Tuesday, May 29, 2007

أين عمري


زمان وأنا صغير كنت بحلم أبقي كبير

الحلم ده يهيئ لي أنه داعبنا جميعا

داعبنا من زمان

ننظر لمن أكبر علي أنهم هدف نريد اللحاق به


كنا بنتسابق مين فينا أكبر من التاني أنا والعيال أصحابي ... دي أكبرمن دي بشهر ... تحس بقي بفخر.. وتقولنا إنتوا عيال ... كنت وأنا عندي 13 سنه أقول يااااااااااااه إمتي يبقي عندي 20 ... ده لسه كتير أوي ....نفسي أكبر بقي وأبقي زي فلانه وأبقي بنت كبيره كده .. وآنسه وطبعا أدخل الجامعه ويكمل الحلم طبعا... وأقابله... زي ما كل

الأفلام والمسلسلات أوحت لي إن في الجامعه هقابله يعني هقابله...((طلعوا كدابين أوي ))...و محدش يقولي هتقابلي مين؟؟؟ ... أي حد والسلام


حلم إن الواحد يكبر ده فضل معايا .. وبيكبر معايا ... إلي أن وصلت العشرين ... وتك تك تك تك بقوا 24... إزاي إمتي ؟؟!!!!!!!!... طيب والنبي هرجع في كلامي ومش عايزه الحلم المنيل ده ... إستحاله !!!!!!!!... مفيش تفاوض ... هي كده تك تك تك تك وبقوا 24 ..... طيب مفيش إختراع يوقف عداد العمر اللي نازل يرف علي دماغي من غير مناسبه ده ... أبدا ... مفيش تفاوض .... تك تك تك تك وهم ال 24 ... طيب عندي حل ... ما كفايه الأربع تكات دول ... ونقفل عليهم .... نو واي ... مفيش تفاوض ... والمفاجئه الساره إن فاضلك تكايه صغنونه وتبقي 25 .... يا نهار كارو


يا عمري كفايه وبلاش التكايه


بعترف إني كنت هبله لما حلمت الحلم ده ... يا ريتني فضلت هبله

بعترف إن كان عندي تخلف عشوائي .... لما حلمت أخلص الإبتدائي

بعترف إن كان عندي دربكه سلوكيه .... لما حلمت آخد الإعداديه

بعترف إن كان عندي سحابه ضبابيه .... لما فرحت إني إرتحت من الثانويه

بعترف إن كان عندي إعاقه ذهنيه .... لما حلمت أوصل رابعه كليه


كنت وأنا في الكليه كل سنه دراسيه ببص علي أي جدول وأقول يا رب إمتي أبص علي الخانه الأخيره فيه ....اللي هي خانة سنه رابعه


مش هنسي بعد لما خلصت أول تيرم في تانيه " بعد إعدادي " لما قلت لرشا ... فات نص الطريق وباقي نصه بالظبط ... كنت للأسف بقولها وأنا مبسوطه ... ما كنتش عارفه إن ده كله من عمري بيفوت

أتذكر أول يوم في الجامعه وكأنه أمس ... بكل تفاصيله ... كنت لابسه إيه ؟؟ ... قابلت مين ... يمكن أكون نسيت كنت لابسه إيه إمبارح أو حتي شفت مين
ليه إتسرقت مني كده يا عمري؟؟؟؟؟؟؟؟؟؟؟؟؟؟؟؟؟؟؟؟؟؟


نفسي ألحقك يا عمري .... نفسي أعيشك .. إديني فرصه أحس بيك .. حساك أسرع مني

أسرع من طاقتي علي الجري

عارفه إني مش هقدر ألحقك

نفسي ألحقك وأقولك طلب واحد ... ممكن بس ما تجريش

إنت ليه ما بتسمعنيش

لأنك أسرع من الضؤ وأسرع من الصوت


يا تري هلحقك يا عمري قبل ما تفوت

ولا هتسبقك وتسبقني لحظة الموت

95 comments:

اسكندراني في الغربة said...

المرادي هاتي انتي ودنك اقلك حاجة عمرك الي عدى وعشتية عوزة اة تاني . اكيد مكنتيش نايمة و الي فات مكنش احسن ولو فضلتي كدة حيضيع منك عمر جاي تعملي فية الي انتي عوزاة و لو معرفتيش عشية زي منتي عوزاة و لو مقدرتيش يبقي دي مشكلة مش حتحل لو رجعتي وعدتي عمرك 100 مرة

بس بجد احلي بوست اشفتوا السبوع دة

KOKKO said...

ان شاء الله تلحقيه وتعيشيه احسن من ما كنت عايزاه
بجد حسيت قوي البوست ده يا روكا
ومتجريش ورا الزمن ...هو
اللى يجري وراكى
تحياتى

shermen said...

انتي تقفي عند 24 يا رحاب وكبري دماغك يا قمر
من الاتيكيت ان لا تسأل المرأة عن عمرها
أنا كمان بعاني من نفس المشكله

مش عاوزه كفايه كده
تك تك تك بقوا 25

ربنا يستر

أحلى بوست قريته


جميل جدا
أصلي حاسه بيه أوي

Van Gogh said...

عايز اقولك ان احساسك ده
حالة عامة

يمكن يكون السبب فيها اننا مش قادرين نعيش جمال كل عمر بجد

ويمكن يكون صدممتنا بعد التخرج وانهيار كتير من احلامنا على صخرة الواقع هم السبب

هوه اللى خلانا نحس اننا عجزنا واحنا لسه فى العشرينيات

زمان قالوا ان الست هى بس اللى بتخاف من الزمن

من 10 الى 20 تقول سن اكبر من عمرها

من 20 الى 30 تقول عمرها الحقيقى

فوق ال 30 تبتدى تصغر

:)

حاسس ان الرجالة كمان بقوا كده


تحياتى

انتظار مؤقت said...

شوفي انا عايز افتي اقول حاجه على قدي ان الموت مبيسبقش العمر الموت هوه اخر العمر بس خلاص انتهت الفتوه ..زوريني و متزعليش من الي انا كاتبو عندي

Amr Ahmed said...

ايااااااااااااام بتفوت مننا

يعني ايم الاعداادي والثانوي

الواحد كان بيقول معقول

هاخلص ثانوية عامة

والكلية واول يوم
اللي مبيتنسيش خالص

البوست ده تعبني

AHMED SAMIR said...

كل سن في الحياة او في عمرنا وله جماله
بس بجد مانكرش ان كل ما بكبر بحن قوي للحظات الطفولة والصبا والاحلام الوردية
المصيبة بقى بجد اني كل ما بكبر بتتقلص احلامي وبتتحول الى الواقعية
تحسي كدة انها بالبلدي بتكش
shrunk
تحياتي ليكي يا زميلتي العزيزة وكل سنه تعدي تزيدك تفاؤل ورغبة في الحياة
وانا مستني تدوينتك وانتي بتقولي تك تك تك 100 سنة
تحياتي ليكي

LOJAIN said...

بت يا رحاب

انا عايزة انحرف يا بت
ههههههههههههههههه

انا رايحة التوكيل بكرة ان شاء الله
وانتقل المقر من ميدان تخلف وراثى عمارة ابو ريالة,لى جمبها على طول لصاحبها
اهبل ؟, تمبل ,, بس اعيش
هعدى عليكى بالمينى سوزوكى بتاعتى
المينى دى اتنين راكب بس :))
ودورين فوق بعض مش جمب بعض
ابقى تعالىىىىىىى

Regards:
Lojain :)

محمد عبد الغفار said...

لا عمرى حلمته لا اتمنيته

ومازال فى العمر الكثير وان تبقت فيه لحظه

Reemo said...

بعد الشر عليكى يا قمر
بس أنا زيك برده
نفسى أوقف العمر
نفسى ارجع تانى وابتدى من الاول
العمر معايا عدى بنفس الطريقه تك تك تك لقيت نفسى 26
مش عارفه عدو ازاى ولا فى ايه
بس الأكيد انهم عدو
نفسى الباقى ميعديش بالسرعه دى
بتمنى يبقىفى فرصه اعمل حاجات كتير
بتمنى بجد احقق كل اللى مقدرتش احققه فى العمر اللى فات
البوست ده فرق معايا جدا يا رحاب
بجد مش عارفه اقولك ايه
بس انا حساه جدا ويمكن ده كان سبب اكتئابى من فتره كده
انى حسيت ان كبرت فجأه من غير ما أعرف السنين عدت ازاى
يارب بكره يبقى احسن
محبتى وقبلاتى

MaMaDo said...

مش عارف ابتدى منين مش الشمال و لااليمن بس
يلا تيمنو


ما انى عندى تمناشر سنه بس حاسس بجد انى عشت اكتر من خمسين سنه
على رأى جاهين
شاب لكن عمرو الف عام


كنت زمااان بحلم اخرج من عنق الزجاجه عشان اعيش شايف احلامى كلها فى بكره
شايف اخر الشارع منور

بس لما كبرت يمكن حسيت انى مكنتش عايش زماان و عايز ارجع زمااان
الواد الصوغير

بس وقت لا ينفع فيه الندم

بس انا مش استسلمت و قعت افكر انا لو كنت زماان كنت هعمل و هعمل

لا بيقيت اعوض امبارح فى النهارده
ازعل و افرح و اعيش اعيط و اضحك
اليوم كله عايش مفيش فرصه انى افكر و احس الاحساس ده


مش عارف ليه كل مره اخرج عن الموضوع الى انتى بتكلمى فيه بس انا باكتب الى انا حسيته اول ما قرأت الموضوع
حساس بجد ان انا الى كاتب الموضوع مش انتى


يلا خير

سيبك انتى
قوليلى انتى عامه ايه فى الحياه

Hannoda said...

إنت كده جبت كل الكلام اللي جواي

وبمات إنهم 24 برضه.. فأنا كمان كتير بقول و النبي لا تقفوا و ما تكمّلوش

بس أن غيرك

أنا إستوعبت و انا لسة فثالثة كلية إني أبقى مجنونة لو قلت إمتى الكلية تخلص

أصل جو الدراسة بيبقى مافهوش مسئولية.. بغض النظر عن مسئولية المذاكرة لأنها من أجمل و ابسط المسئوليات

وبيبقى مليان بروح الشباب
ناس و صحاب وضحك وأيام مليانة حيوية و مشاركة


بس هو ده العمر.. من مرحلة لمرحلة تقدري تكتشفي لكل مرحلة فيه طعم و مميزات وصلاحيات جديده ليك في الحياه

الأحسن إننا نشغل نفسنا بتفاصيل كل عمر بنعيشه و ننكش فيه فنطلع منه أجمل ما فيه بدل ما نزعل على العمر اللي فات وما ناخدش بالنا من اللي فإيدينا

أنا بقول الكلام ده لنفسي كل شوية

ما تيجي نسمع الكلام ده و نحاول نظبّط نفنا عليه !!!
أوك؟

:))

تحياتي لصاحبة الـ 24

admelmasry said...

ريري
.
.
مش ممكن جميييييييييييل البوست تحفة بصراحه
.
.
تعرفي
انا كمان بحلم امتي اخلص
بحلم اجري م الكلية واقول يا فكيك
.
.
مش عارف ابدل الحلم دا بصراحه
مش عارف هل لما اخلص هاندم اني حلمت زيك ولا لاه
.
.
بس اللي متاكد منه
انه هيكون الوضع احسن بكتير
ع الاقل بالنسبة لي
.
.
حرنفسي
عارفه ياعني ايه حر نفسي
الاستقلال يا ريري
الاستقلال السياسي والاقتصادي عن رب الاسرة
يااااااااااااااااااه
انا باحلم باليوم دا
.
.
بصراحه مش قادر اقول لنفسي بطل عبط
تحياتي
يا حلوانية
والسلام

زحل الفلكي said...

اولا وقبل اي حاجه كل سنه وانتي طيبة
وربنا يديلك الصحة والعافية طول العمر

طبعاً مش حنبطل نكبر ولا العمر حيبطل يعدي

بس المهم نعرف ازاي لما تفوت سنه
نفرح بيها
بدل منزعل انها فاتت وانا بدأنا نكبر

لما نحط لنفسنا هدف ونحققه
كده من حنحس بإننا بنكبر
وحنفضل شباب على طول

تفتكري اكيد لما قولتي لصاحبتك انه فات نص الطريق بعد التيرم الاول من تانيه بعد اعدادي

انا في التيرم الثاني في ثالثة بعد اعدادي اهو يعني المفروض لسه تيرمين واخلص
علشان ده هدف
وحلم
مش حاسس اني بقيت في العشرين
ولا حاسس بأي فرق

برضه هي هي المصاصة اللي باكلها في الكلية واللي مش عاجبه يروح يشتري مصاصة هو كمان
وهو هو كابتن ماجد اللي كنت بشوفه من 10 سنين
لسه بشوفه وحفضل اشوفه ان شاء الله

وهي هي طريقة الجري بتاعت العيال دي ولما تلاقي كرسي عالي اجري وانط من عليه
مش حكبر طول مأحلامي بتشغلني عن اني اعد سنين عمري اللي فاتت
بالعكس
وقتها لما بكبر بفرح
اني قربت من حلمي
وكل لما اقرب منه

احط لنفسي حلم ابعد
بكتييير
علشان لما اكبر افرح اني قربتله
بسرعة
زي العربية بالظبط زمااان
لا زمااان ليه
دلوقتي
واحنا صغيرين دلوقتي
لما تبصي لبعيد وانتي في طريق سفر
وتحطي في دماغك ان النقطة دي حتوصليلها
وبعدين توصلي

ترجعي تحطي لنفسك نقطة ابعد
وكل ميفوت الطريق
كل منفرح بالوصول للهدف

happy birthday to u
وياللا حالا بالا بالا حيو ابو الفصااااااد

سلاموووز يا صغيره

Anonymous said...

البوست دا كان نفسي اكتبه بس انتي عبرتي احسن مني,انا انصحك نصيحه انا بقه كنت بقول زيك لما كنت 24 وكنت حاسس اني اتسرقت في السن لكن دلوقتي بقول يارتني كنت لسه 24 وهكذا بمعني ان شاء الله في ال 30 هقول ياريتني لسه 27 وهكذا. احنا نحاول نعيش عمرنا زي ماهو بجميع مراحله ومنفكرش في اللي راح ولا اللي جاي اخيرا انتي هايله في اسلوبك

Ahmed taher said...

ايوا يا ستي ريري
ايه يا حاجة ريحاب انت فين يا بنتي
الناس عمالة تكلمك وانت مش هنا
عل العموم انا وثيق من الفوز
ههههههههههههه
بصي يا رحوبة
العمر لا يقاس بعدد سنينة يا عزيزتي بل بما تم في هذه السنين وما الفائدة ان نعيش 100 عام او اكثر دون ان نشعر بشئ
عيشي حياتك ولسه العمر اللي باقي منك كتير وكبير وتقدري تعملي فيه حاجات كتير
المهم نستثمرة يا عزيزتي
بدل منعد نبكي كده لحد مهنلاقيه عده فعلا
كل البنات يا ربي كده متشائمين ايه ده بقا
يا جماعة عيشوا كل مرحلة من حياتكوا بحلوها وبمرها هكذا هي الدنيا
طب منا بقيت 28 ازعل بقا ايه ده انا كبرت وكده لا طبعا خالص بالعكس
هذا ما قدره الله لي
فينك يا 29 وفينك يا 30
فنتظارك يا 40 ويا خمسين ولا تزعلي
كم جميلا ان نسعد ونتعايش مع انفسنا
ومع عمرنا كما هو
تحياتي يا رحوووووووبة من اعلي مكان فوق الكيبورد
دعوة مني ليكي
كوني متفائلة زي كده
ولا اييييييييييييه

سندباد said...

مش عايز احبطك بس مش العمر بس هو اللي بيجري حاجات كتير اوي بتجري مننا ومش قادرين نقوفها او نلحقها احنا مطحونين والدنيا دي رحايا انما في الاخر دي سنة الحياة

ابو العربى said...

ليه كدة بس فكرتينى حرام
بس انا بعمل حل عبقرى كل ما بحس ان خلاص داخل على 25 اروح رايح للحلاق وقلو وقفلى شعرى ( اسبيك ) يعنى وروح جايب تيشرت روش ( بنك ) وحس انى صغرت كتير والحمد لله انا مبيبنش عليا سن
بس انا بعتبر دة هروب
بس هروب لزيز
بس فعلا مفيش حل مفيش حل مفيش حل
بجد بيجرى جامد قوى

Rosa said...

ريري الظاهر ان دي الحاله العامه الي بتحصل للناس لما يوصولا الاربعه وعشرين
ماتعرفيش بالذات ليه الاربعه وهشرين وليه مثثلا مش ال23 نفس الحاله الي بتقوليها دي عندي بالظبططط
ماما كانت تفضل تقولي زمان استمتعي بكل مرحله انتي فيها وماتستعجليش هاتعيشي الجاي هاتعيشي
كنت بحاول اعيش عمري وماستعجلش بس برده جوايا عايزه اكبر وابقا البنوته الي عايزه تلبس كعب واديني لبست خدنا ايه غير قطمت الوسط وخلاص
:]
يمكن يا ريري لو حاجات معينه من الي كنا فاكرين هنحققها لما نكبر اتحققت وفرحنا بيها ماكنش همنا لا 24 ولا حتى 60 اعتقد ان المشكله كلها تكمن في احساسنا اننا ماوصلناش للعايزينه وماقدرناش نحققه ونستمتع بيه
وكل سنه وانتي طيبه يا زميلة ال 24
:D
سلام

Tamer Nabil Moussa said...

دة مركب وماشية فى بحر يارحاب والمرسى جى ادام لكن امتة الله اعلم

كمان شوى وهتبقى جدة مش زوجة



كل واحد فينا لما بيكون فى لحظة معينة بتمنى يعديها ويروح لغيرها ولما تفوت هنا بس يعرف قيمتها ويتمنى تانى ترجع لية

هيا دى الدنيا هيا دى الحياة


تحياتى

ody911 said...

هههههههههههههههه
هههههههههههههههههههههه
هههههههههههههههههههههههههه



أسمحيلى أضحك

إنتى هبه وبقيتى 24

أنا هووووبة وبقيت 27 وفاضلك تكة وتطلع برة



وبعد إعدادى ؟؟؟؟

هندسة يعنى


ماشى


على فكرة العمر فعلا سريع جدا

لأنى آخر حاجة فاكرها وانا سنى 21 سنه

كنت مبسوط

دلوقتى بيجرى وبيكر زى العقد المقطووع بالظبط


مش تلحقى تشوفى إللى وقع أد إيه ؟؟


معلش مسرها تروق وتحلا


وعااااااااااااادى بقة


أودى

تائهة فى أرض الأحلام said...

سبحان الله
انتى عايزة توقفى عمرك
اما انا فنقفسى أكبر بسرعة وبسرعة واحقق الللى انا عايزاه وأموت وارتاح بس طبعا لما ربنا يرضى عنا واموت شهيدة
ربنا يكتبها لك ويكتبها لى

العمر ساعة هاتتعاش هاتتعاش ولو الساعة ديه مشيت ببطئ غصب عنك هاتتمنى انها تمشى بسرعة علشان اكيد اكيد نفسك فى حاجة هاتتحقق كمان اسبوع وحاجة كمان شهر وحاجات كتيرة احنا فى انتظارها حتى قبل الموت بدقائق

تحياتى لك

أحمد سلامــة said...

طب برضو لسه مش كبيرة قوي
سنا يعني
فاضل شوية
ممكن تستغلى بقى الفرصة وتتعلمي من اللي فات
وتعيشي يومك بالطول والعرض والارتفاع كمان
متضيعيش وقت في حاجات مالهاش لازمة زي قراية الكومنت ده مثلا
:)
اسرقى من الزمن لحظات سعاده على قد ما تقدري
ولما تبقى كبييرة كده وفي التمانينات ولا التسعينات هتحسي انك متسرقش منك العمر ولا حاجة مادام عندك مخزون حلو وجميل من الذكريات
ولأحفاد طبعا ؛)

كراكيب عادل said...

رحاب عيشي اللحظة الي انتي فيها

بكرة برضو هتبقي ذكري وتدوري عليها

عيشي اليوم وانسي امبارح

وفي اخر اليوم فكري في بكرة

ربنا يسعدك بالصحة اهم شئ

Ehab said...

كده يا ريري تنزلي بوست جامد زي ده وانا معرفشي ماشي المهم اول حاجه انتي حاسه الإحساس ده عشان زيك زينا كلنا العمر اللي بيعدي منك او اللي عدى خلاص معملتيش فيه كل اللي كنتي بتحلمي تعمليه عشان الظروف وعشان الكسل وعشان الملل وعشان قهر المجتمع _حلوه قهر المجتمع دي_ وعشان كل المعوقات اللي حوالينا كجيل _معوقات وجيل ده انا بقيت سقراط يا ناس_ فابالتالي اللي عدى مش قادره تقتنعي انه عدى لكن الحل انك تقفي مع نفسك وتحددي اللي انتي عايزه تعمليه ايه بالظبط في الوقت اللي جاي وعايزه الخطه الزمنيه تكون قد ايه ولما تخلصي تحاسبي نفسك عملتي قد ايه ساعتها صدقيني كل لحظه في عمرك مش هاتحسي اها اتسرقت منك ولا حاجه بس المهم انك تكوني حققتي حاجه فيها كلمه قولتيها درس اتعلمتيه معلومه فهمتيها فكره عارضتيها رأي قولتيه مشروع دخلتي فيه المهم تعملي حاجه
وطبعا احب اقولك ان محسوبك اليومين اللي فاتوا كان متنكد جدا لأني قعدت اراجع مع نفسي انا حققت ايه لحد دلوقتي ما علينا ادعيلي وانا ادعيلك ان ربنا يفرجهاعلينا كلنا ونحقق حاجه في البلد المنكوبه دي
سلاااااااااااااااااااااام

Ehab said...

ا صحيح لو مافيهاش غتاته يعني هو لو ممكن تخلي لوجين تركبني معاها العربيه الميني سوزوكي اتنين راكب دي تبقي عملتي فيه معروف ده انا هيبقي شكلي تحفه وانا قاعد جنب الشباك
ههههههههههههههههههههههههههههه
سلاااااااااااااااااااام

مشروع انسان said...

سبحان الله الانسان ده عجيب امره لما يكون صغير ينتظر لما يكبر ولما يكبر يقول فين ايام زمان وقبل ما يتجوز يحلم باليوم اللى هيتجوز فيه وبعد ما يتجوز يقول فين ايام العذوبية وراحة الدماغ وهكذا فى كل امر بيكون كده ويقول كده فعلا مفيش احسن من الرضا ونعيش فى كل عمر وكل مرحلة مساوئها وحسناتها ونفتكر الجانب المضئ دايما من الواقع ونفتكر الام الماضى هنرتاح جدا لاننا مش هننعرف نغير الكون ولا روحنا للماضى تانى برضه هنتمنى نرجع للحاضر فعلا لو اطلعتم على الغيب لاخترتم الواقع لان مفيش احلى ولا افضل من الواقع لكل واحد فينا مهما كان مؤلم وصعب ممكن نكون شايفينه كده بس اذا بصينا ليه كويس مش هنلاقى افضل منه بس نغير بس نظرتنا للحياة
خلينا نشوفك

Masry said...

ليه كدة يا بنتي .. ليه تقلبي علينا المواجع ..
اقولك حاولي تستمتعي بيه دلوقتي و متفكريش كدة .. انسي موضوع السن دة
و خدي قرار انك هتعشي اللحظة حتي لو عندك 100 سنة
لان لو فضلنا نفكر كدة هنفضل نتمني نرجع تاني صغيرين
و بس نتمني لان دة مش ممكن يحصل
و بهديليك اغنية طيري يا طيارة طيري يا ورق و خيطان .. بدي ارجع بنت صغيرة علي سطح الجيران .... و ينساني الزمان علي سطح الجيران

انا علي فكرة فاكر لما كان عندي 3 سنين و فاكر اليوم اللي اتصورت فيه الصورة بتاعتي دي ... و تك تك تك لقيت عندي 23 سنة ..

و مش عارف اوقف العداد برضة .. انا حاطة عندي اول حاجة في المدونة و مبلبسوش في ايدي علشان لما ببصلة بسرح

تحياتي

مصر هى أمى said...

احنا كلنا كده حسينا ان عمرنا اتسرق مننا
احلى ايام حياتى اما كنت فى الجمعة وايام ثانوى
ومع ذلك كنت عمال اقول امتى اتخرج واشتغل واما حصل واتخرجت كنت بقول فين ايام ثانوى والجامعة تانى

العمر بيتسرق والمشكلة ان كل يوم الاسوء فى حياتنا بيزيد بنبقى كلنا عايزين نرجع تانى
بس المشكلة انه مبقاش نافع

The Alien said...

كلنا عندنا نفس الحلم
حلم العودة إلي الماضي
أو إمتلاك ألة الزمن بس تكون شغالة

أكبر نقلة فعلا بعدها حسيت بالموضوع دا
لما خلصت جامعة وبدأت أشتغل
المرحلة دي التغيير فيها كبير وعنيف
عشان كدا نصيحة لأي حد ف الجامعة
خليك ف الجامعة
قصدي إستمتع علي قد ما تقدر وإنت ف الجامعة

المشكلة إن دا هيحصل تاني
يعني بعد شوية لما المسؤليات تزيد
هفكر وأقول فين أيام ما الواحد بدأ شغل وكان حر نفسه
ولهذا ... حلوة لهذا
لازم الواحد يستمتع علي قد ما يقدر
لأن العمر فايت بيقول آه
والقطر فايت بيقول توت

تحياتي

حصان بري said...

:) هو مبدئيا انتي لسه طفله وممكن المدونه تشهد معايا بكده
ثم لما هتبقي 40 هتتمني ترجعي 24
اتفقنا انها لحظه مابترجعش
مشكلتنا اننا دايما بنبص لورا مش لقدام
احلي ايام ايام الشباب
ولا انتي عجزتي؟
ماتضيعيش اللحظه بذكريات الماضي يا جميل
سلامااااات

عاشقة الوطن said...

ريـــــــــري

وحشتينييييييييييي
ازيك ياقمرايه

البوست ده انا حسيته زبحس بيه حاليا
نفسي اصغر تانى واعيش الايام ديه من تانى
يااااه الواحد فعلا كبر بسرعة والحلم اتحقق ومحسناش بيه

يالا الحمدلله على كل شئ

وحشتينى ياقمر
ووحشنى المدونة

سلااااااااااااااام

sherif gharib said...

ياه ليه كل التشاؤم ده يا بنتى
انا معاكى ان عمر الانسان لايمكن يرجع لورا بس اكيد كل مرحله و لها متعتها الخاصه المهم ان احنا اللى نعرف نعيشها
يعنى اجمل ما فى الطفوله هو قمه الاحساس بعدم المسؤليه من كل شىء مجرد مرور الايام هى قمه المسؤليه هى قمه الحريه
و بمرور العمر تتزايد المسؤليه و لكل فتره متعتها الخاصه
فكرتينى بحاجه
بتقول
يوم ما بصيت للمرايا قلت شايف ايه يا ترى
قلت شايف صوره حلوه حروفها متقشره
يا ترى ايه كان جوابى لو عاد الزمن سنه ورا
تحياتى

micheal said...

كل مرحله و ليها احلامها و فكرها الخاص..المهم نعيش كل مرحله بما يناسبها
أحييكي يا رحاب علي هذه التدوينه الرائعه

youssef said...

ياه يا رحاب ..جميل جدا تعبيرك البسيط و تلقائيته الجميلة السلسة ..و فيه طفولية جميلة ..بعد البوست ده اظن الوصف ده مدح ما يزعلش .... و فاهم كويس شعورك .. طبعا الزمن هو الزمن متساوي بحساب العقارب و الثواني .. لكن في الطفولة بيكون عندنا خيال وبس بيودينا لبعيد .. و مفيش عقل و لما العقل يزيد دوره شوية شوية لغاية ما يسيطر علينا ويموت الخيال .. نفهم معني ان اعمارنا تتسرق و تتسرب مننا .. اننا بنخسر و بنبعد عن حياتنا مش بنقرب .. مفيش وصفات سحرية للتخلص من الشعور ده .. لكن ممكن علي الاقل نعيش اوقاتنا و نحس بطعمها مع الناس اللي حوالينا اصحابك واحبابك و اهلك .. الحاجات الكويسة اللي بتقدميها ليهم ويقدموها لك و اللي بتقدميها للناس عموما .. اللي انت ما قابلتهوش في الجامعة زي ما كانوا بيكدبوا .. الاوقات الجميلة اللي منتظراكي معاه .. ده كله بيدي مسكنات لاحساسنا بسطوة الزمن..علي الاقل يسكن .. و يخلينا نفتكر و نقول ..صحيح خمسين سنة فاتوا هوا لكن قدمنا فيهم ابتسامة او لحظة سعادة لبني ادم .. شئ له معني .. تمنياتي بالتوفيق

إبـراهيم ... said...

رحوبة ، بجد مش عارف أقول لك إيه ؟؟



قلبتي عليا المواااااجع ، والذكريـات الراااائعة !!! الجميييـــــلة !!!!!!


كنت كتبت عنها مـرة !!!


تحيااااااتي لهذا البوست الجميل ....

مشكلة إن الواحد يحس فجـأة إنه كبر !!!
و ربنا يخليكي

Anonymous said...

ريري الجميلة دي اول زيارة ليكيف يمدونتك هقولك على حاجة ومتفتكرنيش بكدب انا دايما بحس ان السنين لما بتمر بتصغرني بتخليني اصغر مش اكبر بحس اني لسة قدامي حاجات كتير قوي لسة معملتهاش وبعرف حاجات كتيرة فبحس اني صغيرة وجهة نظر وعملتها لنفسي علشان متعبش من العمر اللي بيجري بسرعة وخصوصا اني في نفس عمرك

Anonymous said...

ايه ده
ايه العسل اللى بينقط ده
انا مش بعاكس ولا حاجة
بس بجد اسلوب كتابتك هايل
............
مشكلة الحياة بقى يا ستى
انها مش بتقف عشان تدينا فرصة نداوى جروحنا
احنا ممكن نعطل بس هى ماشية
.............
تحياتى

maged stephen said...

تجذبنا هذه الأفكار عندما ينتابنا قدرا من عدم الشعور بالرضا

ممكن تسيبى ودنى دقيقة واحدة وتمسكى الودن التانية معلش أصلى مش بأعرف أتكلم فى التليفون غير والسماعة على ودنى الشمال اللى مش باكل بيها

مرور للتحية
شوفتى بقى مين فينا اللى بيختفى؟

رينـــــــــــا said...

عاااااااااااااااااااااااااااااا
عاااااااااااااااااااااااااااا
عاااااااااااااااااااااااااااا
فكرتينى بنفسى اول ما لقيتنى هتمممممممممممم ال 24
حسيت انى فجأة خلااااااااااااص العمر جرى
وبقيت اتحايل على يوم ميلادى ميجيش
وهو ابداااااااااا
وتقوليش جى راكب صاروووووووووووووووخ
جى بسرعه جدا
وبعد ما كنت استنى يوم عيد ميلادى
بقيت مش عايزاه يجى
ايييييييييييييييييييييييييه دنييييييييييييا
معلش يابنتى
هى دى الدنيا

بس بقولك ايه
عيشى حياتك كدا ومتبصيش بئا على السن كدا كدا بيجرى
احنا بئا نستفيد ونستمتع

بوست جميييييييييييييييل
تسلم ايديكى

انتظار مؤقت said...

انا حبيت اوصل لغاية عندك هنا عشان اشكرك على مرورك عندي و قولك انها كانت خطوه عزيزه و ياريت كل الناس فهمت الي انتي فهمتيه و تحياتي من كل قلبي على مشاعرك الرقيقه

أسوور said...

انتى بتقولى كدة وانتى عندك 24 سنة
ضحكتينى وابكيتينى فى الوقت نفسه
اروح انا بقى ادفن نفسى
اصل عمرى 36 سنة
:)))))))))

أبو ضحى said...

العزيزة رحاب
فاهمك و فاهم احساسك وده بالذات احساس كل بنت فى سنك
انا عاوزاقولكانك لازم تعيشى حياتك زىما كنتى بتتمنيها اخرجى مع اصحابك سوفى الدنيا
انا عارف الواحد لما يكون فى كليه زى بتاعتنا دى بيبقى عنده كبت و مبيعرفش يعيش حياته كويس
انت دلوقتى خلصتى الكلية
حاولى تعيشى حياتك بقه

واذا كان عليه اكيد هتقابليه فى يوم من الايام لما يجى الوقت المناسب

ريحى دماغك و بلاش تفكرى كتير

تحياتى

reri said...

إسكندراني في الغربه

والنبي كنت حاسه إني نايمه
أصله فات كده فجأه وأنا مش واخده بالي خالص
هحاول أفكرؤ في اللي جاي

شكرا علي المروووووووووووووور
خلينا نشوفك
سلاماااااااااااااااااات

reri said...

kokko

مش هجري وراه
بس هو برده هيجري

منوره دايما
سلامااااااااااااااات

reri said...

شيرمين

إنتي شايفه كده
أثبتهم علي 24
واللي مش عاجبه يشرب من البحر
بس الناس اللي عندهم إتيكيت إنقرضوا يا شيرمين ودلوقت بيسألوا ومش وراهم حاجه غير السؤال

خلينا نشوفك أون لاين
سلامااااااااااااات

reri said...

van gogh

يا نهاااااااااااار
الرجاله إتعدوا هم كمان
:)
اللي إنت قلته أكيد سبب للإحساس ده

ما تقطعش الجوابات ولا الزيارات
سلامااااااااااات يا أبو الزمل

reri said...

إنتظار مؤقت

الموت أكيد آخره
وزرتك وما تخضتش ولا حاجه
:)
ده حتي الحمار ظريف جدا
هههههههههه

ما تقطعش الزيارات ولا الجوابات
سلامااااااااااااات

reri said...

amr ahmed

تعبك يا عمرو
تعبك أكتر من المانجا اللي إنت فيها
هههههههه

أتكلم بجد بقي
آسفه لو كان البوست تعبك يا عمور
الأيام مش بتفوت يا عمرو مننا دي بتجري بسرعه رهيبه الواحد حاسس إنه في سبق

منور يا باشا
سلامااااااااااااااات

reri said...

a.samir

هههههههههه.. تك تك تك 10 سنه
يا شيخ
هو أنا ساعتها هبقي عارفه إيه المدونه دي أصلا
معاك جدا في حكايه الأحلام اللي بتكش دي
وبيحصلها
shrunk
زي التجارب في الكليه .. فاكرها
:)
كانت أجمل أيام

خلينا نشوفك
سلاماااااااااااات يا زميل المهنه

reri said...

lojain

ههههههههههههههه
إبقي عدي عليا ضروري
ها
إوعي تنسي
أصل صاحبك إتهري خلاص
عايزه أرحمه وأحط بقي قطعة غيار تستحمل اللي لسه هيشوفه
والنبي يا أختشي حاسه إنه لسه هيشوف كتييييييييييييييير
ههههههههههههه
مستنياكي إنتي والميني سوزوكي بتاعتك
:))))))

بس أنا بقولك أين عمري
مش أين قفاي
هههههههه

أشوفك كده علي طول أون لاين يا رب
سلاماااااااااااات

reri said...

محمد عبد الغفار

عمرك ... متأكد ... إفتكر كويس
علي العموم بحسدك علي التفاؤل بتاعك
حلو برده

شكرا علي المروووووووووور
سلامااااااااااات

بسمه عبدالباسط said...

كلنا بنحن لأيام الطفولة الجميلة وكلنا كنا بنقول كده أمتى نكبر وكل سن فعلا وله جماله
تحياتى يا قمر

الطائر الحزين said...

السلام عليكم
ياه
ياريت اعمارنا بتتحسب بالسن ياريت نحسبة بالطاعه وانتى هتلاقينى وتلاقيكى وتلاقيى معظمنا لم يبلغ سن الفطام
تدوينة جميلة انا علقت باللى خطر فى ذهنى معلهش وربنا يعطيك الصحة فى طول عمر

reri said...

reemoo

إن شاء الله ياريم
الجاي يبقي أحسن
و تحققي كل اللي حلمتي بيه
فاهمه إحساسك أوي يا ريم

منوراني دايما يا قمر
سلامااااااااااااات

reri said...

mamado

ما إنت لسه صغير يا مامادو
ما تيجي نبدل
تديني ال 18 بتوعك
وتاخد ال 24
هههههههههه
مبسوطه إنك حاسس إن البوست بتاعك وكأنك كاتبه
علي فكره إنت مش بتخرج عن الموضوع ولا حاجه
هحاول أعوض إمبارح في النهارده زيك

إبقي قولي الحياه عامله إيه فيكي يا مامادو
:)
علي العموم الحمد لله ماشيه

خليني أشوفك دايما
سلاماااااااااااااات

Anonymous said...

نفسي ألحقك يا عمري .... نفسي أعيشك .. إديني فرصه أحس بيك .. حساك أسرع مني
أسرع من طاقتي علي الجري
عارفه إني مش هقدر ألحقك
نفسي ألحقك وأقولك طلب واحد ... ممكن بس ما تجريش
إنت ليه ما بتسمعنيش
لأنك أسرع من الضؤ وأسرع من الصوت

يا تري هلحقك يا عمري قبل ما تفوت
ولا هتسبقك وتسبقني لحظة الموت

بجد مفيش تعليق
سلامى

الطائر الحزين said...

السلام عليكم
عمرنا مش بيتحسب بالسنين اللى عشناها
بيتحسب بالطاعه اللى فيه ولو حسبتية بالشكل ده هتلاقينى وتلاقيكى وتلاقى معظمنا لم نبلغسن الفطام
**************************
تعليق على التدوينة السابقة ان خروج المرأة بدون داعى طبعا مفسدة لان هناك ضوابط لابد ان تلتزم بها
اما لو تقصدى العمل
فالمرأة تعمل اذا احتاجت او احتاجها العمل

reri said...

hanoda

عارفه يا هند أنا وانا في الكليه رغم إني كنت عايزه أوصل رابعه بس برده كان نفسي أفضل في جو الكليه
يمكن إكتشفت ده متأخر في رابعه نفسها للأسف
ممكن فعلا زي ما إنتي بتقولي إننا هنضيع عمرنا اللي في إيدينا في التفكير في اللي فات
أما إني أحاول أظبط نفسي عليه فمش قادره هقوله لنفسي يمكن تظبط معايا
حاولي إنتي كمان
أوك؟؟؟

منوراني يا جميل
سلامااااااااااااات

reri said...

آدم المصري

أهلا بالحلوانين
:)
ربنا يحقق لك أحلامك طبعا يا آدم
بس حاول ما تستعجلش أيام الكليه عيشها بالبطئ بالتفاصيل
فاهمني

خلينا نشوفك
سلامااااااااااااااااات

reri said...

زحل الفلكي

رفعت معنوياتي والله
بس لسه شويه علي عيد ميلادي
ما تستعجلش وتقول ياللا حالا بالا
هي الحكايه ناقصه إستعجال

أنا مش حاسه من جوايا إني كبرت بس الواقع وشهادة الميلاد بيقولوا ده
فاهمني
عارف لو العمر بالإحساس أدي نفسي
16 سنه وأقف عليهم

منورني بجد
ما تقطعش الزيارات ولا الجوابات
سلامااااااااااااااات

reri said...

spyfun

شكرا طبعا علي كلامك
ونصيحتك هحاول آخد بيها بس بشرط إنك كمان تاخد بيها
ماشي يا أحمد

منور دايما
خلينا نشوفك
سلامااااااااااااااات

reri said...

أحمد طاهر

متفائله زيك دي صعبه شويه يا أحمد
تقريبا البنات كلهم عندهم حمي الإكتئاب
عايزه آخد كورس تفاؤل من بتوعك
بس مش عارف
مش متخيله إزاي أقول أهلا يا 30 وأنا مخضوضه من ال 25

سلفني حبة تفاؤل من بتوعك ولا قلي بيتباع فين وأنا أروح أشتري

خلينا نشوفك
سلامااااااااااااات

reri said...

sendbad

هو إنت لسه هتحبطني
صدقني أنا جاهزه مش محتاجه
سنة الحياه فعلا
بس مين بقي اللي يستوعب؟؟

ما تقطعش الجوابات ولا الزيارات
سلامااااااااااااات

reri said...

ضد الظلم

ههههههههههه
حل ظريف أوي حكاية إنك تروح للحلاق وتوقف شعرك إسبيك
ده علشان تهرب من ال 25
أمال هتعمل إيه في ال 30
:)
آسفه لو كنت فكرتك
بس هو إنت بتنسي أصلا ؟؟؟
:)))))))

خلينا نشوفك دايما
سلاماااااااااااااات

reri said...

rosa

عارفه ليه ال 24 بالذات أصل تقريبا خلاص بتحسي إنك داخله علي ال 25 يعني خلاص ربع قرن
دخلتي في الحسابات بالقرون
:)
وعلي رأيك يمكن لو كنا حققنا اللي بنحلم بيه كانت الحكايه مش هتفرق معانا

منوراااااااااااااني يا قمر
سلامااااااااااااات

reri said...

tamer nabil

هي دي الحياه
فاضل تكه وأبقي جده يعني
:)
ده رأيك
هو هيجري أوي كده يا تامر

ما علينا
كيب إن تاتش
سلاماااااااااااااااااات

reri said...

ody911

إنت كنت عايز تضحك أوي كده
علي العموم البلوج بلوجك
لو مزنوق في الضحك تعالي هات ودنك وإضحك براحتك
ههههههههه
آخر حاجه فاكرها 21 و هووووووووبه وبقيت 27
الله يطمنك
عااااااااااااادي بقي
:)

خلينا نشوفك
سلاماااااااااااات

reri said...

تائهه في الأحلام

ما تقلقش خالص
هتكبر بسرعه صاروخيه
أضمن لك إنك مش هتحس بالسنين أصلا
صدقني

تصدق أنا علي غير العاده نفسي الإسبوع ده يخلص

منور في أول زياره
إبقي كررها كتييييييييير
سلامااااااااااااات

reri said...

أحمد سلامه

إنت شوفت لي الفنجان
:)))))))
هههههه
ممكن أكون أنا اللي تفكيري خنيق شويه
هحاول أعيش يومي بالظول والعرض
بس بالأإرتفاع دي إزاي أصلي كنت ضعيفه في الهندسه
:))

أول زياره ليك صح؟؟
عارف لو ما كررتهاش وما إدتنيش ودنك
مش هقولك اللي هيحصلك
ههههههههههه
سلامااااااااااااان

reri said...

كراكيب عادل

هحاول يا عادل
بس أعمل إيه في دماغي اللي مش بتفكر في كل شئ يجيب لها الإكتئاب
هحاول أغيرها

تحذير ليك زي اللي إديته لأحمد سلامه
وقد أعذر من إيه ؟؟؟
:)))))))

سلاماااااااااات

reri said...

الشنكوتي الكبير

إيه يا عم الكلام الكبير ده
قهر المجتمع
ولا المعوقات
وجيل
هههههههههههههه
براجع نفسي دايما
عارف يا شنكوتي
بحس إن فعلا الوقت فات وأنا ما عملتش حاجه
يمكن ده اللي تعبني


أما بقي السوزوكي بتاعة لجين فأنا
إستأذنت منها وهي ما عندهاش مانع
أي خدعه
خدمتك خدمة العمر
وهتركب الميني سوزوكي
ومع مين
مع لجين
مش أي حد يعني
هههههههه

والنبي منور ... خليك بقي لما أجيب شاي
إستني الميني سوزوكي أصلها هتعدي بيها تأخدك من هنا
:))))))))

سلامااااااااااااااات

reri said...

أمام الجيل

عجيب أمر الإنسان .... دايما بيبص للجانب الفارغ من الكوب
بقولها لنفسي
ومتهيألي أنا أكتر واحده ببص للجانب الفارغ
تقريبا بيميل للبكاء علي الأطلال

شكرا علي المرووووووور
يا ريت تتكرر
سلامااااااااااااااااات

reri said...

آخر من الآخرين

عارفه إنها إستحاله تحصل
بس برده بتمني
كلنا العداد معانا نازل يرف
بس صحيح هنعمل إيه
هحاول أركز في الحاضر يمكن

منور في أول زياره
خلينا نشوفك دايما
سلاماااااااااااااات

reri said...

مصر هي أمي

عارفه إنه إستحاله
كل حاجه لازم تمشي لقدام
بس دايما بنحب نبص في اللي فات ونفتش فيه
يمكن بنحسه أجمل حتي لو كان وقتها في نظرنا مش حلو خالص

خلينا نشوفك
سلامااااااااااااات

reri said...

the alien

إمتلاك آلة الزمن
ياسلاااااااام
ده الواحد كان عاااااااااش
:))
العمر فايت بيقول أه
والقطر فايت بيقول توت

معاك حق يا بيشو
منور البلوج
سلاماااااااااااات

reri said...

جواد بري

طفله ... ههههههه ... ماشي ونسيت تقول كمان بلطجيه
:))
وبعدين أنا ما عجزتش يا محمد .. ماشي
هحاول أعيش اللحظه

خلينا نشوفك يا دكتور
سلامااااااااااات

reri said...

عاشقة الوطن

إزيك يا رضوي
طمنيني عليكي كده دايما يا قمر
إنتي لسه في الكليه يا بنتي
عيييييييييييييييشي
ما تضيعيش أي يوم من أيام الكليه
علشان مهما عملتي بعد كده مش هتعوضيها

ما تحرمناش من الصوره السكر دي
والنبي بتفائل لما بشوفها
سلامااااااااااااااات

reri said...

شريف غريب

مش تشاؤم والله يا شريف ... مجرد حوار نفسي لنفسي
حاسه إن الأيام اللي فاتت أجمل
يمكن ما كنتش حاسه ده وأنا فيها

خلينا نشوفك
سلاماااااااااااات

reri said...

micheal

أكيد يا مايكل .. لولا كده كان الإنسان ما يقدرش يعيش

ما تقطعش الجوابات ولا الزيارات
سلاماااااااااااااااات

reri said...

yousif

مش عارفه أقولك إيه علي كلامك الرقيق ده يا يوسف
غير إن معاك حق في كل ما قلته
حقيقي كلامك حساس جدا

منورني يا يوسف دايما
سلاماااااااااااااااااات

reri said...

إبراهيم معايا

فعلا يا إبراهيم المشكله إنك بتحس إنك كبرت فجأه
كأن حد سرقك
ولما تتأمل تلاقيه عمرك هو اللي سرقك

شكرا علي المروووووووووور
وخلينا نشوفك
سلامااااااااااات

reri said...

قلوب حائره

أهلا بيكي في أول زياره .. ويا ريت تتكرر
بحييككي علي هذه الروح الجميله والنظره المختلفه لموضوع العمر

خلينا نشوفك
سلاماااااااااااات

reri said...

أحمد مختار عاشور

شكرا يا أحمد
الحياه مش بتقف إحنا تقريبا اللي واقفين نتفرج عليها

دي أول زياره صح
بحذرك زي ما حذرت غيرك
هتجيب ودنك ولا
:)))
خلينا نشوفك
سلاماااااااااااات

reri said...

maged stephen

هههههههههههه
ودنك الشمال اللي مش بتاكل بيها
هههههههه
أنا لسه مصره إنك إنت اللي بتختفي
أوكيه

ما تغيبش كتير
سلامااااااااااات

reri said...

رينا

عاااااااااااااااااا
بكرهه عيد ميلادي يا رينا خلاص
عايزه أشطبه
ما تعرفيش طريقه

منوره في أول زياره
خلينا نشوفك بإستمرار
سلامااااااااااات

reri said...

إنتظار مؤقت

أنا فهمت كلامك زي ما أنا حاسه إنه المفرزض يتفهم
شكرا ليك
تشرف في أي بوست
:)))

ما تقطعش الجوابات ولا الزيارات
سلامااااااااااااات

reri said...

ياسمين

بعد الشر عنك يا جميل
هو 36 دول حاجه خالص
ده تلاقيهم عدوا زي شكة دبوس
:))))))

منوراااااااااااني يا ياسمين
سلاماااااااااااااااات

reri said...

أبو ضحي

إنت أخدت بالك وبتقولي هتقابليه
هههههههههه
بحاول والله يا أبو ضحي أريح دماغي
بس هي مش بتبطل

خلينا نشوفك
سلامااااااااااااات

reri said...

bos bos

مش كلنا أوي يعني
منوره يا بس بس
خلينا نشوفك كتير
سلاماااااااااااات

reri said...

الطائر الحزين

وجهة نظر أخري
ورؤيه أخري لحساب العمر
أحييك عليها

********************

بص أنا بحترم أي وجهة نظر وإن كانت مختلفه عني
إنت بتقول إن خروج المرأه بدون داعي مفسده
وأنا سألتك هو في دواعي لخروجها
لأني لم أفهم ما الذي تقصده بكلمة داعي
يمكن إنت تقصد الغرض اللي خارجه علشانه
وأنا بقولك إن ده يرجع لنيتها
يعني اللي خارجه لهدف مش كويس زيها زي الراجل اللي خارج لهدف مش كويس
أما أي خروج تاني فأنا مش شايفاه مفسده
لكن إنت بتقول إن في ضوابط لابد أن تخرج بها
أنا معاك إن لازم زيها يكون صح أو علي الأقل محتشم.... ومعاملاتها كمان

سعيده بمشاركتك دايما
خلينا نشوفك
سلاماااااااااااات

reri said...

shayma

مفيش تعليق خالص
خالص خالص
:))))
منوره يا شيماء
حتي لو مفيش تعليق
ههههههههه

سلامااااااااااااااات

frozen love said...

hwa eh el7kaya..el27sas da msytr 3lya gdan "tany"..elayamde...aslan ktbt akhr post 3n elmwdo3 da f3lan...7ass eny elw2t beytsr2 we e7na lazm nsr2o b2a...mwdo3 kda eb2y e2reh 3ndy


t7yaty..we klamk 2sr fya awy 3la fkra

reri said...

frozen love

الإحساس ده عندي وعندك وعند كتير فعلا
مش عارفه إيه سببه
بس يمكن لأن فعلا الوقت هو اللي بيسرقنا
أكيد هقرأ موضوعك

خلينا نشوفك كتييييييييييييير
سلاماااااااااااااااااات

Anonymous said...

كل سن في الحياة وله جماله
و كل ما بكبر بحس اني عايزة ارجع لأيام الطفولة والصبا والاحلام الوردية
المصيبة بقى بجد اني كل ما بكبر بازداد واقعيه وبتتكسر احلامي على ارض الواقع المرير