Tuesday, July 24, 2007

إرتباط شرطي

دائما ما ترتبط لدي المناسبات والأعياد بأغاني معينه أو أفلام معينه


لاأشعر بالمناسبه إلا بسماع الأغنيه المرتبطه بها أو مشاهدة الفيلم الذي غالبا ما أكتفي بمشاهدة مشهد واحد منه وسلام عليكم علشان بس ما يأثرش علي جهازي العصبي كتر تكرار الأفلام

إرتباط شرطي
مجرد إرتباط ولا أعرف متي وكيف بدأ هذا الإرتباط


عيد الأم .... من غير أغنية ست الحبايب لفايزه أحمد ... يبقي عيد البطيخ


شم النسيم .... لازم لازم أسمع أغنية الدنيا ربيع لسعاد حسني
بعدها خلاص أقول النهارده كان شم النسيم

أما بقي عيد تحرير سيناء فلازم وإجباري أشوف مشهد من الطريق لإيلات ... ساعتها أعرف أنا أجازه ليه
وخاصة بقي المشهد بتاع يا ريتني كنت معاهم

رمضان .... أجمل شهر في السنه ... قلبي بيفرح بجد أوي لما بسمع أغنية رمضان جانا بتاعة عبد المطلب
مات محمد عبد المطلب بس متهيألي مهما مر الزمن مفيش رمضان من غير أغنية رمضان جانا ... ومفيش أغنيه بديله تنفع تحسسك برمضان غيرها .... وحوي يا وحوي حلوه برده هي ومعظم أغاني رمضان التانيه بس رمضان جانا جامده أوي ... أغنيه لازم تفضل ... عبد المطلب هيفضل موجود بيها

لما تبدأ أغنية تم البدر بدري والأيام بتجري ... بعرف إنه خلاص رمضان قرب يخلص ويبدأ قلبي يبقي حزين إن رمضان بيودع
وبمناسبة الكلام علي رمضان كنت مره في سكشن .... وكان تقريبا تاني يوم هيكون رمضان والناس كلها بتهني بعض صاحبتكوا بقي اللي هي أنا بقول لأصحابي أنا بحب رمضان أوي ماتوا علي نفسهم من الضحك .... لأن كان معانا واحد في السكشن إسمه رمضان وقالولي لو حد سمعك وإنتي بتقولي كده يقولوا البت واقعه في رمضان


تيجي ليلة العيد ... والله ما أحس بيها أبدا من غير ما أسمع أغنية أم كلثوم يا ليلة العيد ... أغنيه عبقريه ... لو الناس نسيوا كل أغاني أم كلثوم متهيألي دي إستحاله ... الناس بتوع زمان دول عملوا أغاني فعلا للزمن


يوم العيد الصبح لازم ترن في ودنك الأغنيه السخيفه في وجهة نظري بتاعة صفاء أبو السعود أهلا أهلا بالعيد


سته أكتوبر بقي ... ده لازم أسمع فيه موسيقي رأفت الهجان .... العمل الوطني اللي إتربينا عليه ... وأشوف كام مشهد كده .. أهمهم وهو بيودع شريفه أخته ... والتاني ويوسف شعبان بيقوله مصر أمانه يا رأفت ... والتالت وهو بيودع أسرة شارل سمحون في المينا ويجيله يوسف شعبان من وراهم ... بحب المشهد ده أوي ... وده غير إنك لازم تلاقي الكام فيلم الساقطين اللي عمري ما إتفرجت ولا هتفرج عليهم ... من عينة فيلم رصاصه لا تزال في جيبي وإخواته


إمبارح كنت أجازه ... ببص في الساعه ... لقيتها بقت واحده ... قلت أقوم أنام ... وبعدين قلت يا نهااااااااار أبيض ويا وقعه بمبي ... ده أنا ما شفتوش ... والساعه بقت واحده ... مسكت الريموت وهاتك يا تك ... وما لقيتهوش ... كنت خلاص هفقد الأمل ... لحد ما هداني تفكيري إني أجيب القناه الأولي المصريه الأرضي ... وقلت أكيد هلاقيه عليها ... وفلح إحساسي ... ولاقيته ... لقيت علي قاعد مع إنجي علي البحر ... ما سمعتش ولا كلمه من حوارهم ... بس كده خلاص حسيت أنا كنت أجازه ليه ... قلت لنفسي كده خلاص النهارده كان عيد الثوره ... والدليل هو علي وإنجي ... قلت لنفسي كل عيد ثوره وإنتي بخير يا رحوبه ... ياللا تصبحي علي خير بقي علشان تعرفي تصحي بكره ... وخلص اليوم الأجازه


أه أصلي نسيت أقولكوا إن عيد الثوره عندي الإرتباط الشرطي بتاعه هو فيلم رد قلبي


يا تري نفس الأغاني والحاجات اللي قلتها برده عامله عندكوا إرتباط شرطي؟؟؟؟


عقبال الأجازه الجايه والإرتباط الشرطي بتاعها

101 comments:

Hadota .. حدوتة said...

رحوبة
ريرى العسل
تحياااتى ليكى
البوست رااااااااااااااائع
بجد فكرته بسيطة
بس انا بيحصل معايا زيك بالظبط
نفس الاغانى ونفس الافلام ونفس المشاهد اما خلاص الواحد كره نفس بس اهو فعلا بنعلمهم بالحاجات دى
نسيتى بقى انتى المناسبات الدينية
وعيد الهجرة
وعيد اس السنة والحاجات الحلوة دى
والمولد
لازم بقى افلام فجر الاسلام والشيماء
وفيه مناسبة كده مش فاكراها بيجيبوا فيها الناصر صلاح الدين

عاوزة اقولك الموضوع واخد حده معايا لدرجة انه ممكن يرتبط معايا الموقف بريحة شمتها او اكلة معينة
زى مثلا ريحة برفان
لو شمتها بعدها افتكر الشحص اة الحادثة
وكمان الاكلات
ودى خدى عندك متعديش
البلح فى رمضان
وقمر الدين
والكعك فى العيد والبسكوت
والعاشورة
وغيرها كتير بقى
زهنى مش حاضر دلوقتى
بس بوست حلو
احييكى عليه
سلام يا قمر

انا اول تعليق
:p

هييييييييييييييييييييييه

الدبور said...

نسيتي شهر مايو كل سنة وفيلم الناصر صلاح الدين و عنترة ابن شداد
تفتكري ليه

وينكى said...

ههههههههههههههههههه
جامد جدا الاحساس ده
انتى عارفه بقى ان الموضوع معدى معايا قوى
ارتباطى الشرطى مابين الكلمات والالوان وماتسألينيش ازاى
زمان وانا صغيره كنت باحفظ الصور القصيره من القران بالالوان
يعنى السوره الفلانيه عندى لونها كذا فاستحضرها على طول
وكل كلمه او منعى او جمله عندى بالالوان
لو كنت فى عصر الابيض والاسود كنت عملت ايييييه؟؟
اه على فكره
حفلة أيامنا الحلوه يوم 27 يوليو الساعه 8:30 فى ساقية الصاوى
اكبر تجمع بلوجرى اوعى يفوتكو
Blogger Radio Station

مشمشه said...

البوست ده تحفه بجد وكل كلمه قولتيها هيا الى بتحصل معايا بالظبط وبالنسبه لارتباط اى اغنيه باى مناسبه اكترهم هما اغانى رمضان والعيد وطبعا شم النسيم وعيد الام بالنسبه باه ليا انا شخصيا معرفش ليه دايما كان بيرتبط ريحة الجوافه بايام المدرسه اول ما اشمها اعرف ان الدراسه بدأت واحيانا بتبقى عندى كمان الاغانى مرتبطه بالاماكن والشخصيات بحيكى بجد على البوست الجميل الى فكرنى بحاجات كتير حلوه

اخر said...

بلا شك و بلا استثناء
ده جيل علي بعضة ارتبطت فيه المناسبات دي مع الاغاني و الافلام دي
لكن انا عندي 6 اكتوبر فرصة اشوف فيها حكايات الغريب كمان

The Alien said...

معاكي حق ف كل فيلم وأغنية
ومتهيألي هتلاقي أغلب جيلنا مرتبط بيهم
سواء بإختيارنا أو مفروض علينا

وفيه مثل تاني
لما اﻷهلي او الزمالك أو المنتخب ياخدوا بطولة
لازم نسمع أغنية
مبروك مبروك مبروك
مبروك عليكم وعلينا
مبروك مبروك مبروك
مبروك يانسنا وأهلينا
ساعتها بس بعرف إن فيه حد أخد بطولة

تحياتي

R.O.U.R.O.U. said...

fe3lan,hiya hiya 2l a3'any fi 2l monasabat,law 5otoba ,7atesma3y 2l a3'any 2ly mesh bensma3 3'erha
haaaaaaaaaaaaaa,cool post

sherif gharib said...

حلوه الفكره البسيطه ديه قوى يعنى انا حاسس ان انتى مرتبطه قوى بالعادات و التقاليد و الحتفاليات بالمناسبات السنويه بتاعتنا
يمكن اكون انا مختلف معاكى فى الموضوع ده لانى ببساطه برتبط باغنيه لما تكون هى نفسها ليها ذكرى خاصه معايا
بس المشكله انى لما بحس انها بتطول بحاول انى انساها
تحياتى و على فكره انا واحشنى تعليقك عندى يا باشا

Van Gogh said...

rehab

انتى بتحكى عن جيل كامل
عاش حلم جميل
وفاق على واقع غريب

ممكن نفضل احنا طول عمرنا مرتبطين بكل اللى انتى قولتيه

صوت عبدالمطلب...وليلة عيد ام كلثوم


بس اكيد
الجيل الجاى

هيفتكر رمضان بريحة الشيشة
والعيد بأعلانات الحفلات
بهيفاء ونانسى وممكن مروة

اما عيد الثورة العظيمة
فكفاية يسمعوا تامر ولا هيثم شاكر وهو بيقول ارمى حمولك عليا
وهو اصلا هربان من الجيش

كنا جيل محظوظ
لاننا لقينا كدبة ظريفة
عيشناها وعاشت جوانا

حصان بري said...

ارتباط
وشرطي كمان؟
ايه الدماغ دي يا رحوبه
فعلا المناسبات ليها طعم تاني بالارتباطات دي
بالاغاني , بالافلام , بشكل الناس
بالنسبه لي الارتباط الشرطي اختلف تماما وانا هنا عن كوني في البيت مع اهلي
هناك كل حاجه ليها طعم
هنا حتي رمضان بيبقي طعمه متغير

لا انتي لو هتحكي عن الارتباطات الشرطيه عاوزه لكل مناسبه بوست علي بعضه
بوست جميل يا ريري
تحياتي

صاحب البوابــة said...

أرجو أن تنضمي لنا في حملة ( أفضحوا تجار الكيف )

التفاصيل في مدونتي

تحياتي

Hannoda said...

فعلا يا ريري

أنا لما كنت في مصر كانت الأغاني اللي لازم تولّع قلبي كل سنة هي جانا العيد و أهلا رمضان

دول بالذات دون عن أي حاجة تانية

لما سافرت بقى .. مش قادرة أقولك قد ايه كل الأغاني اللي كتبتيها بتخليني نفسي أحضن التلفزيون

وبما إنيمع الشغل دلوقت ما بلحقش أتابع أي حاجة من ده فأنا سمعتهم كلهم بودني مع كلامك

بس عجبتني كلمة(الإرتباط الشرطي) ما بتحصلش بس مع الأحداث و الأغاني

إنا مع روايح البرفانات
صح؟؟


تحياتي

شمعة أمـــــل said...

بوست حلو اوى يا ريرى
وفعلا كلنا بنفتكر المناسبات دى بالافلام والاغانى الجميله دى
تحياتى

طهقان said...

حلو الارتباط الشرطي دي

انا اعرف الدودة الشريطية


ما علينا

كل سنة وانت طيبة
ومصر اليوم في عيد

الكرباج يا عبد الصمد

الشنكوتي الكبير said...

يخرب عقلك يا فقريه ده انتي مصيبه الواحد فعلا من غير الأفلام دي والأغاني دي مش بيحس بالمناسبه اللي هو فيها
بس نسيتي تقولي عيد العمال وخطبة صاحبنا الأجباريه
وبرده فيلم الشيماء في مولد النبي وساعات في العيد بيجيبوه
حاجات فعلا يتحسسنا قوي بالمناسبه وفعلا اغاني رمضان والعيد
بجد يا ريري بوست رائع انا حاسس اني عديت على كل الأعياد والمواسم دلوقتي وانا بفتكر الأغاني والأفلام دي
تسلم ايدك
سلاااااااااااااااااااااااام

sendbad said...

من طبع الانسان الاعتياد علي الحاجة يعني اتعود يسمع الاغنية دي في المناسبة دي
يشرب الشاي اول ما يصحي يعني لو مشربش الشاي يبقي مصحيش
الاعتيادي ياعزيزتي

أبو ضحى said...

تعرفى ان الارتباط الشرطى ده من وجهة نظرى حاجة جميلة..بمعنى انه بيعمل لكل مناسبة طعم مختلف عن باقى الايام فى السنة

و خصوصا مناسبتين بحبهم اوى

رمضان و فعلا اغنية رمضان جانا بتأثر فى جدا زى باقى الناسو لما بسمعها بحس بطعم الخشاف فى بقى

و المناسبة التانية هى ستة اكتوبر و دايما لازم عينيا تدمع فى اليوم ده و انا بسمع اغنية الوطن العربى و مشهد مصر امانة يا رأفت بيخلى جسمى يأشعر

متضحكيش كده عليه بس هو ده اللى بيحصل فعلا
و من حسن حظى ان اليوم ده هو عيد ميلادى..شفتى الحظوظ بقه

تحياتى يا رحاب

Halawa said...

عسل جدااان
عجبتني حتة انجي وعلي قوي
سخسخت على روحي

ومعاكي بكره أغنية العيد
الساذجة بتاعة صفاء

هو شعور مش وحش بجد
بس لو محصلش الارتباط ده
ممكن منحسش بطعم الموضوع الأكبر

لأن دوام الحال من المحال
يعني شوفي اغنية وحياة قلبي و أفراحه

بقت أغنية حكيم والتانية سعد الصغير

هي الناس لسه مش قابلة
لكن بالتعود هنقبل زي كل حاجة
وهيتغير الارتباط

بس أنا بحبه بجد بالذات في رمضان

سلاااااامون وتحياتي
بلوج لذيذ

حسن ارابيسك said...

ما أجمل هذا العقدالذي تلضمين حباته أغنيات جميلة حفرت في داخلنا الكثير من الذكريات الجميلة
لمناسبات جميلة
تملئ نفوسنا بالبهجه في وسط هذا الزخم من أحداث الحياة الصعبة والمقلقة
فحبات عقدك حبات بها الكثير من راحة النفس ورائحة أوقات زمنية معينة تسبقها دائماً نفحاتها تُعلن عن قدومها فتنشرح لها صدورنا
شكرً على عقدك
سعدت بمروري ومشاركتي التعقيب في مدونتك

MaMaDo said...

فى الواقع و حسب اخر احصائيه جت فى اخر اجتماع فى الشارع
ان الفئران بتيجى من عند عم حسن عشان ال

لا لا لا مش دى
الورقه فين فين اهى

ايوه
احم احم

والله
فعلا اكتر الغنيه فى مناسبه بكره بتاعت
طنط صفاء

بس و الله يمكن مش بفرح بالمناسبه اوى
اكتر ما بفرح بسماع الاغنيه الشرطيه ليه

حتى يمكن كنت راجع من الجامعه فى يوم و كان تانى يوم رمضان
و مكنتش مركز اوى فى بكره و لا هعمل ايه عشان بكره رمضان و كده
و فجأه علبى غير العاده شغل السواق الرديون
و قعدنا نسمع رمضان جان
و حوى يا وحوى
زيووووووووو
بجد كنت فرحان اوى اوى
و قعدنا كلنا نرقص لما كنا هنقلب العربيه بينا



و لا اغنيه ام كلثوم فى العيد
و العيد فرحه ماااااء

هههههه

بجد دى اكتر حاجه بتخلينى احب المناسبه دى
و بعدها بقى اذا كان عيد و العيله هتتجمع


:)))))))

الطائر الحزين said...

أخى جاوز الظالمون المدا فحق الجهاد وحق الفدا

لسه سامعها قريب

تحياتى

اسكندراني في الغربة said...

رمضان الي فات جبنا اغنية رمضان جانا و شغلناها في كاسيت العربية بصوت عالي
و فضلنا نلف طول الليل والناس بتتفرج علينا زاي مابتفرجوا علي بتوع السيرك
مكنش يتفع نصوم علي الرؤية بس
الكلام دة مش في مصر طبعا
بس برافوا علي الفكرة و المجهود الي عملتية في البوست دة
اما الارتباط الشرطى فمش عارف لية بيفكرني بكلب بافلوف و الثانوية العامة
مش كان أسمة بافلوف بردو؟

bos bos said...

والله أنتى جميلة وموضوعك جميل
وفعلا كل اللى قلتيه صح
بس فيه مناسبات ماتنفعش غير بالحاجات دى زى رمضان وأغنية رمضان جانا والعيد وأغنية ام كلثوم
تحياتى لكى

micheal said...

هههههههههههه...بوست لذيذ أوي يا رحاب...حكايه الارتباط الشرطي دي تقريبا عندنا كلنا من كتر الملل اللي الاعلام عملهولنا
:)
تحياتي

daktara said...

www.picstalk.blogspot.com
مدونة جديدة
جامدة
وروشه

احرص علي متابعتها
د. خالد عزب

The Groom said...


فاكرك يا ناسيني

كان زمان في حد بيجي يزورنا وقطع

عموما :) مش مشكلة ملحوقة أكيد حييجي تاني

لكن

أقولك سر

أنا كمان بسمع الأغاني مخصوص عشان بتفكرني بمواقف في حياتي لكن مش بسمعها لاجل اني اسمعها وبس

:)

تحياتي لك من ماناساس البلد

ضد الظلم said...

اه طبعا نفس الارتباط الشرطى الى عنك بالظبط وخاصه اغنيه رمضان جانا لعبد المطلب ابويا بيحبها جداا وجايب فانوس بيقول الاغنيه دى وكل سنه يطلعه فى الصالون ويشغلها لاحفاده وبحس برمضان اول ما بشوف الفنوس ده
وبعدين نسيتى ارتباط شرطى مهم

اغنيه اول طلعه جويه الى بتفكرنى بالنصيبه الى احنا عيشين فيها دى

مفيش مره اديتك ودنى وخزلتينى
تحياتى

Sharm said...

والله عندك حق تقريبا نفس ارتباطاتي الشرطية

أحمد سلامــه said...

كل الافلام والاغاني واللذي منه شرط واجب لاتمام المناسبة
لكن دايما ليلة العيد واغنيتها دي بتسببلي نوع من الشجن مش عارف مصدرة قوي
بس ساعات بفتكر بيها فيلم شاويش نص الليل لما الواد ابن فريد شوقي المدمن بياخد فلوس الحج بتاعه ابوة ويشم بيها
:)
ذكري سخيفه مش كده
هو الارتباط الشرطي كده
مش بنختاره بإيدينا
سلامي يا رحاب

أميرة ويلز said...

ارتباط

واى ارتباط يارحوبة

كل اللى انتى قلتيهم دول بالظبط مرتبطين معايا برده ويمكن معانا كلنا
وبالذات رمضان

يلا رمضان على الابواب كل سنة وانتى طيبة

reri said...

حدوته

منوره يا قمر إنتي والإرتباطات الشرطيه بتاعتك
أنا نسيت فعلا الأفلام الدينيه اللي بتجيب تخلف عقلي خاصة فيلم الشيماء
:)))))
فكرتيني بالياميش والأكلات الحلوه بتاعة رمضان

أما بقي صلاح الدين فده بييجي في 4/5
ودي مناسبه محدش ينساها
تقريبا عيد ميلاد صلاح الدين
:)))))

سلامااااااااااااااات

reri said...

الدبور

ههههههههه
ما إنت فكرتني
وطبعا لأن 4/5
عيد ميلاد القائد البطل صاحب الضربه الجويه
صلاح الدين

صح؟؟

شفت أنا فاكره إزاي

منور يا أسامه
سلاماااااااااااات

reri said...

وينكي

فكرتيني بالمذاكره ... الواحد كان بيعلم الصفحات في دماغه
ياللا كانت أيام
الواحد لو قعد يعد الإرتباطات الشرطيه مش هيخلص

ما تقطعيش الزيارات ولا الجوابات
سلامااااااااااااات

reri said...

مشمشه

أهلا بيكي في أول زياره
ضحكني أوي موضوع الجوافه ده
بيني وبينك ريحتها مش ظريفه بالنسبه ليا خالص
مفيش كميا بيني وبينها
ليكي حق تفتكري الدراسه لما تشميها
تحسي ريحتها بتجيب كآبة المذاكره
:))))))

يا ريت تكرريها كتيييييييير
سلامااااااااااااات

reri said...

آخر

حكايات الغريب علي فكره فيلم حلو
فعلا الحاجات دي إتربينا عليها كلنا
جيل بحاله
كبرنا بقي
:))))

منور دايما
سلاماااااااااااات

reri said...

بيشو

أيوه كده فكروني باللي أنا نسيته
:))))
الأغنيه دي بتاعة الماتشات والبطولات
بس في الفتره الأخيره
وخاصة في بطولة الأمم
إستبدلوها بأغنية نانسي
لو سألتك إنت مصري تقولي إيه
وفي إنتصارات الأهلي
أغنية سعد الصغير
الجيل الجديد هيتغير ذوقه خااااااااالص
تطور بقي

منور البلوج يا بيشو
سلاماااااااااااات

reri said...

r o u r o u

أهلا يا رورو
هي هي فعلا
من غيرها مش بنحس بالمناسبه

أول زياره صح ؟؟
إبقي هاتي ودنك بقي كتير
سلامااااااااااااات

queen of girls said...

اه طبعا كلنا مابنحسش بالمناسبات غير لما بنسمع الأغانى
يعنى مثلا لما بسمع رمضان جانا بحس اللى احنا فى رمضان والعيال بتوع الشارع بتاعنا اللظيظ قاعدين يعملوا الشراشيب وشايلين الفوانيس
وبرده لما بسمع أغنيه أهلا بالعيد بتاعه ماماصفاء علطول بحس أن احنا فى العيد ولبسه لبس العيد الجديد وبطلع الشراب الجديد من الدرج اشمعنا بقه الشراب معرفش
ليه
تعرفى تقولى اشنعنا الشراب ياريرى
سلاااااااااااااام يابرنس

واحـــد مـــــن الـنـــاس said...

Van Gogh
ردك جااااااااااااامد
بصراحة تستحق ان ارفع لك القبعة

قلوب حائرة said...

انتي يا بنت يا شقية ازيك عاملة ايه وحشاااااااااني مش شيفاكي ليه ليكي عندي تاج تعالي يالا وحشاني

mesh2dra said...

السلام عليكم

آه
تقريبا نفس
الارتباطات الشرطية
ماعدا رد قلبي


انا عرفت ليه دلوقتى
مبقتش احس بأى عيد او مناسبة
لانى مخاصمة التليفزيون
من فترة كبيرة


تحياتى ليكى
ولعملية الربط اللي قمتي بيها


سلاماتى :)

نفسنا said...

ندعوكم لزيارة العدد الثالث من مجلة نفسنا
ومن لدية القدرة على الكتابة ويريد الكتابة معنا يراسلنا
nafsena@gmail.com

نفسنا said...

ندعوكم لزيارة العدد الثالث من مجلة نفسنا
ومن لدية القدرة على الكتابة ويريد الكتابة معنا يراسلنا
nafsena@gmail.com

زى الهوا said...

سبحان الله نفس الاتباط الشرطى عندى بكل حاجة , بوست حلو وخسارة إن الاجازة خلصت بسرعة كدة

reri said...

شريف الغريب

مش مهم شكل الإرتباط المهم إنه يكون موجود

منور دايما
وعارفه إني مقصره بس والله مطحووووووونه

سلاماااااااااااات

reri said...

van gogh

معك حق طبعا
رأيك صح جدا
أنا عارفه إني بتكلم عن جيلي
والجيل الجاي إن لقي حاجه يرتبط بيها يبقي كويس أوي

خلينا بقي في الإرتباط الشرطي بتاع جيلنا

ما تقطعش الجوابات ولا الزيارات
سلاماااااااااات

reri said...

حصان بري

يا إبني الأجازه عندك إنك تروح لأهلك
هو في أحلي من كده يا محمد

فعلا كل مناسبه عايزه بوست
بس أنا قلت أعمل عناوين

محدش بيشوفك ليه يا محمد
؟؟؟
سلاماااااااااااات

reri said...

صاحب البوابه

ربنا يسهل
بس إنت ما قريتش البوست ولا إيه؟؟

سلاماااااااااااات

reri said...

هنوده

مبسوطه إني قدرت أسمعك الأغاني دي في كلامي
أحاسيس حلوه أوي بتحييها الأغاني دي

منوره يا جميل
سلاماااااااات

reri said...

شمعة أمل

شكرا ليكي علي المرور وكلامك الجميل

كرريها كتييير
سلامااااااات

reri said...

طهقان

ههههه
وإنت طيب يا باشا

ما تقطعش الجوابات ولا الزيارات
سلامااااااااااااات

reri said...

الشنكوتي الكبير

كويس إني خليتك تفتكر المناسبات السعيده كلها
خاصة خطبة عيد العمال طبعا
:))))

شكرا لكلامك يا شنكوتي
إبقي جيب ودنك دايما
سلاماااااااااات

reri said...

sendbad

بس تعود بحبه
بيحسسني بالمناسبه فعلا
بيكملها عندي

ما تحرمناش من مشاركتك دايما
سلامااااااااااااات

reri said...

أبوضحي

طبعا محظوظ مولود يوم النصر
وعيد ميلادك بيكون أجازه
يعني محدش عنده حجه
ويقولك أصلي ما كنتش فاضي

عماله أقر عليك أهو عيني عينك
:)))))

مصر أمانه يا رأفت
والله مشهد جامد بجد

ما تقطعش الجوابات ولا الزيارات
سلامااااااااااات

reri said...

حلاوه

إزيك يا حلاوه
يا اللي سخسخت
هههههههههه
أول زياره
يا ريت ما تكونش الأخيره
هات ودنك كتيييير

سلاماااااااااات

reri said...

حسن أرابيسك

أسعدني رأيك جدا
حبات عقدي هي حبات عقدك وحبات عقود الكثيريين
أنا بس لمتها علي بعضها

شكرا علي المروور
إبقي كررها كتير

سلامااااااااااات

reri said...

مامادو

هههههههههههه
والله إنت عسل يا أحمد
ياللا كويس إني فكرتك بالذكريات الحلوه دي بقي يا إبني

تعليقاتك بتموتني من الضحك علي فكره
سلامااااااااااات

reri said...

الطائر الحزين

حلوه الاغنيه دي برده

ما تقطعش الزيارات ولا الجوابات
سلامااااااااااات

reri said...

اسكندراني في الغربه

حلو الجو اللي حكيت عنه ده
بس إيه الكلب بافلوف ده
وإيه علاقته بالثانويه العامه
وعلاقتهم إيه بقي بالإرتباط الشرطي

:))))

منور دايما
سلامااااااااااااات

reri said...

bos bos

ده إنتي اللي سكر
يا رب تبقي أيامنا كلها مناسبات حلوه

شكرا علي المروووور
سلامااااااااات

reri said...

micheal

وأي ملل
نفس الأفلام من 30 سنه
هي هي
وخاصة بتاعة 6 أكتوبر
يا ريت يولعوا فيها
بتكرهني في اليوم ده من كتر السذاجه اللي معموله بيها
تخيل لو الحرب دي في أمريكا كان إتعمل عليها أفلام شكلها إيه وإنتاجها عامل إزاي

ياللا هنعمل إيه
نصيبنا في الرياده الإعلاميه

سلامااااااااات

reri said...

daktara

إن شاء الله أتابعها

سلاماااااااات

reri said...

the groom

هاااااااااجي
بس الصيف وحره مخلي الواحد كسلااان أوي

أجمل حاجه إن الأغنيه ترتبط بذكري معينه
مش بتنسي الأغنيه دي أبدا
وتحسها إتغنت علشانك

منور دايما
وشكرا إنك فاكر اللي ناسيك
:))))))))

سلامااااااااااااات

reri said...

ضد الظلم

ههههههههههههه
الطلعه الجويه
كانت طلعه منيله بستين نيله
متنيلين فيها لدلوقتي
وكأنه دين وبنسدده
:))))

ما أقدرش أخذلك أبدا
بس إنت هات ودنك دااااااااايما
سلامااااااااات

reri said...

شرم

هي نفسها يا أحمد
كويس

منور دايما
سلامااااااااات

reri said...

أحمد سلامه

ههههههههه
مش ممكن الإرتباط ده يا أحمد
مت علي نفسي من الضحك
أنا مش عارفه الفيلم ده أصلا
بس صحيح إيه علاقته بليلة العيد؟؟؟

فعلا مش بإيدينا
الإرتباط بيحصل غصب عنا
ومش بنعرف إمتي ولا إزي بدأ

منور يا أحمد
سلاماااااااااات

reri said...

أميره ويلز

وإنتي طيبه يا جميل
وكل إرتباط شرطي بمناسبه حلوه وإنتي بخير

ما تقطعيش الجوابات ولا الزيارات
سلاماااااااات

reri said...

queen of girls

ههههههه
مش عارفه
إشمعني الشراب الجديد صحيح
أوعدك لما أعرف هقولك علي طول

إبقي هاتي ودنك تاني كتيييير
سلامااااااااات يا برنسة الجميلات
:))))))))

reri said...

واحد من الناس

عاش من شافك يا علي
اه هو ده جامد فعلا
برفعها معاك

سلامااااااااات

reri said...

قلوب حائره

وإنتي أكتر يا بيبو
هتشوفي التاج ده قريب إن شاء الله

سلامااااااات يا جميل

reri said...

mesh2dra

مخصماه ليه
حاولي تصالحيه
مش هتخسري حاجه

شكرا علي المرووووووووور
سلاماااااااااات

reri said...

نفسنا

إن شاء الله
وميرسي علي الدعوه

reri said...

زي الهوا

دايما كده الأجازه تخلص بسرعه
الأيام الحلوه كده دايما

هاتي ودنك وتعالي علي طول
سلاماااااااااات

catroz said...

ايون يا بنتى هو ده
لازم كده كل مناسبه و لها العيد بتاعها
مينفعش من غير الاغنيه اللى بنسمعها
و الجو اللى بنعيش فيه
بوست سكر اوووى
و بسيط:D

R.R said...

هههههه
والله انتى سكر
تعرفى طبق الاصل اللى انتى قلتيه بحس بيه
ونسيتى تقولى مولد النبى
الكلمه الشهيره
اليوم خمر ونساء وغدا
سنذهب الى يثرب لكى نقتل محمد
ننقض عليه بضربة رجل واحد
ويتفرق دمه بين القبائل
:)
حسستينى فى البوست ده بحاجه روحيه جميله
بوست جميل رشيق اعاده الابتسامه والفرحه اللى
تحياتى لكى رحوووب

shreef said...

بالظبط هوا الارتباط ده لان فعلا الواحد بئى يربط المناسبات بالحاجات ديه يعني لما شوف مثلا رد قلبي اقعد افتكر هو النهاردة ايه و ايه المناسبات اللي جاية قريب و رمضان فعلا فاوله تسمعي رمضان جانا و في العشر ايام الاخرنين تسمعي يا ليلة العيد..دا غير بئى الطريق الى ايلات يا سلام باين الفيلم ده اتصور اصلا في ستة اكتوبر عموما الارتباط ده بصراحة حاجة بايخة جدا و دليل على ندرة الي الحاجات الموجودة اصلا لان مفيش تنويع...موضوع لذيذ و مدونة اجمل..تحياتي ليكي...سلام

أبو ضحى said...

رحاب
انتى فينك؟ عاوزين جديد

------------

ايه اخبار الشغل؟
على فكرة فى صيدليتين عاوزين صيادلة واحدة فى العباسية و التانية فى شارع الجيش
لو ليكى مزاج قوليلى و انا ابعتلك ارقامهم

حسام مراد said...

هههههههههههههههههههههههههه
تصدقى نفس الحاجات لها ارتباط معايا برده

وبالذات يا ريتنى كنت معاهم انا بقه فى المشهد ده بموت على نفسى من الضحك مش عارف ليه

ومشهد رأقت الهجان
مصر امانه يا رافت
وانا رقابتى سداده وهو بيضرب على
قربته مشهد تحفه بجد ومؤثر

ووصفك للارتباطات ده تحفه وبوستك شغاااااااااال

ومعاكى ان اهلا بالعيد سخيفه وغلسه بتاعت صفاء

يلا سلاماااااااااااات رحاااااااااااااال

فوكيره said...

عجبنى اوى الى قرأته هنا

عن الارتباط الشرطى

في حياتنا

وعممته ... لقيت الى جانب كل الى انتى قولتيه والى بجد واقع

انا لما بروح الاسكندريه بفتكر اغنيه لعمرو دياب

علشان كنت في مره بسمعها كتير هناك

وحجات كتير في حياتنا كده
مرتبطه باغنيه بفيلم بجمله
بلون
بشخص

جميل
يا رحوبه

عاشقة الوطن said...

السلام عليكم

ازيك ياريري ياحبيبتى
وحشتينى

كل سنة وانتى طيبة
وكل ارتباط شرطي وانتى بخير
هو فعلا الواحد مش بيحس برمضان غير باغنية عبدالمطلب ولا بالعيد غير لباغنية ام كلثوم

حاجت لها قيمة فعلا

رمضان قرب وهنغنى ان شاء الله كلنا سوا رمضان جانا

سلاااام ياجميل

Rosa said...

yesssssssssssssssssssssssss
the same here
w i guess ya ra7oba all of our generation feel the sameeeeeeeeeeee
bs realt post to7faaaaaaaaaaaaa
:)
miss u

Hadota .. حدوتة said...

السلام عليكم
ايه ياقمر
غايبة فين
وحشتينا
:)

Hannoda said...

ريري فينك بقالك زمان
وحشتينا يا بنتي

Shreif fahmy said...

طيب بمناسبة صدور الجزء الاول من يوميات محتار في السنترال هنسمع أغنية ايه
منتظر تعقيبك على البوست الجديد
http://sfahmy78.blogspot.com/

micheal said...

ألووووووووو

S H A H said...

تحفة بجد الموضوع ده

ده غير ذكرى عبد الحليم و ام كلثوم

فعلا موضوع المناسبات ده في مصر بالذات ميبقاش عيد غير لالغاني دي

reri said...

catroz

طبعا لازم
إنتي اللي باين عليكي سكر أووووووي

سلامااااااات يا قمر

reri said...

r.r

مبسوطه إن البوست رجعلك الإبتسامه
والفرحه يا رانيا
ربنا يسعد أيامك كلها

أما بقي المناسبات دي سبتكوا إنتوا تفتكروها

سلاماااااااااات يا رانيا

reri said...

أبوضحي

أنا هناااااااااا

شكرا يا باشا علي الإهتمام
والسؤال

سلاماااااااااات

reri said...

حسام مراد

أغنية صفاء دي غلسه غلاسه
بس برده لازم الواحد يسمعها
كويس إن نفس الإرتباطات طلعت معاك

سلاماااااااات يا شغااااااااااال

reri said...

فوكيره

لو عدينا الإرتباطات مش هنخلص
في إرتباطات عامه بتلاقي الكل مرتبط بيها
ده غير بقي كل واحد له إرتباطاته بتاعته زي عمرو دياب عندك
أنا بس بنعش الذاكره عندكوا
لكن لو عديتي مش هتخلصي

أول مره يا فوكيره يا ريت ما تكونش الأخيره
سلاماااااااااات

reri said...

عاشقة الوطن

وإنتي طيبه وبخير يا رضوي
ده أنا فرحانه بشكل إن رمضان قرب

منوره دايما يا جميل
سلاماااااااااااات

reri said...

rosa

كويس إنها نفسها معاكي
هي فعلا مع كل جيلنا

ما تقطعيش الزيارات ولا الجوابات
سلاماااااااااات يا روووووز

reri said...

حدوته

شكرا علي السؤال يا جميل
والله إنتوا وحشتوني أكتر
هتعرفي سبب الغيبه لو قريتي البوست الجديد

سلاماااااااات يا قمر

reri said...

هنوده

أنا جيت أهو يا هند
شكرا يا جميل علي الإهتمام والسؤال

ودايما كده هنا
ماشي
سلامااااااااات

reri said...

شريف فهمي

هروح أقراها طبعا يا شريف
وأقولك الأغنيه المناسبه

منور دايما بدعواتك
سلاماااااااااااات

reri said...

micheal

أيوااااااااااااااا
ولا ألوووووووووووووو
ألوووووو يا مركز
:)))

شكرا علي السؤال يا مايكل
سلاماااااااااات

reri said...

shah

إحنا ورانا غيرها
نزعل نغني
نفرح نغني
نتهزم نغني
ننتصر نغني

منور يا شاه
سلامااااااااات

dramaqueen said...

بوست رائع يا رحاب
وفعلا كلامك كله صح
ومش بنحس بالمناسبات دى غير لما نسمع اغانيها

عمرو فكرى said...

لذيذ البوست ده

عمرو فكرى said...

انا كنت جاى اعلق ع البوست ده واقول انه بوست لذيذ

لقيتنى معلق نفس التعليق بالظبط من سنتين تقريبا!