقريبا لغوا الكلمه دي من قاموس اللغه العربيه

شكرا علي المروووووووووووور

سلاماااااااااااااااات

reri said...

rosa

شكرا يا روزا ... أهلا بيكي في أول زياره ... إبقي كررها يا جميل

سلامااااااااااااااات

reri said...

frozen love

عايز يريحنا ... ههههههه.. ماشي ... معاك حق فعلا إن المجتمع عندنا ثقافته تحت الأرض.... الوعي زي ما إنت قلت أهم حاجه.. وده اللي بيقلق إن ناس ما عندهاش وعي بتسمع الكلام ده ... بيعجبهم أوي

خلينا نشوفك دايما

سلاماااااااااااااات

reri said...

safa7_karmoz

ده إنت سفاح محترم والله .. ههههههه ... أصل الرجاله معلش يعني بقي عندهم رخامه عجيبه الست أو البنت بتبقي واقفه وهاين عليها تعيط وهو قاعد لازق في الكرسي بغرا ... واللي يغيظك إنه ممكن يكون شاب ... وبرده لازق ... المشهد ده بقي طبيعي أوي ... لكن إحترامك ده يا سفاح قرب ينقرض

منور يا سفاح باشا

سلامااااااااااااات

reri said...

نفسنا

ألف مبروك ,غن شاء الله أزورها قريبا

________________________________

وينكي

معلش يا وينكي ... كأنه وصل ... ما تقطعيش الجوابات ولا الزيارات

سلاماااااااااااات

reri said...

زحل الفلكي

أنا معك في كل ما قلت .... لأني أعلم أنه حل غير واقعي قلت عليه عبقري ... حل غريب جدا..غض البصر وكيفية نزول البنت للشارع هي حلول ..بس واضح إنه يئس لأنه شايف إن الكلام ده لا يأتي بفائده زي ما إنت قلت... التربيه مهمه أوي في وجهة نظري.. الدين للأسف تحول لمجموعه من المظاهر التي لا تنم عن أي جوهر ... وإنت إديت مثال لبنات لا تحترم حجابها ... المظاهر كترت أوي

إنت ما طولتش ... أسعدني رأيك
إبقي كرر الزياره

سلاماااااااااااااااات

reri said...

ياسمين

أهلا بيكي ... وطبعا ليا الشرف إنك تحطيه عندك في أحلي البوستات ... وعلي رأيك ما هم بلاويهم أكتر بمراحل يقعوا هم في البيوت ... تصدقي الشوارع هتبقي جميله أوي ..ههههههههه

سلامااااااااااااات

reri said...

yosif

إزيك يا يوسف ... مختفي بقالك فتره ... الواقع أقوي طبعا بس المشكله إن الناس اللي ضد الواقع بدأوا يزيدوا وشايفين إن الحل ده حل

خلينا نشوفك يا يوسف كتير

سلاماااااااااات

reri said...

كراكيب عادل

إيه يا عادل إنت ألفت أغنيه ....هههههههه ... صحيح ما إحنا بلد كل مناسبه أغنيه ودي مش أي مناسبه

ما تقطعش الجوابات ولا الزيارات

سلاماااااااااااات

reri said...

ahmed taher

إنت ناوي تقلبها معركه ... ودم وسيوف
طيب
عايزين دم .. عايزين الناس تتلم
هههههههههههه
أنا بشجع اللعبه الحلوه
بص يا عم أنا مليش دعوه يا أحمد حتي شوف ردي علي شيرمين ... أصلي بخاف..ههههههههههههه
جاتكم الأرف ياللي في بالي
مش إنتوا يا أحمد خالص .. هههههه

سلامااااااااااات

reri said...

shermen

يا سلاااااااااام هو في أحلي من قعدة البيت والفراغ ... ههههههههه
وخلاص كده إنتي وضحتي موقفك .. إنتي كنتي تقصدي الرجاله الوحشين ... إنت وحش يا أحمد ؟؟؟؟... بطل تسييح للبت شيري.. ماشي.. علشان أنا هقفلك.. وإنت عارفني ... بخاف ..ههههههههه
أنا بهدي النفوس أهو
هههههههههه

سلاماااااااااااات

reri said...

جواد بري

أولا شكرا يا محمد علي رأيك في الصوره بتاعة البنت المهيسه ..هههههههه
ثانيا الحل فعلا في التدين الحقيقي .. إننا نعرف ديننا كويس والتربيه السليمه طبعا ... وهقولك زي ما قلت لغيرك أنا مش بدافع عن بنت لابسه من غير هدوم ولا عن ولد تحرش بيها ... الإتنين عندي مخطئين
ثالثا : وده الأهم أنا ما فتحتش النار علي الرجاله خالص ... ما تفهمنيش غلط... هههههههههه

رابعا : خلينا نشوفك أون لاين وأوف لاين

سلاماااااااااااااات

reri said...

tamer nabil

فكره برده ..ههههههههههه... أهو نرتاح..
الرسول عليه الصلاة والسلام قالها ""إستفتي قلبك ولو أفتوك ""

ما تقطعش الجوابات ولا الزيارات

سلاماااااااااات

reri said...

مجلة جوانا

هو إنت يا مامادو بتحرر المجله دي ؟؟؟

علي رأيك يا أخويا هي الست ليها غير بيتها وجوزها ..هههههه

فعلا الفوضي بتزيد أوي
فتوي لكل مواطن
كله بيفتي
وبيتكلم في الدين ويحلل ويحرم علي كيفه
مع إن كلمة حرام دي صعبه جدا علشان تتقال محتاجه كتير ... أصعب من كلمة حلال
للأسف بقت أسهل بكتير
ربنا يرحمنا من عنده

خلينا نشوفك كتير بس بعد الإمتحانات
:)

سلاماااااااااااات

•«ρяoιd»•™ said...

قعدوا البنات في البيوت

يغزلوا خيوط العنكبوت

قعدوا البنات في البيوت

يمكن التحرش يختفي

و حاجات كتير يمكن تموت

قعدوا البنات في البيوت

يمكن يعرفوا يديروا البيوت

قعدوا البنات في البيوت

بس اوعي تنسوا لكل بنت تابوت

تحياتي

reri said...

proid

قبل أي حاجه حمد الله علي السلامه وكويس إنك غيرت رأيك ورجعت تاني ... نورتني يا رامي
عود أحمد

سلامااااااااااااات

shermen said...

ميرسي يا ريري يا قمر
نصفتيني ربنا ينصفك
أيوه كده أحمشي لهم

الوحشين طبعا

ههههههههههه

سلام يا قمر

ody911 said...

أنا مرمتش بلاوى المجتمع على البنات


أقولك حاجة يا ريرى


بجد يعنى أنا عارف إنى المراة لها دور مهم


بس فى بيتها

مع أولادها

الأم مدرسة


ومش شرط إللى ييجى يكون عاوز يزلها ولا عاوزها صفر على الشمال


متهيقلى دة مايستاهلش إنوا يتجوز واحدة خالص


فى ناس نفسهم يخلوها أميرة متوجة

انا واحد منهم

أنا مش بقول إنكوا السبب الرأسيى

علشان دايما فى أسباب كتير لكل مشاكلنا وخصوصا فى بلدنا الحبيب


يمكن مش هتقدرى تفهمى وجهة نظرى


بس أكرم للبنت العيشة المرفهة ولا الشحططة

أنا عن نفسى شايف إنى الشحططة للصبيان

والبهدلة كمان


وإنتوا الجنس اللطيف الناعم

إللى المفروض موجود كنوع من انواع الرحمة على الأرض



يمكن يكون كلام شيوخ اليومين دوول مش عاجبنى أنا كمان


علشان بدل ما يتكلموا على المراة يتكلموا عن الحكومة أحسن

بس النفاق فى كل مكان

حتى مع الشيوخ

هيه صدقينى خربانة بيكوا أو من غيركوا


بس أنا عن نفسى أفضلها أميرة متوجة على عرشها


وعادى بقة
أودى

sendrlla said...

هههههههههههههههههههههههههه
امال مش قعدوا البنات فى البيت هما زعلانين كده ليه طب ما يقعدوا هما فى البيت

والله انا مش عارفه ارد اقولك ايه

قعدوا الولاد فى البيت دا الحل العبقرى فعلا او خليهم ينسوا المرأه شويه ويحلوا عن سماها

reri said...

shermen

أي خدعه يا جميل
شفتي أحمد طاهر كش في جلده وخاف إزاي
طبعا مش اي حد
ههههههههه

سلامااااااااااات

reri said...

ody911

وجهة نظر تحترم
وبعدين إنت ما سمعتش الأغنيه الرهيبه للمطرب الشعبي الرهيب
اللي بتقول
الدنيا خربانه
هههههههه
أغنيه تجيب تلوث سمعي ومخي .. ههههههههه
وعادي بقي

سلامااااااااات

reri said...

sendrlla

يا رييييييييييييت
هنستريح
والشوارع تبقي حلوه ومش مزعجه
يا ريت يقعدوا هم ويريحونا

أهلا بيكي في أول زياره
إبقي خلينا نشوفك كتير

سلاماااااااااات

micheal said...

أنا جي أدحرج التماسي
:)
البوست جميل بس مش حقدر أعلق عليه
:)
تحياتي لكي يا رحاب

انتظار مؤقت said...

و الله انا اعرف بنات نفسها تقعد في البيت و بتدعي على قاسم امين الي خرجهم من بيوتهم و خلاهم يشوفو الاشكال المنيله الي عايزه ترجع تقهعدهم في البيت و يا ستي ما بين البت و الشارع باب رفيع الي عايز يقعد يقعد و الي عايز يخرج يحرج مبقتش فارقه في الزمن المهبب ده يعني جوه البيت اامن من بره البيت ..مين عارف؟

صاحب البوابــة said...

أضحكتينى

فليس هكذا تعالج الأمور أبداً

ليس ذاك بحل إطلاقاً

تحياتي

ضد الظلم said...

ياسلام لو تؤعدو فى البيت مش هيبقى فى زحمه فى الشوارع ولا المدارس ولا الجامعات وهنعرف نشتغل كدة ونكسب

حلول عبقريه من شيوخ كفتجيه

متفكرو فى الموضوع بجد

تحياتى

koukawy said...

اه يا بنتي كل واحد مش عارف يغض البصر يجيبوا علي الست
و كل واحد مريض بيغتصب حتي المنقبات يقولوا ان الست هي السبب تمشي في الشارع ليه ما هي اكيد اغرته
ده المحجبات بيتعكسوا زي اللي مش محجبات
اللي بيعاكس مش بيفرق
ما هو لازم تكون الست كده
تعرفي ان انا مره في الميكروباص سمعت شريط لشيخ كان مغزي و دافع الدرس هو باللفظ بدون افتري
ان المرأه عدو اهرب منها انها سبب الشرور علي الأرض
تخيلي بقي انت اما شيخ بيقول كده

ادم المصري said...

ههههههههههههههه
ل ولسه دا فيه شيوخ تخلي الواحد يطلع من هدومة كمان
.
.
تحياتي ليكي والسلام

الطائر الحزين said...

ريرى
استأذنك فى تناول الموضوع فيه خطأ كبير انك وبدون قصد جعلت فتوى شيخ واحد واخذتيها وعممتيها وبعدين وانا متأكذ ان هذه هى الكلمة الوحيدة التى رنت فى اذنك قعدوا البنات فى البيوت دون ات تعرفى ما قبلها من كلام أو ما بعدها أو ما جعلة يختار هذا اللفظ بعينة حتى انت لم تقولى عنوان المحاضرة ولا عن ماذا كان يتحدث الدرس فى العموم
وحتى لو افترضنا ان كلامك مضبوط كما تحدثتى ان كان الشيخ خطأ مرة فانت خطأت الف لانه اخطأ وانت نشرت الخطأ يعنى تناول الموضوع كان ممكن ان يكون دون ان نتطرق الى شيخ أو غيرة وتكون الافادة عامة بدلا من اثارة بلبلة وجميعنا متفقون ان خروج المرأة دون داع به مفسدة كبرى
مش كدة ولا ايه
اسف على الاطالة

smraa alnil said...

انتي عارفة معني الحل بتاعه دة ايه
بجد دي تبقي مصيبة
تعالي كدة نتخيل ان البنت بمجرد انها تروح المدرسة فهي فتنه للجميع وبالتاالي هي تثير الغرائز لكل من هب ودب وشيطانة علي حد قولك يبقي الحل الوحيد انها تقعد في البيت
مش تكمل تعليما
لحد ما يجي ابن الحلال اللي يتستر عليها
تفتكري ان دة العدل
تفتكروا كلككم ان دة ممكن يكون صح
اولا هتبقي في فجوة كبيرة اوي بين الراجل وهي
لانها مش متعلمة او مش مكملة تعليمها ومش احتكت بالحياة والراجل بقي متحاج اللي يفهمه ويحتويه
وهي يادوب مش اتعلمت غير انها ازاي تقع البامية
ولادك هيتربوا ازاي غير علي الفتة والمحشي
لان دي اقصي حاجة هي بتعملها
فين الاسلو العلمي اللي نوعا ما بنتبعه في تربية ولادنا
فين المشاركة في اني اذاكر لاولادي بدل ما اجي ارهقك واقزلك تعالي ومش ترتاح وتعلي ذاكر لولادك
الحياة مش مجرد اننا نقعد في بيوتنا
جايز اكون انا واحدة من الناس اللي تعبت من الشغل ونفسي ارتاح
واقعد في بيتي
بس دة يمكن مش يكون حل اني اخلص العالم كله من شروري
تقولوا ايه للراجل اللي اغتصب طفلة عمرها 4 سنين هي كانت شيطانة للرجة دي
ولا امها غلطت في انها تعرضها للعالم وتخليها تنلها الشارع
كلام شيوخ لا يدل علي اي علم ولا دين
انتي بتتكلمي في دة يا ريري
تعالي شوفيالشيخ اللي اباح ان ترضع المراة زميلها ف العمل
بحكم ان دة يبيطل الخلوة الشرعية
الله علينا وكل واحدة فينا بترضع زميلها عشان يبقي كلنا اخوة وتبقي جمعاء
كفاية الناس دي تبقي جاهلة وتتكلم من غير منطق ولا عقل ولا علم ولا حتي دين
ياريت بقي بما انه افتي بكدة يبقي يقعدلنا ماما سوزان في البيت ويقولها تتحجب شوية
ولا الفتاوي دي مش تمشي عليها
مين المشكلة وفين

في الرجالة اللي عايزين المراة تقعد في البيت تمسح وتطبخ علي راي شادي
ولا في فينا احنا اللي محترمين
ولا في البنات الي عقلها فاضي زي سوسو وميمي
اللي مشهمهم غير لون المانيكير والميك اب لايت ولا تقيل
حسبي الله ونعم الوكيل

R.R said...

احييك اولا على هذا الموضوع
كان يشغلنى منذ كم يووم كده اما سمعت شيخ بردو بينادى بالحذر الشديد من المرءه
والراجل صاحب السوبر ماركت اللى كان مشغل الشريط
بصراحه مفيش اى واحده دخلت المحل الا وهو بيبصبص عليها
حاجه فعلا تثير العجب
تحياتى رحوب

اسكندراني في الغربة said...

*Life without Girls*
The result...

Markets silent...
Streets empty...
The police at rest...
All mobile companies in loss...
No SMS...
No Flowers...
No Valentine...
No Candles...
No Perfumes...


*All the men directed to Heaven*

maged stephen said...

يا ريرى انا شايف أن تصنيف مصر كدولة من دول العالم التالت شايف ان التصنيف ده فيه مجاملة كبيرة قوى

امام الجيل said...

هو طبعا محدش يوافق على الفتوى دى والا كان الرسول صلى الله عليه وسلم امرنا بيها ومكناش ساعتها نعرف زوجات الرسول وبناته وكثير من النساء الاتى اثرن فى التاريخ الاسلامى بشدة ولكن مشكلة البنات انهن بانحراف بعضهن يؤثر هذا الانحراف بشدة على الشباب ولكن هذا ليس عذر للشباب طبعا ولكن بالتاكيد توافقينى ان الموضوع مش منفصل عن بعضه يعنى بالتاكيد لبس البنات بياثر على الشباب وبيدفعهم للجرائم الاخلاقية اللى بنسمع عنها وحاجات كتير بس مش حلها ان البنات يقعدوا فى البيت بس ينزلوا وهما محترمين انفسهم ومحترمين الناس لان حريتى لازم تقف عند اذية الناس لان بلبسها ده بتاذى الناس يا اما المحترم اللى بيغض بصره بس بيكون برضه حمل عليه يا اما المنحرف اللى بيلاقى عذر لانحرافه ويدفعه لمزيد من الانحراف واكيد طبعا الشباب ممكن يدفعوا البنات للانحراف اكيد تحياتى

hesham said...

لا لا لا

الا حكاية يقعدوا البنات فى البيوت دى

ده احنا معشر الولاد نتشحطط من بعد البنات

البنات يعنى الدلع و الرقة و الحنية

و بعدين عاملين جو

نقعدهم فى البيت ليه بأه

مع خالص تحياتى

و سلاماااااااات

reri said...

micheal

دحرج التماسي براحتك .. هههههههه
شكرا علي المروووووووووووور

سلامااااااااااااات

reri said...

إنتظار مؤقت

ما بقتش فارقه
أنا معاك في حكاية قاسم أمين دي
أصلي ليا واحده صاحبتي فعلا بتدعي عليه
بتقول مش كان زماني متجوزه ومخلفه قرطه خدنا إيه من التعليم
هههههههههه

شكرا علي المروررررررر
سلاماااااااااات

reri said...

صاحب البوابه

أكيد مش بكده تتحل الامور
ربنا يحلها من عنده

منور
سلامااااااااااااات

reri said...

ضد الظلم

كفتجيه ... إنت جبت التعبير المظبوط
هنفكر في إيه يا عم ..ههههههه
منور دايما

سلاماااااااااات

reri said...

kokauwy

أهلا بيكي في أول زياره .. ويا ريت تتكرر
شريره أوي المرأه ... هنقول إيه غير حسبي الله ونعم الوكيل

سلاماااااااااات

reri said...

آدم المصري

اللي يعيش يا ما يشوف
منور يا آدم
سلامااااااااات

reri said...

الطائر الحزين

أولا أنا ما قلتش إنها فتوي
ده مجرد درس
الراجل شايف إن ده حل لمشاكلنا
وأنا شفت إن ده حل غريب
وتعجبت من طرحه أساسا
إستفزني الحل
أنا لم أقل فتوي
وبصراحه مش فاهمه يعني إيه خروج المرأه بدون داعي مفسده كبري
وهي إيه أصلا دواعي خروج المرأه؟؟؟؟
واللي لو خرجت من غيرها تكون مفسده !!.. مش فاهمه الحته دي بصراحه

شكرا علي المرووووووور
سلاماااااااات

reri said...

سمراء النيل

أهلا يا أنوج
والله بقت حاجه تقرف
إرضاع الكبير .. هيصه
ولا فتوي المفتي بتاعة بول النبي
مش عارفه ليه بيعملوا فينا كده
فين العقل ... لغيناه خلاص
تقريبا
ربنا يرحمنا من البلاوي اللي بيحدفونا بيها من حين لآخر دي

البلوج رجع ينور بوجودك .. يا رب دايما
سلاماااااااااات

reri said...

r.r

أهلا يا رانيا
ما هي دي الإزدواجيه ... كله بيدعي شئ وهو من جواه خربان
حولوا الدين لشوية مظاهر وإكتفوا بكده

منوره يا قمر
سلامااااااااااااات

reri said...

إسكندراني في الغربه

إنت شايف إن النتيجه الجنه ...هههههههههههه
إحنا بقي مش عايزين ندخلكوا الجنه
عند بقي
هههههههه

ما تقطعش الجوابات ولا الزيارات
سلاماااااااااااااات

reri said...

ماجد ستيفين

إنت ظهرت أخيرا يا ماجد ... منور البلوج
هي مالهاش تصنيف خالص ..هههههههههه

سلامااااااااااات

reri said...

أمام الجيل

أهلا بيك في أول زياره
أنا قلت لكذا حد وبكررها معاك أنا مش بدافع عن بنت لابسه من غير هدوم ولا ولد تحرش بيها
الإتنين مخطئين
حلقه ومرتبطه ببعضها

خلينا نشوفك
سلاماااااااااات

reri said...

هشام

طبعا من غير البنات هتبقي الحياه كئيبه
عاملين شغل ..صح

خلينا نشوفك علي طول علي طول يا هشام

سلاماااااااااااااااااااات

الجعرّ و أبورمّانة said...

انا شايف ان الردود ماشاء الله كتير أوى ... ربنا يزيد ويبارك
عاده لما بلاقي كومنتات كتير اوى في اى بلوج مابحبش احط انا كمان واحد .. بحس انها مزايدة عهالفاضي وفي الغالب مابيتقريش

لكن صدقيني مدونتك متعتنى جدا جدا .. اسلوبك اكثر من رائع .. الى الامام دائما و افضل امنياتى ..

أبورمّانة