Tuesday, April 17, 2007

بحبك يا مدونه

خنقه وضيقه .... وأحاسيس كتير ملخبطه كتير مسيطره عليا....هبدأ شغل جديد في صيدليه... وكعادتي حاسه إني مش هكمل.... التعامل مع أصحاب الصيدليات بيجيب حالة قرف... كلهم زي بعض... قبلت فقط من باب إني لازم أشتغل... أنا مش بحب مهنتي للأسف...... مش بحس بنفسي فيها... أنا من النوع اللي مش بقدر أتظاهر بعكس ما بداخلي... وفي مهنة الصيدلي لازم تتعامل مع كل نوعيات البشر... تستوعبهم... تتحمل كلامهم الممل أحيانا... لأ مش أحيانا... ده علي طول... مطلوب مني أضحك في وشه حتي لو إنسان خنيق وممل... مطلوب مني أسمع شكوي الستات الفاضيين... اللي تيجيي تقولي أنهو أحلي شامبو بانتين ولا صانسلك؟؟؟... و أنا ممكن أكون ما إستعملتش الإتنين!!!.. بس تقول إيه في ستات رخمه ورجاله رزله الراجل منهم يبقي عارف الدوا ده بتاع إيه وبياخده من قرن وقال بيختبرك ويتفذلك ويسألك هو الدوا ده مضاد حيوي... وهو دوا الضغط بتاعه... لو قعدت أعد سخافات الناس مش هخلص... مطلوب مني أجامل البنات وأتكلم معاهم... حتي لو كلامهم بايخ وتافهه... مشكلتي إني بمل بسرعه جدا... وفي ناس بتبقي داخله متخيله إنك مفروض تقعد تسمعه .... و طبعا لا تظهر ضيق من كلامه... ببقي هاين عليا أقوم أضربه ...... صدقوني لو إنسان مريض عمري ما هحس بالأحاسيس دي.... بس الناس بقي عندها حاله كده من فرض النفس بطريقه مستفزه... كلام كلام كلام... يفضل يرغي في أشياء لا يستهوني الكلام فيها... ومطلوب من رحاب إنها تسمع وتتأثر وتبين تأثرها حين تحكي أحدهم عن رحلتها في محاولات تبييض بشرتها .... وتضحك رحاب حين يحكي أحدهم حاجه سخيفه تضحكه......و تلك ليست طبيعتي.... أنا في الفتره الأخيره أصلا زاد موضوع مللي السريع... إخترت أن تكون رحاب داخل رحاب..... أراحني هذا الإختيار.... يزعجني التداخل... يزعجني الكلام وكثرة السؤال... وهذا أكثر أسباب لجؤئي للتدوين .... أحببت مدونتي .... أري فيها روحي ونفسي .... أتنفس حين يدخلها أحد يشاركني التنفس.... لا أري فيها الشكل المزعج في التعاملات الخارجيه للبشر.... أقول ما أشعر به دون خجل... أري أناس جدد... تمنيت لو القدر جمعني بتلك العقول .....لا أحب النفاق.... وأشعر أن هذا ما تحتاجه مهنتي حتي أصبح إنسانه ناجحه في هذه المهنه..... حاسه إن البوست ده ملخبط.... بس يمكن علشان بيعبر عن اللخبطه اللي جوايا... بحبك يا مدونه... أشعر بالراحه وأنا أكتب علي الكيبورد كل ما يجول في نفسي دون تجميل الذي أضطر أن ألجأ إليه في صخب الحياه..... مش عارفه العيب فيا إني مش بقدر أجاري الناس المختلفين عني تماما.... لا أستطيع أن أتواصل مع من لا أجد بيني وبينه مساحه من الإتفاق ولو حتي 1%... لا أستطيع أن أظهر شئ وأنا عقلي في شئ آخر....هذا ما أعاني منه علي أرض الواقع

و أخيرا ... عايزه أقولك سر يا مدونتي.. بس إوعي تقوليه لحد ... و هو
إني بحبك يا مدونه
يا اللي أنا إنتي ... وإنتي أنا


74 comments:

Mohamed A. Ghaffar said...
This comment has been removed by the author.
Mohamed A. Ghaffar said...

انا اللى لغيت تعليقى لخطأ فى الكتابه كالعاده يعنى

هو ده مجتمعنا

فإن لم تكون ما تحب ، فحب ما تكون

تحياتى لك على هذه البساطه والصراحه

خواطر شاب غاضب said...

علي فكره لازم تحبي شغلك
حتي لو مش بتحبيه حسي انك بتحبيه
لانه شي لابد منه
احنا عايشين ولازم نتغلب علي كل حاجه بتضايقنا لان الحياة ممكن تقف
لو احنا فضلنا نفكر في كل حاجه بتضايقنا
التوقيع
صحفي مجنون جدا
ياريت تبقي تشوفي مدونتي
وتردي عليها

مصر هى أمى said...

رحاب

أري فيها روحي ونفسي .... أتنفس حين يدخلها أحد يشاركني التنفس.... لا أري فيها الشكل المزعج في التعاملات الخارجيه للبشر.... أقول ما أشعر به دون خجل... أري أناس جدد... تمنيت لو القدر جمعني بتلك العقول

اكتر حاجة عجبتنى فى البوست بتاعك فعلا المدونة مساحة جميلة وحلوة جدا من الحرية تقدرى تكتبى براحتك

بس هرجع واقولك لازم تحبى الشغل بحلوة ومرة بسخافاته لازم تحبية لانه مكتوب عليكى

حب ما تعمل حتى تعمل ماتحب

الناس السخيفة ديه حاولى تستفيدى منها وتتعلمى تتعاملى مع الطبائع المختلفة من البشر

انا كمان بحب مدونتى اوى وبحب مدونتك كمان

•«ρяoιd»•™ said...

ربنا يوفقك يا رب

و تبقي عندك الصيدليه بتاعتك لوحدك

و متجبيش فيها شامبو

الكلام اللي بجد بقي

عجبتني الجمله بتاعة

اخترت أن اكون رحاب داخل رحاب

مفيش اجمل من كده اصلا

انك تلاقي نفسك جواكي و ترتاحي ليها

اما بقي المدونه

فده عشقنا كلنا

المدونه بتعبّر عننا

هي احنا بجد

تحياتي

Tamer Nabil said...

هنعمل اية يارحاب

لقمة العيش عايزة كدة


ربنا يوفقك ويصلح ليكى الحال

تحياتى

el_assel said...

هــــاي رحاب
وانتي ايه اللي يجبرك علي التعامل مع الناس دول
ليه ما تكونش العلاقة علاقة شغل وخلاص
يدخل ياخد الدوا اللي عايزه ويمشي
وخـــــــــــلاص
حتقوليلي ازاي
ده عن طريق معاملتك ليهم
ممكن تحسسيهم ان انتي مخنوقة منهم بس بظرف
بس اعتقد ان دي حاجةمهمة علشان تعرفي تعيشي

Ahmed Shokeir said...

إحنا بطبيعتنا كده نحب ناخد من حد أي حاجة اي معلومة نختبر معلوماتنا ده مش في الصيدلة بس لو حد اتعرف عليكي وعرف إنك دكتورة لازم يسألك فيه التهاب بين صوابع رجلي اليمين أعمل إيه ولو دكتور قلب قلبي يادكتور حخاسس ان فيه نبصة زيادة
ولو موظف في بنك يبقى السؤال هو البنك بتاعكوا بيدي فايدة كام ولو امام الجامع مافيش مانع من فتوى ع الماشي ولو بتاع بطاطا تبقى الكبيرة احلى ولا الصغيرة

لازم تتكيفي مع الحال لو اخدتي بالك من كل نقطة هاتتعبي في حياتك او

واخيرا اذا كانت المدونة براحك فحذاري من التعليقات والمجاملة والصداقات التي تصل بك احيانا الى خنق جو الحرية للأخذ في اعتبار من توطدت علاقتك بهم في دنيا التدوين عندما تكتبين

Ahmed taher said...

رحاب
يا من تبحثين عن نفسك دائما...
الحياة مليئة بما هم مختلفون عنك
حتى وان احببتي فقد تختلفين مع من تحبين
رغم حبك له او لهم او لها
اعلم ان قناعاتنا الشخصية تؤثر على مظاهر حياتنا ومنها بالطبع عملنا
فمن منا لا يحب ان يعمل ما يحب وان يترك ما يكره ...ولاكن اذكرك انها قد تكون قناعات منقوصة يمكن ان تتغير بمرور الوقت ومع تراكم الخبرات ..وان كنت اتفق معك في ان كثيرون هم من يستظرفون الان ولا يدركون انهم يتجاوزون ..
تحياتي
..وانتظر مشاركتك عندي ان كنت تحبين..

Anonymous said...

ليه مفكرتيش انك تشتغلى فى شركة ادوية بما انك مش حابه الشغل فى الصيدليات؟

Anonymous said...

رحااااااااااب
حاسه انك كاتبه البوست ده ليا بالظبط
بوافقك كل الكلام الى قولتيه لانه كله كله بجد كله انا..تعرفى انا كمان مش حابه شغلى كمدرسه ومش لاقيه نفسى فيه..بس فى حاجه..لو فضلنا مكتئبين بس يبقى مش هنعمل حاجه ومش هنتقدم خطوة..ليه متحاوليش تدورى على حاجه تانيه فى مكان تانى من غير ماتسيبى الصيدليه.....واهى تصبيره لحد ماتلاقى الى نفسك فيه
حاسه انك خدتى الكلام من راسى ونشرتيه:)
بادعيلك من كل قلبى تلاقى الى نفسك فيه..انا وانت واكيد زينا كتيير
سلامى ليكى يا جميل

Anonymous said...

أنا أول مرة أتكعبل في المدونة بتاعتك :) وعينيكي ما تشوف إلا النور :))) كله إتقرى وهل من مزيد :))) أنا مش متعود أجامل أو بمعنى أصح جاف بما فيه الكفاية :)) لكن أنا عجبتني الأفكار وتوافقت معها تقريباً كلها "عشان برضه الواحد يحتفظ بشخصيته :)"

المهم أن المدونة رائعة وغرقينا بالجديد :))

safa7_karmooz said...

هوا تقريبا انتى بتشتغلى عشان تجيبى فلوس...والفلوس تجيب مم ..اكل يعنى ..فلازم الواحد يستحمل ...

وزمان كنت بشتغل شغلانة..او لنقل تمرين عشان اكون محامى...جالى فقع وشلل من نوعية الناس اللى هتعامل معاها...فيكفى انى اتخرج...واشتغل اى حاجه

نيجى للشعر والغزل اللى كتباه فى مدونتك...وقد ايه بترتاحيلها...عشان كده اغلبنا عمل مدونة...عشان نبقى على طبيعتنا...نتخلص من القيود الغريبة المفروضة علينا

نبقى على راحتنا ...ومحدش باصص للى بنعمله وبينق علينا...صدقتى على فكرة فى كلامك انك بتحبيها ...

كلنا كذلك

سعدت بزيارتك...:)

إبـراهيم ... معـايــا said...

حــلو قوووي إحساسـك بالأشياء ، حتى لو كان سلبي يا رحـاب . . . .
.
.

وكويس إنك عملتي مدونة(إذًا ) بوست بسيط وجمييل قوي

تحيااااتي

reri said...

mohamed a.ghaffar

شكرا علي النصيحه اللي هحاول أعمل بيها..هحاول أتكيف وأحب ما أكون ولو أن الأمر ليس سهل.. ومنورني

سلامااااااااااات

reri said...

خواطر شاب غاضب

يا صحفي يا مجنون جدا لو كان الموضوع في إيدي كنت أكيد هحبه بس حقيقي غصب عني.... هحاول وربنا يسهل... وإن شاء الله هدخل مدونتك وهرد عليها.. سعدت بزيارتك

سلامااااااااااااات

reri said...

مصر هي أمي

مش عارفه يا محمد إزاي أحبه... ممكن أتحمله وأتكيف معاه... والله بحاول بس زي ما قلت في البوست التعامل مع البشر وتحملهم بيحتاج لمهارات خاصه من الممكن أن تلك المهارات تنقصني... والواحد طول ما هو عايش بيتعلم... شكرا علي نصيحتك ... وأنا كمان بحب مدونتي وكمان بحب مدونتك علشان هي فعلا مدونه حلوه

سلامي ليك يا محمد

reri said...

proid

يا رامي يا موهوب... يا أبو آر مقلوبه .ههههههههه.... ربنا يسمع منك ويبقي عندي صيدليه ولو إني هعاني برده من سخافات البشر التي لا تنتهي... وفعلا كل واحد فينا مدونته هي نفسه جزء منه... نورتني

سلاماااااااات يا فنان

reri said...

tamer nabil

آمين يا رب ... يا عم إنت غيرت صورة الطفل ليه؟؟؟ كانت جميله.... ياللا فعلا الحياه من غير تعب ما تبقاش حياه
شكرا ليك يا تامر... وما تقطعش الزيارات

سلاماااااااات

reri said...

el-assel

أولا أهلا بيك يا كريم في أول زياره ليك في المدونه... يا ريت تتكرر.. ثانيا كلامك صح وهو ده اللي أنا عايزاه... بس في الواقع صعب... صعب إني أظهر ضيقي من هؤلاء الناس... هتقولي ليه... هقولك الصيدليات دلوقت بقت أكتر من الهم علي القلب... اللي بيخلي ده يجيلك وما يروحش لغيرك هي المعامله... يعني لازم تبقي لطيف مع الرذل... تعامل الخنيق الممل بظرف وكأنه أخف دم في العالم... حاجات كتير كده... وده اللي أنا مش بقدر عليه

سلامي ليك

reri said...

ahmed shokeir

أهلا بيك يا بشمهندس أحمد... بجد زيارتك لمدونتي المتواضعه فرحتني جدا...أنت من الشخصيات التي تجبر أي مدون علي إحترامه...و كلامك عن طبيعة الناس فعلا بلاحظه... وشكرا علي النصيحه اللي أكيد هاخد بيهاوأنا لسه في بداية التدوين... بس تصدق يا بشمهندس أحمد أنا عمري ما علقت علي بوست إلا لما يكون عاجبني.... و عمر ما علاقتي بالمدونين هتقيد حريتي أوز هتخليني أجامل إن شاء الله... مبسوطه جدا إنك نورتني .. وأتمني إنها تتكرر

سلامي ليك

reri said...

ahmed taher

منور البلوج في أول زياره... مش عارفه ليه قريت تعليقك أكتر من مره... يمكن لأنك ما طلبتش مني أحب شغلي بطريقه مباشره... إسلوب ردك أصلا مختلف... يمكن شدني الإسلوب.. مش عارفه.. كلامك عن الإختلاف والقناعات المنقوصه التي تتغير وتتبدل بالزمن أعجبني... أتمني أشوفك تاني

سلامي ليك

reri said...

pakinam naser

أهلا يا باكي... شغل الشركات برده مليان مشاكل... وأديني بحاول... إدعيلي
ما تقطعيش الزيارات

سلامااااااااات

reri said...

shyma

ههههههههههه... يعني أنا دخلت دماغك .. كويس إن اللي بيدور في عقلي بيدور في عقل ناس كتير... سعيده إني عبرت عن اللي جواكي...أنا والله يا شيماء ليا تكليف وبشتغل فيه الصبح... الصيدليه دي بعد الضهر..لأني لو إكتفيت بالتكليف يبقي هنسي كل الأدويه .. وهتبقي حالتي صعبه..أنا ما عمرتش في ولا صيدليه... الملل بيصيبني بسرعه.. وأختار الرجوع للبيت... والله بحاول أروح مكان كويس... إدعيلي يا شيمو

سلامي ليكي

reri said...

anonymous

شكرا ليك يا اللي ما بتعرفش تجامل... بشكرك علي رأيك في المدونه... ويا ريت تتكعبل فيها كتير.. ههههههه.. سلامي ليك

smraa alnil said...

تصدقي
كنت في صيدلية قبل كدة
واتنين دخلوا ولمدة ربع ساعه بيسالوا هو انهي شامبو افضل
تكونيش انتي اللي كنتي واقفة ههههههه

عارفة انا كمان بحب مدونتي اوي اوي اوي
كفاية اني لاقيت فيها نفسي

اوعي تكوني غير نفسك يا رحاب
ولا تجاملي ولا تجملي نفسك
هترتاحي اوي
ومعلش يا بنتي اكل العيش مر
وكاس وداير علي الكل
تلات اربع الشعب مش بيحب تخصصه بس هنعمل ايه بقي

reri said...

safa7-karmoz

نورت البلوج... هذا قدرنا
واضح إني لازم أتحمله... عايزه أشوفك تاني

سلامااااااااات

reri said...

إبراهيم معايا

شكرا يا إبراهيم... ما تقطعش الجوابات ولا الزيارات

سلامااااااااااات

reri said...

samraa alnil

ههههههههههههههه... شوفتي يا أنوج بعينك... علشان تعرفي... الواحد بيعاني..... المشهد ده بيتكرر في كل الصيدليات تقريبا... نصيحتك إنتي وأستاذ شقير غاليه عندي أوي... بس يا إنجي أنا لجأت للتدوين علشان بجد عايزه أبقي نفسي.. وده اللي عجبني في التدوين... عجبني لا تجاملي ولا تجملي نفسك ... صدقيني هفضل رحاب

سلامي يا أنوووووووج

micheal said...

و أنا كمان بحب مدونتي و بحس فيها نفس الاحاسيس
حنستناكي في اللقاء الشهري القادم لتحقيق عنصر التواصل
تحياتي لكي

Ahmed taher said...

عزيزتي ريري
سعيد بردك على تعليقي وسعيد اكثر لاحساسك انه مختلف وان كنت لم اقصد ان اكون مختلفا فقد تحدثت على طبيعتي ...
ثانيا اشعر انك مشتتة وانك لم تجدي بعد ماتريدية بالفعل ويحقق احلامك او ما تحبين ..ولاكن
قصدي لك ان الحياة مليئة بالمتغيرات وانا هنا لا اتحدث من برج عاجي بل من خلال تجارب شخصية عشتها سواء معي او مع غيري وان كنت مؤمنا تمام الايمان ان كل تجربة شخصيى هي حالة فريدة لصاحبها ولا ينبغي ان نعممها ...
لذلك نصيحتي لك ان تحاولي ان تحبي مهنتك قد يكون العيب فيكي انت ... الم تفكري في ذلك واذكرك ان الناس موجودون في كل مكان فلن تهربي منهم حيث لا يمكنك او يمكننا جميعا العيش بدون انفسنا او غيرنا ...
عزيزتي
قد يكون الحاجز النفسي الذي نبنية داخل انفسنا تجاه شئء معين هو السبب الرئيسي لبعدنا او كرهنا لهذا الشئ
لذلك فحاولي ان تجاهدي نفسك اولا قبل ان تبحثي عن شئ اخر قد يكون الخخل بداخلنا نحن ولا ندري ولا نعلم ...
اعلم ان انك تستدلين كثيرا بقلبك للحكم على الاشياء
ولاكن همسة في اذنك ليس القلب دائما صادقا ...لانه قد لا يكون القلب بل النفس هي التي تحركنا ...
عزيزتي التدوين رغبة جميلة او وسيلة لكي نظهر بها ما بداخلنا بصدق ولاكنه ابدا لا يجب ان يعزلنا عمن حولنا والا سيكون الصدام هو النتيجة الاكيدة.
تمنياتي لك ان تجدي دائما نفسك وما تحبين ....
اتمني مشاركتك عندي
http://atcreation.blogspot.com/
taher2all@hotmail.com

حسام مراد said...

لازم تحبى الشغل لازم عشان هو كمان يحبك انت طول مانتى بتكرهيه هيجيلك ناس غلسه زىى بتوع الشامبوو دول ههههههههه ناس غلسه بجد انا لو مكانك كنت ضربتهم
وان شاء الله ربنا هايتوب عليكى ويبقى ليكى صيدليه وتكتبى يافطه ممنوع الشامبو زىى ممنوع التدخين كده

سلااااام يا رحاب بجد سعدت لزيارتك مره اخرى وهابقى زبون دايم هنا بس مش هاشترى شامبو ههههههههه

سلااااااااااااااااام

حصان بري said...

واضح انك خجوله قوي ومابتكسفيش حد وده اخر المطلوب في مهنه الصيدلي
بيني وبينك النوعيه اللي بتتكلمي عنها من البشر يحبوا قوي اللي يطنشهم
مش هقولك طنشي او اسمعي
امشي باللي تحسيه
سالك ايه احسن شامبو قولي بيني وبينك كلهم زي بعض
حكالك قصه حياته ومش عاجباكي ياما تكلمي زبون تاني ياما تدخلي الصيدليه جوه وتطلعيله فهيبدا يختصر

حلو قوي انك بتكتبي اللي بتحسيه من غير فلاتر.
وبالنسبه لموضوع الحب
شويه بس لما يبقي لك صيدليه خاصه وتحسي بنتيجه تعبك بتكبر صيدليتك هتحبيها
ولغايه ماتحوشي القرشين او تتجوزي مليونير وتلاقي مكان فاضي
انتي بتتعلمي وبتساعدي ناس وده لوحده شيء ممتع.
اسمك غالي قوي يا رحاب وشكلي هتابعك

daktara said...

المدونة برضه بتشكر فيكي قوي وبتقول انها هي كمان بتحبك جدا

واحد من الناس::طارق:: said...

معلش يا رحاب ..الواحد ساعات كتير إن ماكنش دايما بيقى مضطر يشتغل فى حاجة مش شايف نفسه فيها .. معلش ظروف البلد ونظامها وتعليمها هو اللى بيخلق الحالة دى.. بس عارفة ..ممكن برضو جنب شغلك اللى مش بتحبيه دة تشوفى انتى بتحبى ايه وتعمليه ..هايخفف عليكى كتير قرف الشغل اللى مش بتحبيه

بخصوص المدونى يا ستى .. فاياريت فعلا كل واحد يتغزل فيها شوية ويطبطب عليها ويفتكر هى اد ايه وقفت جنبه وبتقدر تخرجه من القرف اللى هو فيه واد ايه عرفته على ناااس كتير حلوة وجميلة .

تحيااااتى ليكى

Anonymous said...

ليكى عندى تاج يا جميييل
تعالى خديه وهاستنى الرد
سلااام

REEMOO said...

حب ما تعمل حتى تعمل ما تحب
حكمه
بس اعتقد انها صحيحه نوعا ما
ربنا يوفقك
انا سعيده انى قريت مدونتك
تحياتى

reri said...

micheal

منور ...إن شاء الله نتقابل في اللقاء الشهري القادم... بجد في ناس كتير نفسي أقابلهم

سلامي ليك

reri said...

ahmed taher

أهلا بيك يا أحمد... لما قلت إن تعليقك مختلف أعرف أنك لم تتعمد ... إسلوبك مختلف... أشعر بأنك تخاطب نفسي... من الواضح إنك تحب الإبحار في النفس البشريه.. وده واضح كمان من البوست بتاعك اللي لسه معلقه فيه حالا... بشكرك علي نصيحتك ... من الممكن أن يكون العيب عندي... والدليل أن هناك غيري الكثيرون من يعملون في نفس المجال ويشعرون بسعاده .... سأحاول أن أتصالح مع نفسي وعملي ومع الآخريين.. فقط أفضل البعد حاليا.... يريحني علي الأقل حاليا

شكرا علي المتابعه الجميله

reri said...

حسام مراد

بص يا شغال ... إن شاء الله لما ربنا يفتحها عليا ويبقي عندي صيدليه هخليك تشتري شامبو... يعني هتشتريه... بالعافيه... ههههههههههههه...بس ما تسألش أنهو أحلي... ههههههه... سعدت بزيارتك يا شغال وإنك قررت تبقي زبون هات ودنك

سلاماااااااااات

reri said...

حصان بري

هههههههههههههههه... والله نصايح جامده... إنت تديني دروس أتعامل مع الناس الغلسه إزاي... موافق... ههههههههه... و أديني بخسر زباين الصيدليه وبكسب زباين المدونه...هههههههههه... بس بجد كلامك عن إني بتعلم وبساعد الناس فيه دعوه إني أبص للنصف الممتلئ في الكوب... أصلي بعيد عنك دايما ببص للنص الفاضي... شكرا علي قرار المتابعه بعد أول زياره

سلامااااااااااااات

R.R said...

رحاب
انا كمان بحب المدونه لانها بتاخد منى وكمان بتدينى اكتر

تعرفى احيانا الواحد بيزهق بسرعه من التعاملات مع ناس مختلفين عنه
طيب ايه رايك لو فعلا سمعتيهم كويس وعشتى مع كل واحد وواحده حالته
هيفيدك جدا الموضوع ده
وممكن تحسى بمتعه اما تشوفى ناس بعقول واهتمامات تانيه
وهتتعلمى منهم كمان

واهو كله هيزود خبرتك
جربى وشوفى

تحياتى لتعبيرك عما بداخلك

A.SAMIR said...

رحاب:
انا كمان صيدلي واسمحي لي احكي تجربة بسيطة في الموضوع دة
اول ما اتخرجت من الكلية كنت بحس نفس الاحساس بتاعك دة وكتير جدا ماكنتش بطيق الناس وصادفت احباطات كتيرة جدا...بس عارفة دة كان ليه:
لأني ماكنتش بشتغل في المكان بتاعي ..في مالي زي مابيقولوا
انما تأكدي يوم ما ربنا يكرمك وتفتحي الصيدلية الخاصة بيكي هتكوني مبسوطة ومرتاحة وهتستحملي الناس وهتحبي شغلك وهيبقى على قلبك زي لعسل
تحياتي ليكي

الربان said...

تحياتي

أعرف تماما ما تعانيه لاني ببساطه في نفس موقفك.... و هو أيضا موقف اي شخص يتعامل مع الجمهور.... و انتي محقه تماما في ما تشعرين به من ضيق و خنقه..

اسمحي لي ان اذكر لك بعض الحلول التي يمكن ان تخفف عنك بعض الشيء...

1- ان كان المتحدث معك...بيسأل بجدية عن طريقة الاستخدام مثلا...او الاعراض الجانبية للدواء...او اي سؤال اخر يختص بطبيعة الدواء و استخدامه..فهذا حق له... لانك ببساطة دكتوره...و ليست بائعة في سوبر ماركت...يقتصر دورها علي ترتيب السلعة ..

2- إذا كان الحديث خارج المضمون..مثل الشامبو مثلا...و أيهما افضل... ببساطة و وضوح ...و حتي تقطعي الحديث ، قولي ان المادة الفعالة تقريبا واحدة...و الاختيار مسألة شخصية بحته.
بهذا تكوني رديتي الكرة الي ملعب السائل و انهيتي الموضوع.

3- إذا كانت بعض الفتيات أو السيدات يتحدثن اليك في بعض الامور... و كنتي تستطعين ارشادهن او نصحهن، و لديك قليل من الوقت ، فلا تترددي ان تسدي اليهن نصيحة سهلة و مختصرة .

4- في كل الاحوال...و بكل آدب يمكنك التظاهر بانك ستجرين مكالمة هاتفية
او ستعيدي ترتيب بعض الادوية في اماكنها...فيفهم المتحدث انك مشغولة..

5- ختاما لنتذكر جميعا الحديث القدسي فيما معناه : انا لله عبادا اختصهم بقضاء حوائج الناس ، حببهم في فعل الخيرات و حبب فعل الخيرات فيهم ، اولائك الامنون من عذابي يوم القيامه.
نسأل الله ان نكون جميعا من هؤلاء الامنون.
تحياتي

متغيرة شوية said...

نفسي أشوف صيدلي بيحب الصيدلة..
يابنتي متقفلوا الكلية دي

المهم يعني ، زي ما بقول لواحدة صحبتي صيدلانية كده ومش طايقة المهنة ، دي وسيلة مش غاية .. بتستحملي القرف ده علشان يبقى معاكي فلوس تعيلي بيها نفسك وتعملي بيه اللي انت عايزاه

المهم انك تستمتعي بالوقت اللي مش مطلوب منك فيه حاجة ومتضيعيش ثانية

reri said...

daktara

ههههههههههههه... ياسيدي ربنا يكرمك إنت والمدونه اللي ما بتجيبش سيرتي غير بالخير.... من القلب للقلب رسول

سلاماااااااات

reri said...

واحد من الناس طارق

ظروف البلد... فعلا ظروف بلد بتفرض علي الواحد يعمل كل حاجه ما بيحبهاش... و يا ريت كل واحد يعرف فضل مدونته عليه.. منور يا طارق

سلامااااااااااات

reri said...

shayma

ماشي يا جميل هخده وهرد عليه إن شاء الله

سلاااااااااااام

reri said...

reemoo

هحاول يا ريم ... سعيده بأول زياره يا ريت تتكرر

سلامااااااااااات

reri said...

r.r

رانيا بجد كلامكوا لفت نظري لحاجات بعيده شويه عن تفكيري... جايز فعلا أنا شايفه الموضوع بنظاره سوده... مش عارفه..يمكن لأني مش حابه مجالي فده مخليني شايفه كل الجوانب السيئه في الموضوع.. مش عارفه برده... شكرا للنصيحه يا رانيا... وربنا يسهل وأقدر علي الأخذ بيها

سلامي ليكي

reri said...

a.samir

كلام والله إداني أمل... عارف الصعوبه دلوقتي في إيه؟... إني بنزل الشغل وأنا حاسه إني رايحه أقضي واجب دمه تقيل أوي علي قلبي... بكون زهقانه... نفسي أبقي نازله مبسوطه... بس ما دام إنت بتقول إن ده كله هيتغير لو كنت في صيدليتي... مصدقاك .. ما دام ده حصل معاك..إمتي ييجي اليوم اللي يكون شغلي علي قلبي زي العسل... ربنا يكرمك يا رب

سلامي ليك

reri said...

الربان

أشكرك علي النصايح التي بالفعل أفادتني
نورتني..و فعلا مع كل تعليق من التعليقات بكتشف إني شايفه الحكايه من الناحيه السوداء فقط... ما تقطعش الزيارات

سلاماااااااات

reri said...

متغيره شويه

هههههههههههههه... معظمنا بيكرهها لأنه دخلها لمجرد إنه جاب مجموع عالي... مش لأنه حابب الحكايه... بس هنعمل إيه يا سلمي؟؟... محدش مرتاح

سلاماااااااات

صاحب البوابــة said...

بساطة في التعبير

ورقة في المشاعر

تحياتي لهذا البوست الرائع

Anonymous said...

رحااااااااااب
انتى فيين
ليكى تاج يا جميل
تعالى خديه
سلام

sendbad said...

اللخبطة بداية للتصحيح اي حاجة في الدنيا كانت بدايتها غامضة ومش مفهومة يعني بمعني اخر دي حاجة صحية

إبـراهيم ... معـايــا said...

الناس اللي نايمة ف المدونة ، تقوووووووووووووم :)

sherif gharib said...

انا اول مره ازور المدونه عندك
انا بجد حاسس قوى باللى انتى بتقوليه لانى برده خريج طب و جربت وقفه الصيدليه ديه و حواراتها وخصوصا اوقات الملل اللى بتمر فيها من الناس و لما الجو يبقى فاضى و الواحد لازم يفضل قاعد على كرسيه و خلاص
يجامل ده و يعالج ده
بس الواحد لما بيكتب بجد بيلاقى نفسه لانه ببساطه بيشيل كل اللى جواه و بيرميه على هيئه كلمات بتعبر عن اللى جواه فى كل شىء
تحياتى يا دكتور ليكى و لمدونتك

إبراهيم محسن said...

ريري

قولي وفضفضي ولخبطي وكلنا اذان صاغية لكلامك

حاولي تستحملي الناس زي بعضه
هو سوق العمل كده تنازلات حتى عن اهم الاشياء للوصول للنجاح
نستحمل لحد ما نبقى على ارض ثابته

ريري
علشان نكسر حاجز الملل
فيه حفلة جاية
يوم 29
المرة اللي فاتت بابا كان جاي
اعتقد بابا المرة دي مش هييجي من السفر اليوم ده بالذات
:)

الحفل القادم يا رحاااااااب
التفاصيل في مدونتي
منتظر تشريفك يا جميل

عاشقة الوطن said...

ريري حبيبتى
وحشتينى كتير

بس حلو اوى على فكرة البوست الملخبط ده
وعلى فكرة احنا كمان بنجبك زى ماانتى لتحبي المدونة بتاعتك الحلوة

واحنا فعلا مابنلقيش راحة زى الراحة اللى بنلاقيها على المدونة

سلام ياقمر

أبو ضحى said...

رحاب
يظهر انى جيت متأخر..لأنك كتبتى بوست جديد، معلش انتى عارفة سبب التأخير..

على سبيل المصادفة أنا بردو مش بحب المجال ده..أراك تبتسمين
(:
كالعادة دخلتها لأن مجموعى جابنى ليها..و لم أحبها و لم أحس بنفسى فيها أبدا..يقولولن بأن شكلى دكتور من الألف للياء
لكن هى بالشكل يعنى و لا ايه

كان نفسى أكون شاعر أو صحفى أو ممثل أو مخرج
كان نفسى يكون مجال عملى فى الكتابة و الفن..و ده المجال اللى حاس انى انتمى له
على العموم هى الدنيا كده..مش لازم تمشى زى ما احنا عاوزين فى كل حاجة

بس عشان الواحد ميكونش سلبى و يقضى باقى حياته فى حاجه مش بيحبها و مش لاقى نفسه فيها ،لازم يدور على اللى بيحبه و يعمله و ان كان مجرد هواية بجانب عمله المفروض عليه

انتى بتشكى من كترة كلام الناس و رغيهم طيب تعملى ايه لو ده كان بيحصل معاكى و انتى واقفة فى صيدليه كبيرة و معاكى مية حاجة لازم تعمليها فى نفس الوقت..أنا شغال فى فرع من فروع سلسلة من الصيدليات المعروفة و بيبقى قدامى ناس محتاجة اصرفلها دوا و تليفونات لازم ارد عليها عشان اخد اوردرات دوا و احضرها للدليفرى عشان يوصلها و ما أدراك ما هى مكالمات التليفون دى..الواحد منهم بيبقى قاعد فى بيته و جنبه كباية الشاى وله مزاج للرغى و السؤال عن كل حاجة فى التليفون و انا ببقى على اخرى و عايز اقفل معاه عشان اشوف الزباين اللى واقفة قصادى عشان امشيهم و محدش فى النهاية عاوز يصبر على الواحد و بعد ما يقفل معايا التليفون ابص الاقيه بيتصل بعدها بشويه يقولى الاوردر مجاش مع ان المسافة بيننا و بينه تاخد اكتر من كده وقت بكتير ..ببقى نفسى اقوله ان الدليفرى عندنا بيجيلك بفسبة مش بطيارة

و حاجات كتير من القرف الابدى ده

صاحب المال اصله مش عاوز يوظف ناس كفاية و ده بيخلى علينا ضغوط كتير و دى حاجة تقرف بجد

على فكرة برغم انى لا احب المجال الا انى من اسبوع مضى بدأت العمل فى صيدلية تانية بجانب عملى فى الفرع اللى انا فيه..يعنى فى الاخر مش بلاقى اى وقت فاضى
و زانق نفسى فى حاجات مش بحبها

محاولتش ادخل مجال الميديكل ريب لأنى بكرهه..و مبحبش التظاهر و النفاق بتعهم
أنا اتكلمت كتير لكنى كنت عاوز افضفض و خصوصا لواحده من نفس الكارير

اتمنى تقرى التعليق ده
تحياتى

reri said...

صاحب البوابه

أهلا بيك في أول زياره....منورني .. شكرا ليك يا باشا

سلاماااااااااات

reri said...

sendbad

أهلا بأول زياره للسندباد.... يا رب يكون ده فعلا بداية حاجه كويسه... ربنا يسمع منك

سلامااااااااااات

reri said...

إبراهيم معايا

ههههههههههههههههههه.... قاموا خلاص
شكرا علي السؤال يا إبراهيم

سلاماااااااااات

reri said...

shayma

أخدت التاج يا جميل... إوعي تكوني عايزاني آخد التاج التاني كمان

سلااااااااااااااام

reri said...

shreif gharib

أتفق معك في الرأي .و كويس إنك مجرب وقفة الصيدليات.. وأهلا بيك... عايزه أشوفك دايما

سلامي ليك

reri said...

إبراهيم محسن

إن شاء الله هحاول آجي ... هشد أخويا معايا وآجي.... والله يا إبراهيم بابا كان جاي من السفر يوم الحفله اللي فاتت

سلاااااااااااااام

reri said...

عاشقة الوطن

أهلا بيكي يا جميل... منوره... وكويس إن الواحد بيلاقي نفسه في حاجه

سلاااااااااااااااام

reri said...

أبو ضحي

يا عم رد في أي وقت... براحتك... المدونه مدونتك..هههههههه
سعيد بفضفضتك جدا.... بجد كلامك عن مشاكل مهنتنا في محله.... الميديكال ريب محتاجه نوعيه معينه وشخصيه معينه مش أي حد بيقدر عليها... فيها كمية نفاق وكذب غير طبيعيين... أنا كمان كان نفسي جدا في مهن تانيه غير الصيدله ودخلت صيدله لنفس سبب دخولك... وهو المجموع الكبير... ربنا يوفقك ويعينك علي تحمل سخافات الناس
منورني يا أخي في المهنه.. أتمني أشوفك تاني

سلامي ليك

yasmina said...

مدونتك جميلة
حب المدونة ده مهم علشان بتلاقي فيها نفسك وانا ايضا استطيع ان اكتب ما اريد دون قيود

اما عن العمل فحاولي ان تحبيه اكثر لكي تستطيعي الاستمرار او ان تفكري بعمل اخر
تحياتي

reri said...

yasmin

معلش.... لسه شايفه ردك دلوقت... منوره في أول زياره ... شكرا علي المرووووووووووور
سلاااااااااااااام

Anonymous said...

عارفة يا رحاب احيانا بابقى زيك ومش قادرة حتى اعبر عن احاسيسى السلبية دى بس جميل فعلا انك قادرة تعبرى بالكتابةالكتابة دى حاجة فوق الوصف كانك ممدة على شزلونج طبيب نفسى وبتقولى كل اللى جواكى ... على فكرة انتى اشجع من ناس كتير لم يجروءوا على الكتابة انا منهم وربنا يبعد عنك الياس والاحباط وتبقى ايمك كلها تفاءل وسعادة
رباب

شا عر الأ حزان / احمد هيكل said...

السلام عليكم ورحمة الله وبركاته
يتشرف اتحاد المدونين المصريين بدعوة سيادتكم لحضور اجتماع الاتحاد يوم 25 / 4 فى كافيتريا المحروسة التابعة لفندق المحروسة للقوات المسلحة بالاسكندرية الساعة العاشرة صباحا .
وتفضلوا بقبول فائق الاحترام
مع تحيات اعضاء اللجنة الاجتماعية
وادرة منتديات اتحاد المدونين المصرين
لي اي استفسر
ahmedhiqal@yahoo.com
http://egtadwin.yoo7.com/index.htm

شا عر الأ حزان / احمد هيكل said...

السلام عليكم ورحمة الله وبركاته
من اجل الحريه
من اجل كل مدون مصري
من اجل حقوقنا الأ نسانيه
من اجل بلدنا الحبيبه

يتشرف اتحاد المدونين المصريين بدعوة سيادتكم لحضور اجتماع الاتحاد يوم 25 / 4 فى كافيتريا المحروسة التابعة لفندق المحروسة للقوات المسلحة بالاسكندرية الساعة العاشرة صباحا .
وتفضلوا بقبول فائق الاحترام
مع تحيات اعضاء اللجنة الاجتماعية
وادرة منتديات اتحاد المدونين المصرين
ولي اي استفسر
ع البر يد التا لي
ahmedhiqal@yahoo.com
http://egtadwin.yoo7.com/index.htm