Wednesday, March 28, 2007

مفيش فايده ....أريد حلا

أنا ((وأعوذ بالله من كلمة أنا))... واقعه في حيره مالهاش حدود ...أصلي مش عايزه أكتب في السياسه...جالي تشبع سياسي و إحتمال يكون عندي إنفلوانزا سياسيه... خصوصا بعد التعديلات الدستوريه ...والأخبار اللي جايه من السعوديه عن القمه العربيه.....ييييييييه....برده إتكلمت في السياسه... مش بقولوكوا جاتلي إنفلوانزا سياسيه...و تقريبا أعراضها كلها ظاهره عليا...و هي إني مش قادره أبطل أسمع نشرات إخباريه... أو أشتري جرايد الدستور وصوت الأمه والإسبوع الإسبوعيه...و أعدي بالريموت علي قناة الجزيره وشقيقتها العربيه.....و مصره أهتم بالأحداث اللي حوليا... و لما أدخل عالنت أقرا المصري اليوم والصحف القوميه....ده غير .....ييييييييييييييه برده بتكلم في السياسه... الأعراض واضح إنها زادت عليا....حاولت أدور في الصيدليه ....علي أقراص تخليني أبطل العادات ديه....بس للأسف مش لاقيه... مش عارفه أشتري دماغي وأبطل...مش عارفه يبقي عندي لامبالاه سياسيه.... يووووووووووووه...أنا مش عايزه أتكلم في السياسه... فعلا عايزه أبعد شويه.... خلاص هبدأ في حكايه تانيه...النهارده كان عندنا في البيت الواحده اللي بتساعد ماما ((كما تحب أمي تسميتها...فأمي لا تفضل كلمة خادمه ...تقريبا عندها المبادئ الإشتراكيه .. مش دي اللي إتلغت في التعديلات الدستوريه)).... يووووووووووووووووووووه...سياسه تاني....ما علينا... كعادتي في نكش الناس((ودي عاده تانيه...عايزه أبطلها))...سألتها قولتلها روحتي الإستفتاء ((برده سياسه...خدو بالكوا المرض خطييييييييييير)).... قالتلي إيه ..يعني إيه؟؟؟؟؟؟؟!!!!!! وبصتلي كأني بتكلم لاوندي...قولتلها حاجه كده الناس بتروح زي الإنتخابات وبيقولوا فيها نعم ولا لأ.... قالتلي هيدوني فلوس يعني وياخدوا صوتي ؟؟؟!!!!!.... قولتلها توافقي؟!!!!..... قالتلي طبعا ودي عايزه كلام ..طيب يا ريت يجيي واحد ويقولي هاتي صوتك ويديني خمسين جنيه... قولتلها توافقي بخمسين جنيه... قالتي يا سلام آه طبعا أوافق..... إلي هنا أنهيت نكشي البعيد عن السياسه خالص ليها..... يووووووووووووووووه.... برده إتكلمت معاها في السياسه......بس قعدت بعديها... ونفسي ما أفكرش فيها.... اللي هي البعيده السياسه...يجعل كلامنا خفيف عليها... تقريبا راكبني جني بيها... لقيت نفسي بقول... ده شعب يستاهل .... يا تري يستاهل ولا هو شعب غلبان... مش عارفه إحترت أكتر من حيرتي في المرض اللي عندي.... و بقت حيرتي حيرتين في مرضي و في الشعب المصري .... اللي شوفته علي الفضائيات ((اللي نفسي أبطل فرجه عليها))... شكلهم يفضح وهم رايحيين الإستفتاء وبتوع الجزيره والعربيه والقاهره اليوم نقوا شوية ناس !!!!!!!!!!... ولما سألوهم جايين ليه.... كانت الردود فضيحه.... و طبعا معظمهم ستات ما بتفكش الخط و كانت الإجابات كالتالي ....أنا جايه علشان قالولي ده هيبقي كويس للتموين.... والله سمعتها بوداني... لو مش كده مش هصدق... واللي تقولك مش عارفه !!!... هم قالولي روحي ...و تخيلوا إنتو باقي الإجابات.... فضايح.... والله كانت فضايح علي الفضائيات..و الفضيحه الكبري كانت في النتيجه النهائيه...اللي الشعب قال فيها كلمته بحريه... و السته وسبعين في الميه ...اللي قالوا نعم للتعديلات الدستوريه......برده إتكلمت في السياسه .....داء واللي فيه داء بقي.... محدش عنده أقراص لامبالاه...أو حتي حاجه من الطب البديل بتاع عادل عبد العال اللي النائب العام منعه بعدما صال وجال في الفضائيات علي كيفه وبراحته...أي حاجه يا ناس... أختكوا مريضه... سامحوني... بس الناس إستفزوني..و رغم إني كنت ناويه في البوست ده ما أجيبش سيرة البعيده... ((مش هقول إسمها... يمكن أخف منها)).. بس واضح إن علي رأي سعد زغلول لما قال ......مفيش فايده...............أريد حلا

34 comments:

мїяάЖάгїм ™ said...

مفيش فايده يا ريري ، كله سياسه...
الاكل سياسه والشرب سياسه و الميه سياسه ، يمكن ابعد الاشياء اللي ذكرتيها عن السياسه هو القمه العربيه
اتفرجي علي اللينك ده وانتي تعرفي ليه:
http://www.youtube.com/watch?v=P5B_PAk1rmc
وشكرا علي التعليق
by the way (the link to my blog u have on ur page is not working, maybe because the correct link is http://chiccopolis.blogspot.com)

ياسمين said...

واحدة قالتلى هو يعنى ايه .. الدستورية دى .. قلتلها قصدك التعديلات الدستورية؟
قالت آه هى دى
قلتلها دى تعديلات على بعض مواد الدستور القديم بتاع 1971
قالتلى يااااه دة قديم قوى بس يعنى ايه دستور أصلا؟
قلتلها لأ سلام بقى معاكى ربنا
ومعانا احنا كمان

تامر نبيل said...

بلاش تتعبى تفسك

سعد مات وقال مفيش فايدة

ورغم كدةى نقول الامل موجود

وربنا كبير

تحياتى

micheal said...

ههههههههه...أنتي عامله زيي بالضبط...أنتي عارفه أنا قاطعت السياسه و طلقتها بعد يوم 9 أبريل2003 بس شوفي لفت الايام و دارت و اديني بتكلم فيها طول الوقت علي المدونه..شكلها كده حاله ميئوس منها...ربنا يشفينا...بقولك ايه حاولي نطلع بره السياسه شويه...تفتكري المحروس زينه شباب مصر محمد باشا القماح حيكسب؟
تحياتي لكي

reri said...

karim

أهلا يا كريم وخلاص اللينك إتظبط..بس فعلا القمه العربيه مش سياسه وخاصة بعد البيان بتاعها.. دي تقريبا بدنجان

سلاااااااااااااام

reri said...

ياسمين

منوره يا ياسمين...ربنا معانا كلنا بس حلوه حكاية الدستور قديم أوي ...بعد كده المفروض ينزل دستور للصيف ودستور للشتاء حسب حرارة الجو
شكرا للمرررررررررررور

سلااااااااااامات

reri said...

تامر نبيل

تفتكر في أمل ... ولا هموت زي سعد وأنا لسه بقول مفيش فايده...ما تقطعش الجوبات

سلاااااااامات

reri said...

micheal

علي رأيك... بلا سياسه بلا بطيخ... خدنا إيه منها غير وجع القلب... بس فكرني إيه اللي حصل في 9 إبريل 2003أصلي بجد مش فاكره..و القماح طبعا لازم كلنا نكون وراه ومعاه لأنه أمل مصر القادم

سلااااااااامات

omas said...

dy nafs el 7ala :S,...bas ne3mel eih ?!!,..politics in everything ,..it's everywhere around us ,..we mention it even if we don't want...!!

we bardo mafish mafish mafish fayda...!!

يا مصر اكتب إليكي رسائلي said...

بمناسبة ذكرى المولد النبوي الشريف ،
يسعدني انت انتهز الفرصة لأتقدم بخالص التهاني
وأطيب التمنيات القلبية
لكم والأسرة والأصدقاء ، وكل عام وانتم بخير

الحصان الأسود said...

ياااااة
تصدقي الست دي طماعه قوي

خمسيييييين جنية حتة واحدة

ههههههه
دة فية ناس بتبيع صوتها بعشرة

عالعموم دة بيبقى في انتخابات كجلس الشعب بس

انما الانتجابات الدستورية دي مدعومة دعم حكومي مجاني

يعني الست دي اتمضالها بنعم منغير ماتروح اصلا ومن غير ما تاخد ولا حتى ربع جنية

R.R said...

:)
:)

يارب يا ستى العدوى تنتشر والناس كلها يجلها نفس المرض يمكن تبدء تدور على العلاج

خمسين جنيه وتدى صوتها

؟
انا مش ممكن ادى صوتى باقل من 200
جنيه
ايون هو صوتى ده شويه هو اللى هيعدل الكفه طبعا

ما زال الامل موجود
طول محنا عايشين
تحياتى ريرى

الدبور said...

فكرك الكلام هيجيب فايده مع الناس
ولا كلام علشان الواحد بفضفض عن اللي في قلبه
مش عارف والله !
انا عندي نفس المشكله

Abdou Basha said...

لأ هو شعب غلبان.... وفي نفس الوقت يستاهل
:)

micheal said...

9 أبريل 2003 هو اليوم اللي الامريكان دخلوا فيه بغداد...معلش اصلي بصراحه منت بأكل الاونطه من كلام الصحاف و نصدقه لغايه ما اتصدمت
تحياتي لكي

واحد من الناس::طارق:: said...

عارفة .. المرض اللى عندك دة هو المرض الوحيد اللى لو انتشر فى البلد ..البلد دى هاتخف وينصلح حالها
الناس لما بتفهم حالها بيتغير .. لما بتفهم ان مفيش حاجة ماتخصهمش فى اللى بيحصل دة ..وان كل قانون او تعديل او سياسة بتتاخد هاتعود عليهم اما بنفع او بضرر

copa said...

هههههههههههههههههههنيهاهاهاهاهاهاه
اقوليك اقوليك علي حاجه في بلدنا دي كل يوم كل ما الناس هتتكلم في السياسة صدقيني انا خبير اساسا و مش بقول كلمه الحمد لله الا لما تتحقق
ههههههههههههههه الحمد لله
عايزه تعرفي حل للسياسة و الله و هيجيب نتيجه معاكي و اناواثق
بصي انتي تسمعي للاخر هتنزلي علي صيدلية العزبي وتقوليلوه عايزه كرتونة اقراص منومه بسسسسس
انتي تاخدي القرص من هنا و ينايميك 4 ايام زي الفل انا مره اخدته قاعدت اسبوع مش في الدنيا صحيت بقولهم هو في ايه قالولي حسني اخد فترة كمان قلتلهم هو انا نايم بقالي اد ايه قالولي اسبوع متخفيش انا مجربها انتي بس اعملي كدا خدي قرص و كل ما تصحي خدي و فجائه هتلاقيهم بيصاحوكي في البيت جامد هتسائليهم في ايه هيقولوليك مصر بقت اقوي دوله في العالم بس يا خساره تقريبا ممكن هتكوني جده او جد لجده تانيه هههههههههههههه بتسائلي ست غلبانه علي التعويرات الدستورية طب انتظري ردي في بوست جديد و هتشوفي بقي الفلسفه الكبكابيه

Sharm said...

مين البعيدة دي ؟

dr_lazeez said...

eah 2el kalam el keber dah !!!!!
dostooor !!!!! we seyasa !!!!!!
ana 3awez kalam tafeh

howa dah 2ely 3awzen yesma3o mena .
we howa dah 2ely mish hane3meloww.

enty 3andek 2esloob 7elw we yeshed we ya reat el nas kolaha keda .
makansh ba2a fe gahl seyasy .
we kan ba2et masr 2a7la balad

bastokka طهقانة said...

كنا رحنا صوتنا و اخدنا الخمسين جنيه و علبة حلاوة المولد افيد
و اهو كده كده التعديلات اتوافق عليها

احنا باين علينا شعب فقري

مجدى المغربى said...

البت دى أنا عارفها كويس جدا جدا جدا
لأنى انا الى مولدها على أديه دول , وكبرت على ايدى وأول ما اتعلمت الكلام وبقت تمشى كانت كل ماتشوفنى تجرى وتتحدف على وتقول ارفعنى فوق, وبعد مارفعها عدة مرات وتتقطع انفاسى, تجلس فى حجرى وتقول لى: قول عدوتة, تقصد حدوتة ولو انى لاأذكر أى عدوتة من تلك التى كنت أقصها عليها ولكن والله أعلم كانت عواديت أقصد حواديت سياسية
لكن لما كبرت واتخرجت من كلية الصيدلة, اكتشفت ان كل العواديت معششة فى دماغها وكل ماكانت لاتدركه من عواديتى نبشت عليه واعادت الأستماع اليه وأدركت كثيرا من المعانى التى أثقلت جوانحى, بعيد عنكم عيلة غاوية نكد وسياسة, على فكرة أبقى فكرينى يا بت أقولك حدوتة أو عدوتة لنج
سلام يا هاط..... ولا بلاش

reri said...

omas

واضح جدا إن مفيش أي فايده بس أدينا بنحاول يمكن يكون في أي فايده
شكرا عالمرور
سلاماااااااااااات

reri said...

يا مصر أكتب إليكي رسائلي

شكرا وكل سنه وإنت طيب
سلااااااااااااام

reri said...

الحصان الإسود

هههههههههههه.. تقول إيه في طمع الدنيا ...شعب ما يملاش عنيه غير التراب
سلامي ليك

reri said...

r.r

أهلا يا رانيا... إنتي مفتريه كده ليه 200 جنيه مره واحده
قولي 10 جنيه زي الحصان الإسود اللي أعتبر الست طماعه علشان حلمت تبيع صوتها بخمسين جنيه ...علي العموم منوره

سلاااااااااامات

reri said...

الدبور

ممكن الفضفضه تجيب فايده ... ممكن ...كل شئ جايز
واضح إن الفهم في زمانا أصبح هو المشكله
تحياتي ليك
وسلامااااااااات

reri said...

abdou basha

أهلا يا عبد الرحمن ... حاجه تحير ..فعلا مش عارفه هم غلابه ولا يستاهلوا

سلامي ليك

reri said...

micheal

أهلاااااااااااا.. عرفت التاريخ ده... بتاع الصحاف وأيام العلوج هههههههه...كانت أيام ... كلنا كنا هبل ومصدقين ... القماح لم يفز وأمل مصر ضاع ... بس الأمل في العراق لسه موجود ...البنت اللي فازت عراقيه ... العراقيين نسيوا كل حاجه وفضيوا لمتابعة ستار أكاديمي

تحياتي ليك

reri said...

واحد من الناس ..طارق

منور يا طارق... ويا ريت الناس تحاول تفهم وتشغل مخها ...أكيد حاجات كتييييييييير هتتغير

سلامااااااااات

reri said...

copa

هههههههههههههههههههه... فكره جنان ...بس ليه العزبي بالذات ما ينفعش سيف... هو إنت علي بتاع واحد من الناس ولا إيه؟؟؟؟؟؟

سلام كبير ليك يا كوبا باشا

reri said...

sharm

هاااااي يا أحمد ...بلاش تجيب سيرة البعيده علشان أنا في فترة نقاهه.. لما أخف خالص هقولك إنها السياسه ..يووووووه فكرتني بيها

سلاااااااامات

reri said...

dr_lazeez

شكرا ليك علي كلامك... ويا ريت الناس تهتم وتحاول تقول رأيها ...أكيد الجهل السياسي لو راح.... بلدنا هتكون أحسن

سلاااااااااااام

reri said...

bastokkaطهقانه

أهلا بيكي في أول زياره لمدونتي... يا ريت تتكرر... واضح فعلا إننا شعب فقري جدا ...بينا من غيرنا مش فارقه ... كنا رحنا وخلاااااااااااص

سلاماااااااااات

reri said...

خالي وحبيبي د.مجدي المغربي

ما تعرفش أنا مبسوطه أد إيه إنك موجود هنا في المودنه المتواضعه بتاعتي...تفكيري في ذكريات طفولتي دوما يبدأ بيك وينتهي بيك..من أول أغنيه إتعلمتها في طفولتي وهي الدبدوبه التخينه إلي إلي ..ذكريااات كتيييير ...أكيد عواديتك أقصد حواديتك لسه جوايا ...شكلت أفكاري .. ممكن إني لا أتذكرها ولكنها بالتأكيد في وجداني ...جوايا..ترقد داخلي صامته ..لكنها تطل بشبحها لتظهر في تفكيري وتصرفاتي ..يا ريت تزورني دايما وبلاش حكاية هاط... بلاااااااااااش

سلااااااااااااااااااااااااام يا خالي