Wednesday, July 4, 2007

الصيف




أول كلامي سلاماااااااااااااااااااااااااااات


















وثانيه وحشتيني يا مدونتي ويا كل المدونات


















وثالثه شكرا لكل الناس اللي كتبوا تعليقات









علي البوست اللي فات


















والرابعه برده شكرا لكل اللي سأل عن سر السكات


















والخامسه شكرا برده لكل اللي فات من هنا من سكات


















وبعد التشكرات










في إعتذارات لأني ما ردتش علي تعليقات البوست اللي فات
ولأني ما بدخلش مدونات
ولا بعلق علي موضوعات
واللي فات بقي مات












بدأ الصيف بحره وبقرفه .... بس برده لذيذ !!!! .... أه والله لذيذ







فيه كل الذكريات الحلوه ... والضحكه المصحصحه المجلجله .. وكأن حرارة الجو تشعل في الناس حب التنكيت والضحك .. وخاصة في ليالي الصيف الحاره الساخنه التي تجبر الناس علي السهر في الشوارع أو حتي في البيوت



ويا سلام علي البطيخ الساقع لذيذ بشكل في الصيف














الصيف كان يعني أجازه ... حاليا حر وبهدله في المواصلات وإنت راجع من الشغل














الصيف كان يعني نوم طول النهار وسهر طول الليل ودائما تجد من يشاركك السهر وتبادله السمر... حاليا تقوم تنام زي الجذمه والناس كلها لسه بتقول يا يوم إبدأ علشان تقدر تصحي بدري














الصيف كان يعني الإستمتاع بالفراغ الممتع والتنقل بين التلفزيون والقراءه والشطرنج والكوتشينه والدومينو والطاوله ولا بنك الحظ والليدو والسلم والتعبان والسيجا ... كل لعبه ليها ذكري تموت من الضحك والعامل المشترك بين كل الألعاب دي إنها كانت في الصيف .... حاليا لو لعبتلك دور سوليتير ولا فيفا علي الكمبيوترلوحدك وحط مليون خط تحت لوحدك يبقي كتر خير الدنيا














الصيف كان يعني السنيما ودخول كل الأفلام ... حاليا لو دخلت فيلمين برده يبقي عملت إنجاز














الصيف كان يعني البحر اللي بتقعد قدامه تتحايل علي الموج ياخد منك همومك ويشيلها عنك وما بيتأخرش عنك .. بيشيل سرك ويصونه ... ويساعدك تنسي .. حمال الأسيه البحر ده... أمواجه تحمل هموم البشر .. كل منا تحاور معه .. كل منا حمله أسراره وهمومه وأفراحه .. له كل الحق إن ثار علينا في الشتاء وعلت أمواجه فقد تحملنا طوال الصيف ... أليس من حقه أن يثور بعد أن تحملنا شهور الصيف ؟؟!!!! ... زمان كنت تروح تترمي في أي مصيف وتقعد براحتك .... حاليا لازم ترجع في ميعاد محدد علشان أجازتك خلصت














رغم كل ذلك بحب الصيف رغم حره وقرفه بحبه ... فيه إنطلاق عجيب حتي لو لم أعد قادره علي الإنطلاق بشكل مطلق ... كما كنت من قبل .. فيكفيني أن أشعر بإنطلاق كل شئ حولي ... لأعرف أني في فصل الإنطلاق



أي في فصل الصيف












كل يوم حار وإنتوا بخير



كل ليلة سهر حلوه وإنتوا بخير



كل يوم في المصيف علي البحر وإنتوا بخير



كل قصة حب جديده في الصيف وإنتوا بخير



أصلهم بيقولوا كل قصص الحب بتبدأ في الصيف



كل شهر صيف وإنتوا بخير

82 comments:

حسام مراد said...

الصيف الصيف الصيف
انا بقه من عشاق الصيف بما انى من مدينه ساحليه اه بروح اشكيله واحكيله فى الصيف بس ساعات ما بتحملش ثوره فى الشتا لانى مش بحب الشتا

بحب الحريه
والصيف حريه فى كل شئ

وكل صيف وانتى بخير

وكل شمسيه وكرسى ورمله بحر وحبه ميه ع البحر وانتى بالف خير
يا رحاب
يلا سلاماااااااااااااااات

The Alien said...

ليه بس كدا
لازم تفكري الواحد باللي هو فيه وتقلبي المواجع
دا إنتي مسبتيش حاجة

سلامات و تحياتي

سندباد said...

رغم اني مش من عشاق الصيف انما لازم اعيشه زي ما بعيش اي فصل علي العموم كل سنة وانتي طيبة وحمدالله علي السلامة
تحياتي

MoHaMeD HoSSaM said...

ايه الحلاوة دى

يا خرب يبت الصيف وبلويه والى بيجرا فيه


والله اسف يا رحاب مكونتش قاعد لما اتكلمتى نتكلم قريب ان شاء الله

Eric Matt said...


كل عام وانت بخير

والصيف بخير

:)

تحياتي لك من ماناساس البلد

rack-yourminds said...

ما احلي الصيف مع الاصدقاء ,بجد هذه احلي ايام في العمر,احتمال استعيرمنك صورة البطيخ اللي عندك محتاجلهم في البوست بتاعي يا ريت تزوري هذه المدونه
http://elbosatelse7ry.blogspot.com/

Radwa said...


كل صيف وانتى طيبه

safa7_karmooz said...

جاية تجوعينا ولا ايه بصورة البطيخ اللظيظ ده ...

كل صيف وانتى حرانه :D

ومبرووك عالعودة مجددا

عاشقة الوطن said...

ريري حبيبتى
ازيك عاملة ايه
وحشتيني ياجميل

كل صيف وانتى طيبة كل صيف وانتى حاسة برضه بالمرح والانطلاق

وحشتينييي بجد

Amr Ahmed said...

حمد الله علي السلامة


وصيف سعيد

صاحب البوابــة said...

الصيف

كلمة تعنى للجميع منا الكثير

خاصة ذكريات الصبا

تحياتي

Anonymous said...

هاي ياريري يا جميلة عود احمد ازيك وصدقيني بموت في الصيف وجماله بكل مافيه حتى الحر بتاعه بيبقي لذيذ تحياتي ياقمر وكل صيف وانتي بخير

micheal said...

جميل أوي الصيف و ذكرياته...أتمنيي لكي صيف سعيد
تحياتي لكي

اسكندراني اوي said...

تعالي صيفي عندنا
في البلوج اقصد
حتلاقي حاجات حتعجبك اوي

بس فعلا الصيف جمييييييل
وزي ما قالو زمان حصيرته واسعه

مصر هى أمى said...

ياااااه
فكرتينى بالصيف اللى الواحد نسيه من ساعة ما اشتغل
انتى مسبتيش اى حاجة الواحد معملهاش من زمان


متشكرين اوى على الحاجت الحلوة بتاعة زمان

Unknown said...

من بقك لباب السماااااااا يا ريرى ياختى بينى و بينك انا خلاص زهقت و نفسى بقه ابتى قصه حبى النهائيه



حمد الله على سلامتك يا سكر السكرات

و تحياتى

Anonymous said...

حلو اوى ... اسلوبك جميل وعسول

طهقان said...

فكرتينا بالصيف وايامه

وبالحاجات الحلوة اللي فيه
من بطيخ وخلافه

لكن دلوقت
ماعتقدش ان الواحد بيقدر يستمتع باي شيء لا
في الصيف
ولا في الشتا
والله يسامح اللي في بالي

Dr. Magdy Almaghraby said...

Hi Ya hat...........
where do you want to go to?? Marina or 6 october? you know the difference already, and whom would you like to go with? what about GihaN? YOUR MOTHER HAS TO GET BACK SOOOON TO host Gihan well, 1 more thing , you have no vacation in your new job, ha ha ha haaaay, few days at sanafeer will be much enough for you and OM SHAW2y. Have anice summer with Raya & Sikina we kaman NAZAGA

أحمد سلامــة said...

الأولة
ويلكم بــــاك
والتانية
إســتــننــاك
والتالته
يعني انتي دلوقتي هنا ولا هناك ؟؟
============================
مش الصيف بس اللي اتغير
كلو كلو كلوووووو اتغير
حتى البحر
تخيلي

Hadota ... حدوتة said...

حمد لله على سلامتك
الصيف ليه زكريات كتير جوانا
ودايما زكريات مرتبطة بحاجات حلوة

تحيااااتى

Rosa said...

وانتي طيبه يا قمر ودايما مصيفه و مفرفشه
:)

reri said...

حسام مراد

وإنت طيب يا شغااااااااال
طبعا يا بختك يا بتاع بورسعيد
بحر طول السنه

سلامووووووووووز

reri said...

the alien

معلش يا بيشو لو كنت فكرتك باللي إنت فيه ؟؟
بس إنت صحيح كنت ناسيه ؟؟

منور دايما
سلامااااااااااات

reri said...

sendbad

الله يسلمك
بس مش من عشاقه!!!! فكر كويس
هتلاقي كل ذكري حلوه دايما فيه
خاصة ذكريات زمان

سلامي ليك

reri said...

the groom

إنت طيب وبخير
سلامااااااااااااااات

reri said...

wahed

طبعا
إستعيرها براحتك
البيت بيتك
قصدي
المدونه مدونتك
هزورك قريبا بإذن الله

reri said...

سندريلا

وإنتي طيبه يا قمر
منوره
سلامااااااااااااات

reri said...

سفاح كرموز

أه فعلا البطيخ ده لظ يظظظظظظظظظظ
بشكل
ههههههه
الله يسلمك يا سفاح الرومانسيه
:))))

سلاماااااااااااات

reri said...

عاشقة الوطن

وإنتي طيبه ياقمر ومنطلقه أيضا
وإنتي كمان وحشتيني يا رضوي

سلامااااااااات يا جميل

reri said...

عمرو أحمد

الله يسلمك يا عمرو
وصيف سعيد علي الناس كلها

سلاماااااااااااات

reri said...

صاحب البوابه

أه طبعا
ذكرياته لا تنسي
منور دايما

سلامي ليك

reri said...

قلوب حائره

الله يسلمك يا جميل
ويا رب تقضي صيف سعيد

سلامي ليكي

reri said...

مايكل

طبعا جميل
بتمنالك صيف حار جدا وسعيد جدا
سلامي ليك

reri said...

إسكندراني أوي

عندك شمسيات بقي
والشاطئ جاهز
:))))
عموما هاجي وأشوف

سلامي ليك

reri said...

مصر هي أمي

العفو علي إيه
أي خدمه
الذكريات الحلوه بتكون جوانا دايما محتاجه بس حد يضغط علي الزرار وهي بتطفو لوحدها

سلاماااااااات يا محمد

reri said...

ellithy

شكرا ليك
بس مش عارفه بصراحه يعني إيه باك لينك

سلامي ليك

reri said...

whyme

ههههههههههههه
إن شاء الله يا إيلاري
تبتدي قصة الحب النهائيه في الصيف ده
وتخلص بقي
:))))

الله يسلمك يا إيلاري
سلاماااااااااات

reri said...

riri

إنتي كده هتلخبطيني
برده ريري
بس مش مشكله
منوره يا ريري
وشكرا ليكي

سلاماااااااااات

reri said...

طهقان

ههههههه
إوعي تكون تقصد اللي في بالي
هههههههه
هو صحيح الواحد مش عارف ينطلق زي الأول
بس برده إنطلق

سلامااااااااااااات

reri said...

magdy

أهلااااااااااا
من زمااااااان ما نورتنيش
بس إيه التسييح اللي إنت عامله ده
عموما مارينا طبعا
وريا وسكينه طبعا الصيف معاهم أحلي صيف

ما تغيبش كتير
سلاماااااااااات

reri said...

أحمد سلامه

إحنا بنتغير يا أحمد
يبقي أكيد كلووووووووو لازم يتغير
لو ثبتنا إحنا كانت كل حاجه ثبتت

ثانكس علي الرساله الجميله دي

سلامااااااااااات

reri said...

حدوته

الله يسلمك يا قمر
ذكرياته كلها حلوه فعلا

منوراني
ما تقطعيش الجوابات ولا الزيارات
سلامااااااااااااات

reri said...

روزا

وإنتي كمان يا عسل
مصيفه دايما ومفرفشه صيف شتا

منوره
سلاماااااااااااات

اسكندراني في الغربة said...

welcome back

catroz said...

ريرىىىى
ايه الموضوع الجامد ده
لا و الصور المذهله دى
الا صوره البطيخ
جامده بغباااء يعنى
انا عايزه من ده
:D
البلوج جامده
هاجى هنا كتير :P

R.R said...

والله صدقتى
الصيف بيمثل ليا انا كمان كل اللى قولتيه
السهر والتلفزيون و لعب الكوتشينا وخصوصا الشايب
كنت باخد شوية احكام
وكمان البحر والسفر والسنيما
هيه دنيا
احنا تقريبا بعد ما خلصنا واشتغلنا
شلنا الهم
يلا هنعمل ايه هناخد زمانا وزمن غيرنا
:)
موضوع انعشنى وانعش زكريات جميله داخلى
بس موضوع ان الحب بيبدأ فى الصيف
صعب
يابنتى الجو بيبقى حر والواحد مش طايق نفسه
:)
تحياتى لكى

كراكيب عادل said...

ضمي صوتي لصوتك

كانك بتتكلمي عني


مظلومين احنا الظاهر

:(

حصان بري said...

رحاب
ايه ده كله يا بنتي
فعلا الصيف برغم البهدله اللي احنا متبهدلينها فيه السنه دي الا انه لسه فصل المصيف والبحر والانطلاق والحب والخروج والسهر
:) برغم انه اول سنه اقضيها فيه بدرس
بجد احساس سيء:(

بقي سيادتك اختفيتي لفتره انتي كمان
معلش انا اصلا بقالي حوالي شهر اوف تدوين
واوف نت اصلا
حمد الله علي السلامه يا جميل
ومن تاني خدي ودني بس من غير توووووووووووووووووووت

سلامات يا رحوبه

بسمه عبدالباسط said...

جميل قوى قوى البوست ده
بس أنا بحب الشتاء أكتر
وأحسن حاجة فى الصيف البحر والرمل

تحياتى لكى

محض روح said...

انا بحب الصيف
جداا
وكل صيف فيه جديد
:)
والي بيعدي مابيجيش احسن منه

خليك فى البيت said...

ندعوكم لزيارة مدونة خليك فى البيت والمشاركة فى الحملة

صاحب البوابــة said...

أين الجديد ؟؟؟

:)

تحياتي

rana 3amra said...

اهلا يا قمر منورة بلوجك والله كان مضلم
يلا اديكى جيتى ولسه حسك ف الدنيا

منورة جامد والله :)))))))

قضية عم أحمد Ahmed Case said...

بجد شكرا اوي على ابتسامه رسمتيها ببراعة على وشى وانا عمال اقرأ البوست الجميل .

بجد خلتيني ابتسم في وقت كان نفسى اضحك فيه ومش عارف

انحلت سيور العربه وسقط المهر من الاعياء said...

السلا م عليكم


انا على ما خلصت قريت البوست كا ن الصيف خلص عندنا
تحيا تى

Anonymous said...

انا بحب الشتا وعاشقاه
بس بحب البحر والبطيخ
على فكره
انا عامله تجمع بلوجرى جامد جدا بمناسبة نجاحى وتخرجى على خير
التفاصيل على مدونتى الصغنونه..اللى من غير فذلكه

Hannoda said...

في أول الصيف كنت أقول أنا بحب الصيف أكتر من الشتا
و فأول الشتا أقول أنا بحب الشتا أكتر من الصيف

و كنت في عز الصيف أحاول أفتكر إحساس البرد و التكتكة و ألاقيه مش راضي ييجي أبدا و كإ،ي عمري ما عشت في الشتا
و نفس الحكاية في عز الشتا

مستحيل أفتكر إحساس الحر

حاجة غريبة

و حاجة تانية غريبة

من أيام المدرسة و إنطباعي عن الصيف هو إنه الانطلاق و الهروب من حبسة البيت و اللبس الجميل و الفراغ الجميل قبل بعد دوامة الصحيان بدري و المذاكرة

ولما المذاكرة خلصت .. والإنشغال خلص
و الحبسة خلصت
و كل الظروف إتغيرت و ساوت كل فصول السنة ببعض
فضل الصيف محتفض بالمود و الإنطباع بتااعه

حاجة غريبة

كل سنة و إنت طيبة يا جميل.. وماتحرمناش تاني من بوستاتك القريّبة

semsem said...

حمد الله على السلامه يا ستى

وكل صيف وانتى طيبه

الطائر الحزين said...

انا عن نفسى بحب الشتا

Ehab said...

معلش يا ريري
اتأخرت عليكي وعلى كل المدونين في الزياره بس ظروف
فكرتيني بالصيف وجنانه يا بنتي وفكرتيني بأني دلوقتي موسم الشغل عندنا هو الصيف عشان كده نادرا لما بأخد اجازه في الصيف حتى يوم الجمعه
عموما شكرا على البوست اللي فكرني بأوقات جميله
سلااااااااااااااااااااااام

Masry said...

riri
مش عارف ليه كل بوستاتك لازم اقرأها اكتر من مرة .. دايما بتفكرني بذكريات ما بقف عندها و معلقش الا بعد ما اقرأ تاني و تالت و رابع
فكرتيني بحاجات كتييير اوي اوي اوي و خصوصا موضوع بنك الحظ دة :)
عموما كل صيف و انتي طيبة و كل المدونين طيبين ..
انا هنا اهو و ممشتش بس قافل المدونة للتحسينات :)

ابو العربى said...

الصيف ياسلام ع الصيف بس معتش الواحد بيحس بالصيف ولا الشتاء الصحبه اتفرقت والاصحاب انشغلو ومعتش فى وقت
بس البحر لسه ذى ما هو بيسمع لينا وبيتحمل بلاوينا


تحياتى

reri said...

إسكندراني في الغربه

ثانكس
منور دايما

سلاماااااااااااااات

reri said...

catroz

ميرسي ليكي
ده البلوج هينور لما هتيجي
بس قولي قبلها علشان نفرش البلوج وورد
علشان يليق بيكي برده
:)))
منوراني في أول زياره
يا ريت تتكرر

سلامااااااااااات

reri said...

r.r

ارفه أنا كنت هكتب عن الشايب بالتحديد
ياااااااااااه
ده إحنا ياما سهرنا طول الليل نلعب الشايب والأحكام إيه ما أقولكيش
فعلا شلنا الهم

أما موضوع الحب فالظاهر ضحكوا عليا
هم اللي قالوا لي مليش دعوه
:))))

منوره يا رانيا
سلامااااااااااات

reri said...

كراكيب عادل

أه تقريبا
هنعمل إيه بقي

ما تقطعش الجوابات ولا الزيارات
سلاماااااااااااات

reri said...

حصان بري

أهلااااااااا يا محمد
ويلكوم بيك وبودنك
اللي هي أمانه
ما تخافش خااااااااالص
:))))
ياللا شد حيلك في الإمتحانات
وأهي برفا للصيف بعد التخرج
أشوفك قريبا أون لاين

سلاماااااااااات

reri said...

bos bos

الشتا بتحبيه أكتر يا بس بس
راجعي نفسك

منوره يا جميل
سلامااااااااااات

reri said...

محض روح

اللي بيعدي ما بيجيش أحسن منه خااااااااااااالص
نهائي
منوره
ما تقطعيش الجوابات ولا الزيارات

سلاماااااااااااات

reri said...

خليك في البيت

إن شاء الله
شكرا للمرور

سلامااااااااات

reri said...

صاحب البوابه

أشكرك علي المتابعه
والجديد نزل
سلاماااااااااااات

reri said...

rana 3amra

ده نورك يا جميل
إنتي اللي منوره في أول زياره
ياريت تتكرر كتييييييييير

سلامااااااااااااااات

reri said...

أحمد رفعت

الحمد لله إني قدرت علي كده
أي خدعه
:))))
منور يا أحمد دايما

سلامااااااااااااات

reri said...

الجحيم هو الحقيقه

خلص خلااااااااااص
ياللا بقي خلصتلك الصيف في المدونه
كل صيف وإنت بخير

سلامااااااااات

reri said...

وينكي

هروح أشوف التجمع يا وينكي
ومبرووووووووووووووك التخرج

سلاماااااااااااات

reri said...

هنوده

عارفه أوي محاولة إستدعاء إحساس الحر في الشتا والبرد في الصيف وبتعجب جدا في الصيف إزاي أنا بلبس اللبس ده أصلا اللي هو بتاع الشتا وفي الشتا أبص للبس الصيف وأتعجب برده وأنا بموت من البرد إزاي بييجي وقت ببقي لابسه بنص كم
حاجه غريبه فعلا
منوره يا هنوده
وجيتي يوم الجمعه زي ما قلتي
:)))

سلامااااااااات يا جميل

reri said...

سمسم

الله يسلمك
وإنت طيب وبخير

شكرا علي المرووووور
سلاماااااااااات

reri said...

الطائر الحزين

الناس في ما يعشقون مذاهب
شكرا علي المرووووور

سلامااااااااات

reri said...

الشنكوتي الكبير

أهلا يا شنكوتي
تنور في أي وقت
ربنا معاك ومعانا كلنا
العفو يا عم لا شكر علي ذكريات الصيف

عايزه أشوفك كتير
سلامااااااااااات

reri said...

ضد الظلم

كله إختلف
وحاجات كتير فقدت معانيها
بس برده الصيف فيه إحساس منفرد كده
ولا إيه

منور دايما
سلامااااااااااات

reri said...

آخر من الآخريين

إنت مش عارف تعليقك ده فرحني أد إيه
كويس إني قادره أفكرك بذكريات جميله
خاصة بنك الحظ
:)))))
كنت بحب أوي أمسك البنك وهاتك يا سرقه
:))))))))
أيام جميله عشناها كلنا

خليك دايما هنا إنت وودنك
:))))

سلامااااااااات