تهييييييييييييييييييييس وهرتله صباحيه

صباح الهرتله والتهييس كمان

النهارده يعني توداي ... دخلت سيده في مكان شغلي ""اللي بقضي فيه التكليف "" ... و كنت ماسكه الدستور اليومي

بتصفحه وتحديدا كنت بقرأ مقال بلال فضل و مندمجه معاه وبضحك علي كلامه كالعاده .... قالت السيده لي ((إيه ده إنتي كده تاخدي مخالفه ))..... ضحكت كعادتي وقلت في سري هو أنا راكنه عربيه في الممنوع يا ست إنتي علشان آخد مخالفه ... عادي فوتي يا رحاب وصباح الهرتله والتهييس ... ده عقلي اللي قالي كده ... بس برده السوس جوايا عايز يعرف الست دي تقصد إيه ؟؟؟.... قلتلها تقصدي إيه .... قالتلي هو الدستور ده وطني ولا معارضه ... إبتسمت كده و قلتلها معارضه .... قالتلي أصل المعارضه بقت تخرف أوي ....الواحد يقرا الأهرام الأخبار الجمهوريه.. غلط عليكي كده ...أصلها ضد الحكومه ... صاحبتكوا اللي هي أنا أخدتها الجلاله و عليت صوتي و قلتلها طيب ما أنا ضد الحكومه .... ضحكت بإزبهلال ... إلا صحيح يعني إيه إزبهلال ... اللي فيكوا عارف يقولي ... و بعدين قالتلي ما كلنا ضد الحكومه ... وفتحت زي الراديوا شتيمه في الحزب الوطني ونوابه و فضيحة عمنا حيدر البغدادي والسيديهات الفاضحه بتاعته ... صباح الهرتله والتهييس ... الست بينها ضربت ... ما كانت من شويه بتنصحني ما أقراش غير جرايد الأخ سرايا وأخوه القط وإبن عمهم محمد علي إبراهيم ......الست طلعت الشحنه بتاعتها وزميلتي صرفتلها الدوا وخرجت .... وأنا بقول في سري طبعا .... يا حول الله ... شعب عايز يروح السرايا الصفرا ...

صباح الهرتله والتهيييس اللي بقي عند الناس

من حوالي إسبوع .... يعني من حوالي وييك .... شوفتوا ترجمه فوريه أهي ... ومحدش يقول دي هرتله ولا تهييس لا سمح الله ..... دخل عليا ... مش عارفه إيه حكاية الناس اللي بتدخل عليا ...بس المره دي دخل عليا في الصيدليه... أول لما شفته قلت الخلقه دي مش غريبه عليا .... بس برده قلت صباح الهرتله والتهييس ... تلاقيها تهيئات من اللي بتجيلي... هبقي أحكيلكوا عليها بعدين .... خلينا دلوقتي في الخلقه ... قصدي في الشخص اللي دخل عليا ... قعد يبتسم بدون مناسبه و يسألني علي شفرات حلاقه لورد .... وريته اللي عندي ... قعد يقولي لأ مش عارف هي ولا لأ....و أنا أقول يا صبر أيوب في عقلي .... أنا شفت الخلقه دي فين .... فتحها وطلعت مش هي ... وطبعا إتدبس في تمنها .... و قعد يوصفلي اللي هو عايزها ... وأنا مش فاهمه حاجه ... وبينت إني فاهمه يقصد إيه ... أمال أطلع جاهله .... و هو الإبتسامه مرسومه علي وشه شبرين .... و أنا أقول شفت فين الخلقه دي .... ومستغربه من التناكه اللي هو فيها .... ده إنت حتي عايز شفرات لورد..... المهم مشي .... وكل يوم طول الإسبوع اللي فات ينطلي... يسأل عن الشفرات .... يا صباح الهرتله والتهيييس .... هو مفيش صيدليه غيرنا .... وأخيرا بدأت أفتكر مين هذا الشخص .... و إسترجعت شريط ذكريات زي الهباب .... وهو إن الواد ده ساكن جنبنا و ما أقلكوش ... صااااااااااااااايع قليله عليه .... وكان مره إتخانق مع أخويا الصغير اللي هو من سنه خناقه كبيره ... المهم إنه كل يوم ييجي .... فأنا بقول للدكتوره إنتي ليه ما طلبتيش الشفرات للواد ده علشان أستريح منه .... قالتلي يا دكتوره هو مش عايز شفرات .... ده بيدور علي عروسه صيدلانيه .... قلت في عقلي ... يا خرابي .... حتي أنت طمعان تعمل المشروع ... وتقعد جنبه ... صباح الهرتله والتهييس ... صاحبتكوا عايزها كوبري للصيدليه ... صباح الهرتله والتهييس .... عايز يتجوز واحده أكبر منه ومش فارق معاه أي حاجه .... كل اللي يهمه الصيدليه ...

صباح الهرتله والتهييس اللي بقي عند الشباب

يا خساااااااااااااااااااااااااااااااااااااره

دخلت المدونه النهارده ..... سمعت حاجه غريبه أوي أوي أوي ..هتقولي أغنية عمرو مصطفي "لمستك"..طيب ودي فيها إيه ؟؟........ إنتي شكلك كده ... ولا بلاش.. لا تزعلي مني... يا عم خليك معايا... ركز معايا ... أنا مش مجنونه علي فكره.... هقولك سمعت إيه وإنت تحكم.... سمعت ... سمعت... سمعــــــــــــــــــــــــــــــــــت ...خير اللهم اجعله خير... صوت زغاريت... من نوع لووووولوووووووولوووووووووووي.... أه ... صدقني... ليه مش عايز تصدقني ... شكلك كده هتقول المدونه دي مسكونه عفاريت..و صاحبتها ترللي ولاسعه.... وناوي ما تدخلش المدونه دي تاني.... يا إبني ما تتسرعش إسمع للآخر.... مش إحنا متفقين إنك هتديني ودنك.... صدقني مش هقول توووووووووووووووووووووت.... وأخرمهالك علي الفاضي.... هقول توووووووووووووووت ... بس براحه ... ما علينا خلينا في الزغاريت اللي ملأت المدونه ..... إيه بدأت تسمعها.... شكلك كده بدأت تسمعها.... طيب يا بنت أو يا ولد ياللي في المدونه اللي جانبي سامعين..... شكلكوا كده سمعتوا.... صوتها عالي أوي... أوي ... أوي.... صاحبتكوا اللي هي أنا إتخضت.... وقلت يمكن بوست شم النسيم بزغاريته أثر علي عقل المدونه و إترجمت الزغاريت المكتوبه إلي زغاريت مسموعه..... و أنا هغلب نفسي ليه ..... أنا هسأل المدونه بتزغرتي ليه يا مدونتي العزيزه .... إوعي تقول البت رحاب إتهبلت .... أنا مش قايله قبل كده إني بحب المدونه.... أيوه يا سيدي بكلمها وبترد عليا..... شكلك كده هتقول المجنونه أهي..... الله يسامحك لو كنت قلتها ... ويسامحك برده لو عقلك بيقولك قولها..... نرجع لمرجوعنا .... كنت بقول إيه.... توهتني يا شيخ .... أأأأأأأأأأأأه... كنت هقولك أنا قلت إيه للمدونه وأنا بسألها عن الزغاريت

أنا : إنتي إتهبلتي يا مدونتي... يا حبيبتي ... إهئ إهئ إهئ... ولا تكونيش فرحانه علشان طلعت أينشتين... ولا تكونيش متوقعه إني هتجوز قريب مثلا .... فقلتي تفرحي من قبلها

المدونه: ههههههههههههههههه....و هي دي حاجه تفرحني يا بنتي

أنا : إخص عليكي.... بقي ما تفرحليش أنا.... أمال مين اللي فرحانه له أوي كده وهاتك يا زغاريت.. في حد مهم عندك أهم مني

المدونه الندله الزباله : طبعا يا رحاب... في .... إنتي مش عايشه في الدنيا .... ما عرفتيش إن جمال كتب كتابه علي ديجه يوم السبت اللي فات والفرح يوم 4 مايو... و طبعا دول مش فرح واحد .... دول إتنين.... لأنه نفس يوم عيد ميلاد الريس التسعه وسبعين .... طويل العمر يطول عمره يزهزه عصره ....هاهي

أنا: حتي إنتي يا مدونتي إتعلمتي النفاق وهتهيصي في الهيصه... إنتي مش مضايقه من اللي بيحصل في الناس... اللي بيتجوز ده ولي العهد .... فرحانه أوي كده ليه.... ربنا يتم له بخير... بس يحل عننا

المدونه المنافقه: بصي يا أختي ..إنتي مش عايشه في الدنيا...ما هو علشان هو ولي العهد و علشان هو عمره ما هيحل عننا لازم أعمل كده...ده نظيف بعت برقيه للريس النهارده يهنيه بعيد ميلاده وبيتمني له عمر مديد وهو بيحمي مصالح محدودي الدخل... وأنا أنضف منه وبدأت الزغاريت من بدري ... أه ... مفيش حد أحسن من حد

أنا بإنكسار شديد : يا خساره ... حتي إنتي كمان

المدونه اللي واضح إنها بقت واقعيه : كده كده مش طايلين حاجه .... يمكن لو هيصت أطول حاجه

أنا بسخريه: وإنتي هطولي إيه يا مدونه يا حقيره

المدونه الزباله: أصلي إنتي فقر.... وأنا عايزه أبقي مشهوره ومهمه.... لازم أهلل... علشان أوصل... وأبقي في مواقع الصف الأول... يمكن أعجبهم ويعملوني موقع لأمانة السياسات... وأترقي مع جيمي وأبقي موقع لرئاسة مملكة مبارك العربيه... بصي أنا عندي طموح سياسي... و إنتي معطلاني بشعاراتك الفارغه

أنا: يا خساره... أنا كنت عملاكي علشان تبقي صوتي.... وفي الآخر تقلبي عليا

هي : هاتي ودنك ................. توووووووووووووووووووووووووووووووووووت

لو مش مصدق إن ده حصل..... هات ودنك... ما تجيب .......... تووووووووووووووووووووووووووووووووووت

جانا التاج.... أهو جانا التاج

جالي تاج من

shayma ((heart, mind and soul))

http://shayma-m.blogspot.com

أول تاج في حياتي التدوينيه القصيره

أنا شبهه مين من المشاهير؟؟؟؟؟؟؟؟؟؟؟؟

What Famous Leader Are You?
personality tests by similarminds.com

يا خبر!!!!!!!!!!!!!!...... طلعت أينشتين ..... وأنا مش حاسه..... أينشتين يا ولاد

إيه أكتر فيلم كلاسيكي بيعبر عني

What Classic Movie Are You? personality tests by similarminds.com

الفيلم ده أول مره أسمع عنه...... بس أكيد حلوونكد وأكشن ودراما ولا إيه

أحب أمرر التاج لميييييييييييييييييييييييين؟؟؟؟؟؟

لأي حد عايز يجرب حظه ويعرف هو شبهه ميييييييييييييييييييييييييين؟؟؟؟

بحبك يا مدونه

خنقه وضيقه .... وأحاسيس كتير ملخبطه كتير مسيطره عليا....هبدأ شغل جديد في صيدليه... وكعادتي حاسه إني مش هكمل.... التعامل مع أصحاب الصيدليات بيجيب حالة قرف... كلهم زي بعض... قبلت فقط من باب إني لازم أشتغل... أنا مش بحب مهنتي للأسف...... مش بحس بنفسي فيها... أنا من النوع اللي مش بقدر أتظاهر بعكس ما بداخلي... وفي مهنة الصيدلي لازم تتعامل مع كل نوعيات البشر... تستوعبهم... تتحمل كلامهم الممل أحيانا... لأ مش أحيانا... ده علي طول... مطلوب مني أضحك في وشه حتي لو إنسان خنيق وممل... مطلوب مني أسمع شكوي الستات الفاضيين... اللي تيجيي تقولي أنهو أحلي شامبو بانتين ولا صانسلك؟؟؟... و أنا ممكن أكون ما إستعملتش الإتنين!!!.. بس تقول إيه في ستات رخمه ورجاله رزله الراجل منهم يبقي عارف الدوا ده بتاع إيه وبياخده من قرن وقال بيختبرك ويتفذلك ويسألك هو الدوا ده مضاد حيوي... وهو دوا الضغط بتاعه... لو قعدت أعد سخافات الناس مش هخلص... مطلوب مني أجامل البنات وأتكلم معاهم... حتي لو كلامهم بايخ وتافهه... مشكلتي إني بمل بسرعه جدا... وفي ناس بتبقي داخله متخيله إنك مفروض تقعد تسمعه .... و طبعا لا تظهر ضيق من كلامه... ببقي هاين عليا أقوم أضربه ...... صدقوني لو إنسان مريض عمري ما هحس بالأحاسيس دي.... بس الناس بقي عندها حاله كده من فرض النفس بطريقه مستفزه... كلام كلام كلام... يفضل يرغي في أشياء لا يستهوني الكلام فيها... ومطلوب من رحاب إنها تسمع وتتأثر وتبين تأثرها حين تحكي أحدهم عن رحلتها في محاولات تبييض بشرتها .... وتضحك رحاب حين يحكي أحدهم حاجه سخيفه تضحكه......و تلك ليست طبيعتي.... أنا في الفتره الأخيره أصلا زاد موضوع مللي السريع... إخترت أن تكون رحاب داخل رحاب..... أراحني هذا الإختيار.... يزعجني التداخل... يزعجني الكلام وكثرة السؤال... وهذا أكثر أسباب لجؤئي للتدوين .... أحببت مدونتي .... أري فيها روحي ونفسي .... أتنفس حين يدخلها أحد يشاركني التنفس.... لا أري فيها الشكل المزعج في التعاملات الخارجيه للبشر.... أقول ما أشعر به دون خجل... أري أناس جدد... تمنيت لو القدر جمعني بتلك العقول .....لا أحب النفاق.... وأشعر أن هذا ما تحتاجه مهنتي حتي أصبح إنسانه ناجحه في هذه المهنه..... حاسه إن البوست ده ملخبط.... بس يمكن علشان بيعبر عن اللخبطه اللي جوايا... بحبك يا مدونه... أشعر بالراحه وأنا أكتب علي الكيبورد كل ما يجول في نفسي دون تجميل الذي أضطر أن ألجأ إليه في صخب الحياه..... مش عارفه العيب فيا إني مش بقدر أجاري الناس المختلفين عني تماما.... لا أستطيع أن أتواصل مع من لا أجد بيني وبينه مساحه من الإتفاق ولو حتي 1%... لا أستطيع أن أظهر شئ وأنا عقلي في شئ آخر....هذا ما أعاني منه علي أرض الواقع

و أخيرا ... عايزه أقولك سر يا مدونتي.. بس إوعي تقوليه لحد ... و هو

إني بحبك يا مدونه
يا اللي أنا إنتي ... وإنتي أنا

مسلسل شم النسيم

تتر البدايه
المصريين أهمه............حيويه وعزم وهمه **********************************************

المشهد الأول : في فيلا في المنصوريه

الواد : صباح الخير يا مان

أمه : مان !!!..... مان إيه يا قليل الأدب يا سوفاج.... بطل الكلام بتاعك ده يا ولد

الواد : خلاص يا مامي ... ذاتس فور فن .... هتروحي فين إنتي وداد في شم النسيم ؟

أمه : أبوك ...هو فين أبوك ؟؟!!... أبوك سايبني ومشغول في البيزنيس بتاعه ... وأنا هروح مارينا مع سوسو صاحبتي

الواد : أبوك... إيه أبوك دي يا ماما ... ده إنتي بقيتي بيئه طحن

أمه : بس يا ولد يا قليل الأدب .... هتيجي معايا ... ولا زي أبوك مش فاضيلي ؟؟

الواد : لأ يا ماما أصل مارينا بقت بيئه مووووووووت...أنا هروح شرم مع أصحابي ... ماشي يا جميل... شغااااال كيك... موبايلات بقي

************************************************************************

المشهد التاني : في شقه 200 متر في أي حته

الراجل : جيبتي الفسيخ يا أم أحمد

مراته : لسه... إيدك علي ميت جنيه

الراجل : ميت جنيه لييييييييييييييييه؟؟؟!!!... وطي يا واد الزفت اللي عمال تسمعه ده !!!... خليني أعرف أكلم أمك

مراته : إنت مش عايش في الدنيا....ده كيلو الفسيخ بأربعين جنيه ...هجيب إتنين كيلو ده غير كيلو رنجه وكيلو سردين ... ده غير البصل والذي منه

الراجل : أربعين جنيه!!!!!!!!..وليه ده كله... ده حتي ريحته ما تديش سعره ... وبعدين هتجيبي الكميات دي كلها ليه ؟؟؟... هتأكلي الشارع كله ولا إيه؟؟؟!!!...يا واد قلتلك حول الزفت اللي بتسمعه في التلفزيون ده ولا إستني كده...مين اللي بتغني دي يا واد ؟؟؟؟

الواد : دي روبي يا بابا

الست : إنت في اللي بتغني ولا في إيه ؟؟!!... إنت ناسي إن أختك وجوزها وأختي وجوزها وولادهم هييجوا يتغدوا معانا

الراجل : ومين اللي كان عزمهم إن شاء الله ؟؟!!!!...يا واد هي مش روبي دي بتاعة العجله... إيه اللي حصلها ؟؟؟؟؟

الواد : ما خلاص يا بابا... إعتزلت ركوب العجل وبقت الست روبي

الست : والله إنت راجل تافهه... قاعد تتكلم مع الواد في حاجات تافهه.... هات يا واد الريموت لما نجيب قناة الناس

الشيخ في قناة الناس: الإحتفال بشم النسيم حرام

الراجل : سامعه أهو بيقولك حرااااااااااااااااااااام... مفيش فلوس... بلا فسيخ بلا زفت... جت من عندك يا رب


***********************************************************************

المشهد التالت : في شقه100 متر أو أصغر في حي شعبي

((من بعيد صوت أغنية الدنيا خربانه للمطرب الشعبي اللي ما أعرفش إسمه ... ومعها صوت أغنية العنب ))

الراجل : إيه الريحه الزفت دي يا وليه

الست : زفت لما يبقي يلطشك دي ريحة السردين علشان شم النسيم يا راجل

بنتهم : بابا...هتوديشنا فين في شم النسيم

الراجل : إيه رأيكوا نروح جنينة الحوانات

الست : يا راجل...هو كل مره جنينة الحوانات ... غير ...نروح الحديشقه الدوليه ولا القناطشر الخيريه

البت : أه ... نروح القناطشر....وناخد مركب في النيل... حلوه الفكره دي يا مامتشي

الست : إنتي أحلي يا حبيبتشي....و هناخد الترمس فيه الشاي ...والكور... والحبل ... خلي العيال تفرح... لما أقوم أقول لأم ممدوشح ....علشان يجهزوا ويروحوا معانا

***************************************************************************

المشهد الرابع : عشه في العشوائيات

((في راديو صغير شغاله أغنية ما تقولش إيه إدتنا مصر))

الست وهي علي تشت الغسيل : إطفي يا واد المحروق الراديو ده ... والنبي لو الحوجاره خلصت ما أنا جيبالك واحده جديده

الواد : إنتي هتذلينا بأم البتاع الترانزستور بتاعك ده ....إنتي ما سمعتيش عن التلفزيون والراديو أبو كهربا... وديني لأكسرهولك

الست : يا لهوووووووووووووووووووووووووووووووووي...((قامت عالواد بالشبشب)) ... هي إيه بصحيح

الكهربا دي يا واد.....يا لهووووووووووووووووووووووووووووووووي

الجيران : يا لهوووووووووووووووووووووووووووووووووووووووووي ...في إيه يا أم شحته

الواد : بلا نيله....أنا سيبهالك مخضره.... أنا خارج أقعد في مقلب الزباله اللي ورانا شويه

الست : بعد إما كسرت الراديو....يا لهوووووووووووووووووووووووووووووووي

وأثناء الصريخ ينطلق صوت الراديو

(( ويأتي صوت سعاد حسني(( الدنيا ربيع ... والجو بديع

الست : لولولولولولولولوييييييييييييييييييييييييييييييييييييييييييييييييييييييييييييييييييييييييي

جاراتها :خير يا أم شحته ؟؟؟

الست : عقبال عندك يا أم شربات ...الراديو نطق وبيقول الدنيا ربيع

جارتها : لولولولولوييييييييييييي ...لولولولولييييييييييييي

الجيران : لللللللللللللللللللللللللللللللللللللللللللللللللللووووووووووووولولولولولوييييييييييييييييييييييي

يللللللللللللللللللللللللللللولولولولولولولولولولولولوييييييييييييييييييييييييييييييييييييييييييييييي

**************************************************************

تتر النهايه

الدنيا ربيع والجو بديع ....قفلي علي كل المواضيع.....قفل قفل قفل

**************************************************************************

كل شم فسيخ وإنتو بخير

من واحده بتكرهه ريحة الفسيخ إسمها رحاب

عدوته صادقه في كدبة إبريل

في فترة الأجازات اللي فاتت دي سافرت .... رحت أشوف أهلي وأقضي معاهم يوم... الواحد بيفرح أوي لما يكون كل أهله متجمعين ... كبار وصغيرين في بيت جدي... بحس إن لسه الدنيا فيها خير...المهم ..ما علينا ...لما رجعت وفتحت المدونه قلت أشوف في تعليقات عالبوست الأخير ولا إيه النظام... و لقيت ردود... وأثناء قرائتي للردود لقيت آخر رد من مجدي المغربي ..... هتقولوا ودي فيها إيه يعني ؟؟؟... أنا قعدت أفرك عيني ... يمكن أكون قريت الإسم غلط ولا حاجه ... ولا يمكن حد عامل في مقلب ... وهيطلعلي لسانه في الآخر ويقولي ضحكت عليكي ... دي كانت كدبة إبريل.... بس إتأكدت لما قريت الكلام اللي في التعليق إنه فعلا مجدي المغربي.... ولقيت نفسي مبسوطه أوي وفرحانه....هتقولوا إيه الهبل اللي إنتي فيه ده؟؟؟ مين يعني اللي لما علق علي البوست فرحتي أوي كده؟؟؟...هقولوكوا هو قال إيه وبعدين أقلكوا هو مييييييييين؟؟؟...
نص تعليقه
البت دي أنا عارفها كويس جدا جدا جدا ....لأن أنا اللي مولدها علي إيديه دول ,وكبرت علي إيدي وأول ما تعلمت الكلام و بقت تمشي كانت كل ما تشوفني تجري وتتحدف علي وتقول إرفعني فوق ...وبعد ما أرفعها عدة مرات وتقطع نفسي ...تجلس في حجري وتقولي قول عدوته ((تقصد حدوته))...ولو إني لا أذكر أي عدوته من تلك التي كنت أقصها عليها ولكن والله أعلم كانت عواديت أقصد حواديت سياسيه ...لكن لما كبرت واتخرجت من كلية الصيدله إكتشفت إن كل العواديت معششه في دماغها ... وكل ما كانت لا تدركه من عواديتي نبشت عليه وأعادت الإستماع إليه ...وأدركت كثير من المعاني التي أثقلت جوانحي , بعيد عنكم عيله غاويه نكد وسياسه...و علي فكره إبقي فكريني يا بت أقولك حدوته أو عدوته لانج.....سلام يا هاط....ولا بلاش
الإنسان الجميل ده خالي.... فخوره جدا إن لي خال شكل في وجداني الكثير والكثير... جميل أن يكون رفيق لأي ذكري من الطفوله ...أول حد شافك في الدنيا كلها لأنه هو من ولد أمي...أول حد برده ضربك علشان تعيط وتبدأ تتنفس ... ولو الطفل بينزل من بطن أمه بيشوف يبقي أول حد عينك وقعت عليه في الدنيا كلها....أول رفعه لفوق للسقف تخض قلبك وكل لما تشوف طفل بيترفعها تحلم إنك ترجع صغير علشان حد يرفعك تاني فاكرين إحساس الخضه الممزوجه بفرحه ورغبه في التكرار ....أول أغنيه حفظتها في طفولتي وهي دبدوبه التخينه... أول مره تشوف الأهرام وإنت صغير وأول مره تروح الملاهي والقلعه والمتاحف ...أول حواديت أو عواديت سمعتها وداني وفضلت في عقلي ودخلت وجداني..أول حد يضحكك من قلبك وإنت بتلعب معاه... أول كل حاجه حلوه في حياتك...أول ... أول...أول... دائما ما يكون الشئ الأول مختلف... قد يتكرر ويتكرر ولكن تبقي فرحة المره الأولي محتفظه برونقها وبهائها وجمالها ... زي مثلا أول مره تحب وقلبك يدق... حتي لو كنت صغير وعبيط... بس بتفضل فاكرها ومعلمه جواك أكتر من أي مره بعد كده...خالي مجدي كانت له اللمسات الأولي في حياتي وأنا طفله صغيره ...إرتبط وجوده معي بأول كل شئ جميل باللعب والمرح والحواديت... أنا بالصدفه قلت أمامه إني عملت مدونه وما توقعتش إنه يكون برده أول حد من أهلي يحفظ إسم المدونه ويدخل عليها و يعلق ....سلامي ليك يا خالي يا أول من عرفت معه جمال الطفوله

مشاعر صادقه جدا شعرت بها أوي وأنا بقرأ كلامه وأيضا وأنا بكتب عنه في البوست ده ....وتعجبت إن إحنا في شهر
الكدب
شهر إبريل ...معقوله ؟؟؟ طيب ما في حاجات صادقه أوي أهو في شهر الكدب.. وبما إني جبت سيرة كدبة إبريل.... عايزه أسألكم حد يعرف ليه كدبة إبريل بالذات... يعني مثلا ليه مش كدبة أي شهر تاني... لها سبب تاريخي مثلا... أنا بتخيل إن في زعيم وعد شعبه بحاجه و كالعاده إداهم بومبه و كان الوعد ده في شهر إبريل ... أو مثلا في قصة حب كانت مشهوره وبعدين واحد من الطرفين طلع زباله وإدي التاني بومبه وفرقعه.. بعد ما كان وعده إنهم هيتجوزوا في شهر إبريل... وعندي تخيل تالت وهو إن في زمن جه والناس كانت صادقه فيه زياده قاموا قرروا يعملوا شهر يكدبوا فيه ... كنوع من الترفيهه... اصل ساعات كتر الصدق بيخنق... يعني فور فان...أو ممكن برده يكون في زمن كتر فيه الكدب أوي ومش عارفيين يخلوا الناس تبطل كدب فإتفقوا إنهم يحاولوا يبطلوا ... وقرروا يكدبوا شهر واحد بس وهو شهر إبريل... أما إختيار شهر إبريل بالذات فده برده له تفسير((كل حاجه النهارده عندي لها تفسير))... ألا وهو إن القرار ده طلع في آخر مارس فالناس قالت خلاص هنكدب شهر كمااااااااااان ... وبعد كده نبطل... وأظن إنهم مبطلوش.... وفضلوا يكدبوا أكتر... فأصبح شهر إبريل هو نفسه كدبه كبيره ...لأنهم خدعوا أنفسهم... ووهموا نفسهم إنهم هيبطلوا شئ موجود فيهم... جزء منهم.... ألا وهو الكذب....آه الكذب موجود فينا كلنا.... جزء من تركيب العنصر البشري ...موجود في الحمض النووي بتاعه الدي إن إيه .... جزء يصعب فصله من النفس البشريه.... إختلفت أسماؤه و أنواعه فهناك مثلا الفشر والمعر والنتش والكدب الأبيض والكدب الكاروه....و بمناسبة شهر إبريل ((شهر الكدب)) عايزه كل اللي يعلق عالموضوع يكتب شوية كلام كدب نفسي أسمع شوية كدب.... أصلي خلاص... مش لاقيه في زماننا ده غير الصدق... كل لما أمشي في حته بتكعبل فيه ... وزهقت وعايزه نيولوك ...أووووووووووف زهقت من السدك والسادكين اللي حوليا .... عايزه أغير....ممكن تسمعوني شوية فشر أو معر أو نتش ...بليز
أنا هبدأ بنفسي وأسمعكوا شوية سدك يجننوا ..أصلي ما أقدرش أكدب..أحدث سدك في أبريل 2007
*الحب إنتشر ..... وكتروا الأحبااااااااااااااااااااب
*واو ...الفقر إختفي وبقي مجرد سرااااااااااااااااااااااااب
*الشعب بياكل كل يوم كباااااااااااااااااااب
*و بيوصلهم العيش من غير عذااااااااااااااااااااااااب
*خلاص راح الإكتئااااااااااااااااااااااااااب
*مفيش مكان في بلادنا لمنافق أو كداااااااااااااااااااااااب

إلي لقاء وكل كدبة إبريل وإنتو سادكين وطيبين

مفيش فايده ....أريد حلا

أنا ((وأعوذ بالله من كلمة أنا))... واقعه في حيره مالهاش حدود ...أصلي مش عايزه أكتب في السياسه...جالي تشبع سياسي و إحتمال يكون عندي إنفلوانزا سياسيه... خصوصا بعد التعديلات الدستوريه ...والأخبار اللي جايه من السعوديه عن القمه العربيه.....ييييييييه....برده إتكلمت في السياسه... مش بقولوكوا جاتلي إنفلوانزا سياسيه...و تقريبا أعراضها كلها ظاهره عليا...و هي إني مش قادره أبطل أسمع نشرات إخباريه... أو أشتري جرايد الدستور وصوت الأمه والإسبوع الإسبوعيه...و أعدي بالريموت علي قناة الجزيره وشقيقتها العربيه.....و مصره أهتم بالأحداث اللي حوليا... و لما أدخل عالنت أقرا المصري اليوم والصحف القوميه....ده غير .....ييييييييييييييه برده بتكلم في السياسه... الأعراض واضح إنها زادت عليا....حاولت أدور في الصيدليه ....علي أقراص تخليني أبطل العادات ديه....بس للأسف مش لاقيه... مش عارفه أشتري دماغي وأبطل...مش عارفه يبقي عندي لامبالاه سياسيه.... يووووووووووووه...أنا مش عايزه أتكلم في السياسه... فعلا عايزه أبعد شويه.... خلاص هبدأ في حكايه تانيه...النهارده كان عندنا في البيت الواحده اللي بتساعد ماما ((كما تحب أمي تسميتها...فأمي لا تفضل كلمة خادمه ...تقريبا عندها المبادئ الإشتراكيه .. مش دي اللي إتلغت في التعديلات الدستوريه)).... يووووووووووووووووووووه...سياسه تاني....ما علينا... كعادتي في نكش الناس((ودي عاده تانيه...عايزه أبطلها))...سألتها قولتلها روحتي الإستفتاء ((برده سياسه...خدو بالكوا المرض خطييييييييييير)).... قالتلي إيه ..يعني إيه؟؟؟؟؟؟؟!!!!!! وبصتلي كأني بتكلم لاوندي...قولتلها حاجه كده الناس بتروح زي الإنتخابات وبيقولوا فيها نعم ولا لأ.... قالتلي هيدوني فلوس يعني وياخدوا صوتي ؟؟؟!!!!!.... قولتلها توافقي؟!!!!..... قالتلي طبعا ودي عايزه كلام ..طيب يا ريت يجيي واحد ويقولي هاتي صوتك ويديني خمسين جنيه... قولتلها توافقي بخمسين جنيه... قالتي يا سلام آه طبعا أوافق..... إلي هنا أنهيت نكشي البعيد عن السياسه خالص ليها..... يووووووووووووووووه.... برده إتكلمت معاها في السياسه......بس قعدت بعديها... ونفسي ما أفكرش فيها.... اللي هي البعيده السياسه...يجعل كلامنا خفيف عليها... تقريبا راكبني جني بيها... لقيت نفسي بقول... ده شعب يستاهل .... يا تري يستاهل ولا هو شعب غلبان... مش عارفه إحترت أكتر من حيرتي في المرض اللي عندي.... و بقت حيرتي حيرتين في مرضي و في الشعب المصري .... اللي شوفته علي الفضائيات ((اللي نفسي أبطل فرجه عليها))... شكلهم يفضح وهم رايحيين الإستفتاء وبتوع الجزيره والعربيه والقاهره اليوم نقوا شوية ناس !!!!!!!!!!... ولما سألوهم جايين ليه.... كانت الردود فضيحه.... و طبعا معظمهم ستات ما بتفكش الخط و كانت الإجابات كالتالي ....أنا جايه علشان قالولي ده هيبقي كويس للتموين.... والله سمعتها بوداني... لو مش كده مش هصدق... واللي تقولك مش عارفه !!!... هم قالولي روحي ...و تخيلوا إنتو باقي الإجابات.... فضايح.... والله كانت فضايح علي الفضائيات..و الفضيحه الكبري كانت في النتيجه النهائيه...اللي الشعب قال فيها كلمته بحريه... و السته وسبعين في الميه ...اللي قالوا نعم للتعديلات الدستوريه......برده إتكلمت في السياسه .....داء واللي فيه داء بقي.... محدش عنده أقراص لامبالاه...أو حتي حاجه من الطب البديل بتاع عادل عبد العال اللي النائب العام منعه بعدما صال وجال في الفضائيات علي كيفه وبراحته...أي حاجه يا ناس... أختكوا مريضه... سامحوني... بس الناس إستفزوني..و رغم إني كنت ناويه في البوست ده ما أجيبش سيرة البعيده... ((مش هقول إسمها... يمكن أخف منها)).. بس واضح إن علي رأي سعد زغلول لما قال ......مفيش فايده...............أريد حلا

الدعوه عامه..... وهتبقي لمه

دعوه لكل المصريين
حبايبي الحلوين المقطقطين
الطعمين الكبار العاقلين
إفهموا وما تبقوش متخلفين
بابا بتاعكم يا وحشين
عازمكم يوم الإتنين
علي إيه يا منيلين
علي إستفتاء بتاع الناس العصريين
مش زيكو يا متقندلين
إستفتاء إيه يا أبو الناس المطحونين
هقولوكم... هو إنتو علي طول كده مستعجلين
معلش يا بابا بقالنا 25سنه مستنين
بطلوا سربعه يا متسربعين
ما هو ده اللي مخليكوا مش كويسين
إستفتاء عالماده تمانيه وتمنين
ودي هتضمن نجاح كل المزورين
الله..هيه...قول كمان يا بابا...سامعين
و عالماده ميه تسعه وسبعين
و بتاعة إيه دي ؟؟ مش فاهمين
دي بتاعة الناس اللي نشك إنهم معارضين أو إرهابيين
هنتصنت عليهم وندخل بيوتهم وهم مش حاسين
و إحتمال ندخلها متخفيين
و ظباط الشرطه يدوهم بالجذمه وهم ساكتين
معلش يا بابا إحنا عارفين إن إحنا رخمين
بس هي إيه الجذمه دي علشان مش عارفين
الجذمه دي اللي هتتحط علي دماغكوا يا معفنين
هيه هيه...هيه هيه... كاب يعني يا بابا ... بجد متشكرين
قولوا بس أي حاجه إطلبوا لو عايزين
ميرسي يا بابا ... يا نصير الغلبانين
ده في تعديل علي مواد كتير تانيين
يجيلهم أربعه وتلاتين
طيب والماده سبعه وسبعين
مين اللي بيتكلم ؟؟؟.... أكيد من الإخوان أو المعارضين
الحاقدين اللي مش عايزني ألزق في الكرسي سنين وسنين
طبقوا عليه الماده ميه تسعه وسبعين
إيه رأيكوا يا مصريين
مبسوطين يا زباله وفرحانين
و هنرقص كمان يا بابا زي النواب الوطنيين
هيه هيه هيه هيه هيه هيه.... من كتر الفرحه مش مصدقين
و خلاص هنقع ميتين
هيه هيه هيه هيه هيه هيه

وسيظل المصريين مهللين فرحين مرددين """ يا ولاد بلادنا يوم الإتنين..... هننضف ونبقي مستحميين.... والدعوه عامه وهتبقي لمه .... وهيبقي لينا في البيت وريث"""
حتي يأتي يوم الإثنين.... الذي سيذكره المؤرخين .....أنه يوم ميلاد المصريين

رحاب ..... واحده من المهللين

نعم......لم نلتقي

إلتقينا .... لا لم نلتقي ..... تقابلنا ..... لا لم نتقابل ..... رأيتها ..... لا لم أراها ..... كنا يوما ما روحا واحده في جسدين ... صحيح أنهما جسدان صغيران بوجوه تحمل براءة العالم بوجوه الطفوله... التي كانت تملأنا حيويه وإنطلاق ورغبه مستمره في الشغب واللعب المتواصل ..... صحيح أننا كنا لا نفترق و كنا نخاصم فلان سويا ونصالحه سويا .... أخاصم فلان فقط لأنها خاصمته و هي تصالح فلان لأني فقط صالحته ..... لم أتذكر يوما عدنا من المدرسه ونحن متشاجران ...كنا نتشاجر كثيرا ولكن نعود كما كنا دون أن نتذكر ما هو سبب الشجار ...كل منا كانت تحمل أسرار الأخري .. تلك الأسرار التي نراها حين نكبر أنها كانت ساذجه جدا ...أن تحب هي فلان زميلنا في الفصل ....و أنا سعيده لأنها لم تقل لأحد غيري ...سعيده بتلك الثقه التي منحتني إياها ... وكيف إني سأصون هذا السر عن أقرب الناس لي كأمي مثلا.. ذكريات طفوله كثيره حملها قلبي وتذكرها عقلي حين رأيتها .... تفرقنا ... نعم تفرقنا ... فرقتنا الأيام اللعينه التي تجعل من صديق اليوم ذكري الغد... وصديق الأمس ذكري اليوم .... رأيتها تقف أمامي لأتأمل كيف تغير شكلها فوجدتها أصبحت بدينه من الممكن لأنها حامل... تغير شكل أنفها ... تغيرت نظرة عينها .... و سألت نفسي هل ياتري هي الأخري تراني تغيرت .... بالطبع تغيرت ولكني أري نفسي في المرآه كل يوم وبالتالي لا ألمس هذا التغير بشكل ملحوظ .... و سألت نفسي هل لو إنقطعت عن المرآه التي لا أكف النظر فيها ليل نهار لعام أو لعامين.... هل سألاحظ التغيرات التي طرأت علي؟؟؟؟ .... لماذا أتوقع ألا يتغير شكلها ؟؟؟؟!!!... بالتأكيد سيتغير .... لقد مر علي آخر لقاء بيننا حوالي 14 عام ....14 عام بأحزانهم وأفراحهم .... سنوات ليست بالقليله حتي أتوقع أن أراها الطفله الصغيره بنفس الملامح والجسد النحيل ...... هي الآن زوجه وستصير أم بعد عدة أشهر .... من الممكن أن عقلي لم يستوعب هذا التغيير لأن صورها لدي هي صور تلك الطفله....التي تقف في حفلات المدرسه الإبتدائيه .... تعجبت من عقلي الذي توقف عند التغيير في الشكل مع إنه شئ طبيعي جدا .... فأنا أيضا لم أعد تلك الطفله بضفائرها المنسدله علي ظهرها فأنا الآن عندي 24 عام .... بالطبع هي أيضا لن تراني كتلك الطفله .... تبادلنا التحيه والسلام .... لم يخطر ببالي كثيرا قبل هذا اليوم كيف سيكون شكل اللقاء بصديق قديم ....و لكن يهيأ لي أن حرارة هذا اللقاء ستكون بمقدار الذكريات التي أحملها لهذا الشخص .... وأيضا بنوعية هذه الذكريات .... أي لو أنها ذكريات جميله وغاليه سيكون بالتأكيد لقاء حار وجميل ينعش تلك الذكريات في القلب ..... أما لو كانت ذكريات مش ظريفه .... فاللقاء سيكون بارد نوعا ما لأنك لم تذكر لهذا الشخص ما يجعلك تستقبله بحفاوه وحراره..... ولكن ..... وأه من كلمة لكن .... في لقائي مع تلك الصديقه العزيزه القديمه ..... لم أشعر بتلك الحراره بداخلي ولم ألمحها في نبرات صوتي .... أقسم بالله أني بحثت عن الحراره وفتشت عنها و لكني لم أجدها ....و نفس الشئ لم أجده لديها .... تصنعت ....نعم تصنعت.... لم أجد بديل غير التمثيل .... وحاولت أن يبدو طبيعيا ....لكني بالطبع لست ممثله بارعه ... وهي أيضا ... حاولت ... وحاولت.... ولكن كل شئ كان ينم أن ما يحدث ليس من القلب .... شعرت بحواجز وحواجز.... منعتني تلك الحواجز من أحتضانها من أعماق قلبي .... من أن أشعر بفرحه من قلبي لأني رأيتها ... وهي التي كنت أحزن لو غبت أو غابت عن المدرسه يوما .... لأني لن أراها في هذا اليوم .... لم أشعر بالسعاده التي كنت أشعرها يوم السبت و أنا أراها بعد الأجازه الإسبوعيه .....سألت نفسي لماذا .... لماذا حين نلتقي بصديق قديم لا نستطيع أن نستعيد نفس السعاده حين كنا نراه ؟؟؟؟.... لماذا لم أشعر بوجود نهال ؟؟؟؟.... لما تلك كل الحواجز التي شعرت بها ؟؟؟؟ و التي جعلت اللقاء رسمي ويفتقد الود؟؟؟؟....هل لأننا إفترقنا لسنوات ؟؟؟؟ هل لأننا تغيرنا ...و لم يعي كل منا ما الذي حدث للآخر في كل تلك السنوات ؟؟؟؟....أسئله كثيره لم أجد لها إجابات شافيه .... و وجدتني أتسائل هل إلتقيت بنهال صديقة الطفوله ؟؟؟؟.... فرددت علي نفسي لا لم نلتقي .... من إلتقي شخصان آخران... شخصان غير نهال ورحاب أصدقاء الطفوله .....نعم لم نلتقي.....

مش فاهم حاجه... هات ودنك

• لا أعرف ما هو السبب الحقيقي الذي دفعني للتدوين من الممكن لأنني أصبحت مدمنه للإنترنت هذا العالم السحري الذي يجعلك في حاله من الإنبهار المستمر.... جايز يكون ده سبب.... ممكن يكون لأني قرأت مدونات كتير و عجبتني الفكره,.... الله أعلم كل شئ برده في زماننا ده جايز .... ولكن هناك سبب أجده الأقوي عندي للتفكير في التدوين .... إحساس بالفراغ الرهيب يسيطر علي و ليس فراغ بالمعني المعروف فأنا والحمد لله أعمل أي لا أعاني من البطاله التي تجعل من الفراغ حبل المشنقه الذي يلتف حول رقبة الإنسان العاطل .... و لكن بالفعل إحساس الفراغ لا يأتي من فراغ الحياه من حولك فقط ولكن أري أن الفراغ المفزع بالنسبه لي هو الفراغ الداخلي .... أن تشعر أن كل من حولك في وادي وأنت في وادي لأن عقلك وقلبك يفكران في شئ آخر .... دائما أعاني أن من حولي لا يشعرون بما يجول في خاطري.... من الممكن لأن طريقتي في التفكير تختلف عن كل من حولي .... حتي أقرب الأصدقاء أشعر أنهم لم يستطيعوا أن يعرفوني كما أنا بداخلي ..... أريد أن أقترب أنا مما يجول داخلي ..... لم أجد أفضل من المدونات لتفريغ طاقة الفراغ الداخلي .... توهتكوا أنا عارفه ..... بس هات ودنك ومش هتخسر .... ممكن أوي تكسب كتير .... يمكن تعرف اللي أنا مش قادره أعرفه أو تفهم اللي أنا مش قادره أفهمه .... و سلام مؤقت