Tuesday, April 3, 2007

عدوته صادقه في كدبة إبريل

في فترة الأجازات اللي فاتت دي سافرت .... رحت أشوف أهلي وأقضي معاهم يوم... الواحد بيفرح أوي لما يكون كل أهله متجمعين ... كبار وصغيرين في بيت جدي... بحس إن لسه الدنيا فيها خير...المهم ..ما علينا ...لما رجعت وفتحت المدونه قلت أشوف في تعليقات عالبوست الأخير ولا إيه النظام... و لقيت ردود... وأثناء قرائتي للردود لقيت آخر رد من مجدي المغربي ..... هتقولوا ودي فيها إيه يعني ؟؟؟... أنا قعدت أفرك عيني ... يمكن أكون قريت الإسم غلط ولا حاجه ... ولا يمكن حد عامل في مقلب ... وهيطلعلي لسانه في الآخر ويقولي ضحكت عليكي ... دي كانت كدبة إبريل.... بس إتأكدت لما قريت الكلام اللي في التعليق إنه فعلا مجدي المغربي.... ولقيت نفسي مبسوطه أوي وفرحانه....هتقولوا إيه الهبل اللي إنتي فيه ده؟؟؟ مين يعني اللي لما علق علي البوست فرحتي أوي كده؟؟؟...هقولوكوا هو قال إيه وبعدين أقلكوا هو مييييييييين؟؟؟...
نص تعليقه
البت دي أنا عارفها كويس جدا جدا جدا ....لأن أنا اللي مولدها علي إيديه دول ,وكبرت علي إيدي وأول ما تعلمت الكلام و بقت تمشي كانت كل ما تشوفني تجري وتتحدف علي وتقول إرفعني فوق ...وبعد ما أرفعها عدة مرات وتقطع نفسي ...تجلس في حجري وتقولي قول عدوته ((تقصد حدوته))...ولو إني لا أذكر أي عدوته من تلك التي كنت أقصها عليها ولكن والله أعلم كانت عواديت أقصد حواديت سياسيه ...لكن لما كبرت واتخرجت من كلية الصيدله إكتشفت إن كل العواديت معششه في دماغها ... وكل ما كانت لا تدركه من عواديتي نبشت عليه وأعادت الإستماع إليه ...وأدركت كثير من المعاني التي أثقلت جوانحي , بعيد عنكم عيله غاويه نكد وسياسه...و علي فكره إبقي فكريني يا بت أقولك حدوته أو عدوته لانج.....سلام يا هاط....ولا بلاش
الإنسان الجميل ده خالي.... فخوره جدا إن لي خال شكل في وجداني الكثير والكثير... جميل أن يكون رفيق لأي ذكري من الطفوله ...أول حد شافك في الدنيا كلها لأنه هو من ولد أمي...أول حد برده ضربك علشان تعيط وتبدأ تتنفس ... ولو الطفل بينزل من بطن أمه بيشوف يبقي أول حد عينك وقعت عليه في الدنيا كلها....أول رفعه لفوق للسقف تخض قلبك وكل لما تشوف طفل بيترفعها تحلم إنك ترجع صغير علشان حد يرفعك تاني فاكرين إحساس الخضه الممزوجه بفرحه ورغبه في التكرار ....أول أغنيه حفظتها في طفولتي وهي دبدوبه التخينه... أول مره تشوف الأهرام وإنت صغير وأول مره تروح الملاهي والقلعه والمتاحف ...أول حواديت أو عواديت سمعتها وداني وفضلت في عقلي ودخلت وجداني..أول حد يضحكك من قلبك وإنت بتلعب معاه... أول كل حاجه حلوه في حياتك...أول ... أول...أول... دائما ما يكون الشئ الأول مختلف... قد يتكرر ويتكرر ولكن تبقي فرحة المره الأولي محتفظه برونقها وبهائها وجمالها ... زي مثلا أول مره تحب وقلبك يدق... حتي لو كنت صغير وعبيط... بس بتفضل فاكرها ومعلمه جواك أكتر من أي مره بعد كده...خالي مجدي كانت له اللمسات الأولي في حياتي وأنا طفله صغيره ...إرتبط وجوده معي بأول كل شئ جميل باللعب والمرح والحواديت... أنا بالصدفه قلت أمامه إني عملت مدونه وما توقعتش إنه يكون برده أول حد من أهلي يحفظ إسم المدونه ويدخل عليها و يعلق ....سلامي ليك يا خالي يا أول من عرفت معه جمال الطفوله

مشاعر صادقه جدا شعرت بها أوي وأنا بقرأ كلامه وأيضا وأنا بكتب عنه في البوست ده ....وتعجبت إن إحنا في شهر
الكدب
شهر إبريل ...معقوله ؟؟؟ طيب ما في حاجات صادقه أوي أهو في شهر الكدب.. وبما إني جبت سيرة كدبة إبريل.... عايزه أسألكم حد يعرف ليه كدبة إبريل بالذات... يعني مثلا ليه مش كدبة أي شهر تاني... لها سبب تاريخي مثلا... أنا بتخيل إن في زعيم وعد شعبه بحاجه و كالعاده إداهم بومبه و كان الوعد ده في شهر إبريل ... أو مثلا في قصة حب كانت مشهوره وبعدين واحد من الطرفين طلع زباله وإدي التاني بومبه وفرقعه.. بعد ما كان وعده إنهم هيتجوزوا في شهر إبريل... وعندي تخيل تالت وهو إن في زمن جه والناس كانت صادقه فيه زياده قاموا قرروا يعملوا شهر يكدبوا فيه ... كنوع من الترفيهه... اصل ساعات كتر الصدق بيخنق... يعني فور فان...أو ممكن برده يكون في زمن كتر فيه الكدب أوي ومش عارفيين يخلوا الناس تبطل كدب فإتفقوا إنهم يحاولوا يبطلوا ... وقرروا يكدبوا شهر واحد بس وهو شهر إبريل... أما إختيار شهر إبريل بالذات فده برده له تفسير((كل حاجه النهارده عندي لها تفسير))... ألا وهو إن القرار ده طلع في آخر مارس فالناس قالت خلاص هنكدب شهر كمااااااااااان ... وبعد كده نبطل... وأظن إنهم مبطلوش.... وفضلوا يكدبوا أكتر... فأصبح شهر إبريل هو نفسه كدبه كبيره ...لأنهم خدعوا أنفسهم... ووهموا نفسهم إنهم هيبطلوا شئ موجود فيهم... جزء منهم.... ألا وهو الكذب....آه الكذب موجود فينا كلنا.... جزء من تركيب العنصر البشري ...موجود في الحمض النووي بتاعه الدي إن إيه .... جزء يصعب فصله من النفس البشريه.... إختلفت أسماؤه و أنواعه فهناك مثلا الفشر والمعر والنتش والكدب الأبيض والكدب الكاروه....و بمناسبة شهر إبريل ((شهر الكدب)) عايزه كل اللي يعلق عالموضوع يكتب شوية كلام كدب نفسي أسمع شوية كدب.... أصلي خلاص... مش لاقيه في زماننا ده غير الصدق... كل لما أمشي في حته بتكعبل فيه ... وزهقت وعايزه نيولوك ...أووووووووووف زهقت من السدك والسادكين اللي حوليا .... عايزه أغير....ممكن تسمعوني شوية فشر أو معر أو نتش ...بليز
أنا هبدأ بنفسي وأسمعكوا شوية سدك يجننوا ..أصلي ما أقدرش أكدب..أحدث سدك في أبريل 2007
*الحب إنتشر ..... وكتروا الأحبااااااااااااااااااااب
*واو ...الفقر إختفي وبقي مجرد سرااااااااااااااااااااااااب
*الشعب بياكل كل يوم كباااااااااااااااااااب
*و بيوصلهم العيش من غير عذااااااااااااااااااااااااب
*خلاص راح الإكتئااااااااااااااااااااااااااب
*مفيش مكان في بلادنا لمنافق أو كداااااااااااااااااااااااب

إلي لقاء وكل كدبة إبريل وإنتو سادكين وطيبين

20 comments:

Tamer Nabil Moussa said...

هايل والله كلامك اكثر من رائع

عندك حق فى كل كلمة كتبتيها

لحظات السعادة والفرح الاولى لهم طعم ومذاق خاص لايقارن بما هو اتى بعدة


لكن دة لايمنع اننا نستمتع بالحياة وبكل لحظة قادمة


بالنسبة للكذب انا ضد حاجة اسمها الاحتفال بية او تخصيص شهر لة

اصلة يعنى مش حاجة تفرح ولا حكمة وطريق نور نبراث هنمشى علية

ربنا يوفقك

تحياتى

الدبور said...

البت دي أنا عارفها كويس جدا جدا جدا ....لأن أنا اللي مولدها علي إيديه دول

لما وصلت السطر ده وبما اني دكتور فقلت ده اكيد دكتور النسا و الولاده اللي انت خرجتي للدنيا علي ايديه
و لما كملت عرفت انه خالك
ربنا يخليه ليكي
البوست جميا جدا و سر جماله في بساطته

تحياتي
الدبور

إبراهيم محسن said...

أولا بجد الذكريات اللي انت عشتي فيها دي كلنا عشناها واسعدنا تذكرها والبسمة الجميلة بتاعتها

ثانياً جميل انك تفكري ليه شهر ابريل بالذات
الا صحيح؟ ليه شهر ابريل

بوست جميل ورقيق من مدونة جميلة

سهر الليالى said...

اجمل ما فى الدنيا ان يكون ليكى حد قريب منك كده يحبك ويخاف عليكى لمجرد ان دى مشاعره فعلا وماعندوش سبب تانى ربنا يخليلك خالك اللى فرحك اوى كده بتعليقه ..البوست كله براءه وطفوله
تحياتى

reri said...

تامر نبيل

شكرا ليك... وفعلا مش معني إن لحظات الفرح الأولي لها مذاق خاص أننا لا نستمتع بالحظات القادمه... أكيد كل وقت وله جماله .. وكل سن وله فرحته ...وأنا كمان بكرهه الكذب بس كنت بتسائل ليه عملوله يوم ولا شهر؟؟؟
سلااااااااااامات يا تامر

reri said...

الدبور

ماشي يا دكتور أسامه دبور.. الطفوله بالنسبه لي البساطه في كل شئ

سلااااااااااامات

reri said...

إبراهيم محسن

أهلا بيك... منور المدونه... ولو عرفت حكاية كدبة إبريل يا ريت ...يا ريت يا ريت تقولي

شكرا عالمروووووووووور

سلااااااااااااام

reri said...

سهر الليالي

أهلا يا أماني... منوره...و فعلا دي أحلي حاجه في الدنيا.. وتحياتي ليكي

سلاااااااااااااام

daktara said...

ههههههههههه
مصادفة جميلة ولذيذة
بس علي فكره انا بافرح لما بلاقي بنت بتتعاطي السياسة
بس خلي بالك كصيدلانية من ال
overdose
احسن مش كويسة

Hamza matar said...

lovely page, blessed,c ya


only for her eyes

micheal said...

بجد سيء في منهي الروعه أن يجد الانسان من يخاف عليه و يحبه و يشاطره ذكرياته الجميله و بجد ربنا يخليلك خالك أما بالنسبه لابريل فمش فارق معانا الكذب فيه في حاجه لاننا في مصر متعودين علي الكذب و سماعه 12 شهرا
تحياتي لكي يا رحاب

Amr Ahmed said...

حلو البوست ده
جماله في بساطته

تحياتي

مصر هى أمى said...

حلو اوى البوست ده بالذات الجزء بتاع خالك انا كمان بحب خالى اوى لانه كل فسحى وتنطيطى ايام زمان كان معاه مع انه اكبر منى بكتير لكن عمرى ما حسيت ان فى فرق بينى وبينه

ربنا يخليهولك

reri said...

daktara

هههههههههه... هخلي بالي من حاكية الأوفر دوز... شكرا عالمروررررررر

سلاااااااااااااااام

reri said...

wiskey puzzler

إن شاء الله أزورك قريب

reri said...

micheal

الكدب... إيه الكلمه العجيبه دي؟؟؟... مش سامعه عنها خااااااااااالص

تحياتي ليك وسلااماااااااااااااات

reri said...

amr ahmed

شكرا يا عمر... ويا ريت أشوفك تاني كتير

سلاااااااااااااااااااااام

reri said...

مصر هي أمي

ربنا يخليلك خالك يا محمد... وما تقطعش الجوبات ولا الزيا رات

سلامااااااااااااااااااااات

Anonymous said...

بنيتى
كنت أظنها كذبة إبريل لما قرأت خبر زفته إحدى الصحف أن الأستاذ جمال سيتزوج بنت الجمال فى 4 مايو عيد ميلاد الوالد (أبو جمال) أطال الله فى عمره وأمد فى عهده حتى آخر عمر كل المصريين وفناء كل فئات الشعب لكى يتمكن هو والأسرة المعمرة مثل السلع المعمرة من الإستيلاء على كل المحروسة وياخدوها معاهم فى القبور، وبعدين تفرج
لكن والله أعلم الظاهر إن الموضوع جد وليست كذبة إبريل والبت بت الجمال دى حتكون سيدة المحروسة الأوووولى
(ويمكرون ويمكر الله والله خير الماكرين)
اللهم احفظ المحروسة التى شرفتها ورفعت شأنها بذكرها فى اللوح المحفوظ
سلام
خالك مجدى

reri said...

مجدي المغربي

أهلاااااااااااا يا خالي
كل مصر بتتكلم عن جمال وخديجه... ده إن شاء الله هيكون موضوع البوست القادم... سلامي ليك
يا منور البلوج

سلاماااااااااااااااااات