Thursday, May 15, 2008

ستون عام يا اسرائيل

أنا زي زيك مش فرحانه بالمناسبه دي


ومش هقول هابي بيرث داي يا إسرائيل


ولا هقول ده يوم نكبة فلسطين ومش إنشاء إسرائيل


لأنه بإختصار شئنا أم أبينا إسرائل موجوده الآن


اه موجوده


ده الواقع


وبوش راح واحتفل معاهم وخطب في الكنيست خطاب أعتقد إنه خطاب تاريخي


بعد سماعي لخطاب بوش


ما قعدتش ألعن وأسب فيه وفي كلامه وفي سياساته المنحازه


الراجل صادق مع نفسه بيعبر عن قناعاته


بوش مااداش الغاز لإسرائيل وبعدين ما شاركش معاهم في إحتفالهم


بوش بيساند إسرائيل سرا وعلانيه


الدور والباقي علي خفافيش الظلام


ولو إن ده مش موضوعي دلوقت بس الكلام جاب بعضه


بعد خطابه لقيت نفسي بعمل مقارنه بسيطه بين دوله إتعملت من ستين سنه ودوله عمرها سبعة آلاف عام عايشه في أغنية ورده شوف كنا في إيه وصبحنا في إيه


إسرائل في ستين سنه بتحارب وفي المقابل عملت دوله ديموقراطيه بجد الشعب فيها بيختار من يمثله وبيحاكموه لو غلط ولذلك حصلت عندهم تنميه وعملوا إقتصاد قوي يعني عملوا دوله صح لأنهم بيعملوا اللي مؤمنين بيه ليهم مبدأ وقضيه بيدافعوا عنها


في المقابل دول عربيه حوليها حالهم إيه بقي؟؟


فلوس مع تيوس عايمين علي النفط وحكام عايزين يتألهوا
أو دول غرقانه في فساد حراميه قعدوا علي الكراسي ولزقوا فيها
للأسف ده حالهم وده حالنا
ربنا يخلصنا من إسرائيل ومن بوش ومن حكامنا
ما تسمعونا آمين؟؟؟؟؟

35 comments:

smraa alnil said...

ااااااااااااااااااامين


انا زيك كدة مذهولة من اللي هما وصلوله

واحنا نيمين

بيفكروني بالاعلان

دخل بالشيفرولية واحنا قاعدين وخرج بالشيفرولية واحنا قاعدين

تفتكري هنفضل قاعدين كدة وهما داخلين خارجين بالشيفروليه

Van Gogh said...

اميييييييييييييييييييييييييييين

اللهم ما اميييييييييييييييين

اللهم ما اميييييييييييييييييين


ايه ده!!؟

هوه انا اول واحد ولا ايه؟؟

شكلنا كده هنتشد انا وانتى


:)

خصوصا ان الرياض ليها ودان

بس ولا يهمك انتى ادعى وانا وراكى لحد ما الناس تتلم علينا


اميييييييييييييييييييين


اميييييييييييييييييييييين


(يا باشا ده واحد صاحبى اسمه امين وبنادى عليه)

Tamer Nabil Moussa said...

امين

اللى مين بوش دة يارحوبة هههه

وبعدين انا بحبم بكرة نكون احسن بس لما تيجى ناس مكان الناس الاوحش

تحياتى

كلام على بلاطة said...

صراحة اول مرة ادى ودنى لانسان عاقل
يا بنتى وربنا يحفظك بعقلك
كلامك كله حكمة
ويتوزن بالدهب
يا ريت نعمل ما تعملة اسرائيل
مع مواطنيها ونرتقى بشعوبنا العربية ونتوافق مع بعض وانظرى للوطن العربى كل دولة فى معارك مع مواطنيها ووصلت لاستعمال القوة العسكرية فى لبنا واليمن والسودان
وربنا يستر علينا

MoHaMeD HoSSaM said...

ايوة بتحرضي الشعب وانتي بره الحدود

عليا النعمة لبلغ عنك

بقي بتعلقي عندي وتقوليلي انا بعدت اوي وانتي وقفتي علي الحدود
يعني اعتراف
والاعتراف سيد القله

نينجا خضراء

هشام علاء said...

اللهم اااااااااااميييييييييين

معاكى كل الحق

بوش زى ما بيقولوا متسق مع نفسه

و امريكا متسقة مع اسرائيل

قصة حب عنيفة بين الدولتين

و الامريكان عندهم ديمقراطية بينهم و بين بعض

و الاسرائليين عندهم ديمقراطية برضه و رئيس وزرائهم بيتسحل فى المحاكم بسبب قضايا فساد..مش بيسحل بعد ماساب الكرسى ..لا شدوه من قفاه و هو لسه على الكرسى

و طبعا احنا مالناش فى الديمقراطية و امور المهلبية

و اخرنا نشتم فى بوش و اسرائيل مع اننا مش عارفين نفتح بقنا مع حكامنا و ان فتحنا بقنا اخرنا كلام جعجعة و ننزل على مافيش

و كفاية بقى لحسن قلبتى عايا المواجع

تحياتى
هش

reri said...

samraa alnil

اه شكلها هنفضل كده يا انجي
هنفضل مذهولين وهم داخلين خارجين

سلاماااااااات يا قمر

reri said...

van gogh

ههههه
هنتشد جماعه يا أحمد
ما تعرفش جده برده ليها ودان ولا إيه نظامها ؟؟
:)))

أمين رد ولا لسه :)

reri said...

tamer nabil

واضح اننا مش قدمنا غير الأحلام
هي اللي باقيه لينا

سلامااات

reri said...
This comment has been removed by the author.
reri said...

كلام علي بلاطه

ربنا يسترها فعلا
الوضع بقي خنقه جد
مفيش حاجه تسر لا بره ولا جوه
ربنا يستر

reri said...

محمد حسام

بقي كده يا محمد
ههههه
ايه يعني تعالي علي الحدود وقول اللي عايز تقوله

ما تغيبش كده يا ابني تاني

نينجا
دي بقي كلمة السر محدش فاهمها يا باشا غيرنا
:)))

reri said...

hesham

ما قصدتش تقليب المواجع
هي بتتقلب لوحدها
:))
عموما الوضع فعلا مؤسف
وده حالنا وحالهم
ربنا يرحمنا

ابو العربى said...

اه اه اه اه اها اه
بجد حرام مقرنتك وجعتنى قوى
بس هنقدر نتغلب على الامر الواقع انشاء الله هتكون اخر احتفاليه
تحياتى
ابوالعربى

Caramella said...

اميييييييييييييييييييييييييييييييييين !

lonlysmily said...

الواقع المرير اللى احنا بنعيشه دا:(
بحس ان اسرائيل مش دوله قويه بس دى عندها ذكاء سياسى ملوش حل
متديش سنتيمتر من حاجه الى اما تكون متاكده انها هتاخد فدان من وراه
ومنتشرة ومتغوله فى كل مجال مش بس هيمنه فى منطقه الشرق الاوسط
عندها كميه معاهد ابحاث ودراسات ملهاش حل
بجد اسرائيل كدوله بغض النظر عن اللى بتعمله فينا وفى فلسطين
دوله ترفع له القبعه
واحنا مننا لله:(

موناليزا said...

امين
عايزة اعرف لحد امتى هنفضل كده

Anonymous said...

اميييييييييييين

بجد اسرائيل دى بتفكرنى بالبلطجى الى ماسك زله على شيخ الحارة
طبعا كلكو عارفين مين هما شيوووووووخ الحارة
:))
مهم اصلهم مش واحد
حاجه تفرس

سلامى يا جميل
:))

MaMaDo said...

طول ما احنا بنجيب سجاده الصلاه من
الهند
يبقى لازم تطمنى و تعرفى اننا كويسين

انا لما قرأت البوست افتكرت مقاله كنت قرأتها فى مجله احنا من زمااان
عن خبر فى الاهرام ان اسرائيل الاسؤ فى العالم
و الى كان عامل الاحصائيات دى اسرائيلى عن انها يعنى فى حالة حرب على طول و كده

و من ناحيه تانيه الاهرام رفضت تنشر لفهمى هويدى مقاله عن التعذيب الى
بيحصل فى مصر
البلد الى فيها حرية راى


بغض النظر عن رفض نشر المقاله
شوفى طريقة التفكر و الحريه و المبدأ
و بعد ما تشوفى المبدأ لازم تطمنى و تعرفى اننا كويسين

Rosa said...

آمين يا ريري آمين
بس في مقارنيه كمان نسيتي تضيفيها
ان الناس دي بالرغم من اسلوبهم القذر في تحقيق اهدافهم
الا ان ليهم هدف اول و اخير هو شعوبهم في المقام الأول
بيعملوا كل ده عشان شعوبهم
و الفرق كبير قوي قوي
بوست جامد يا ريري
---
ووحشني التعليق عندك ووحشني تعليقك عندي :)

.:.-=- ELGaZaLy-=-.:. said...

امين يا ستى

بس الى كسرنا بجد الحمار الى عندنا الى وجهلهم تهنئة انبى تتوكس يارب

-_- said...

صيف سعيد لك وللجميع

micheal said...

امييين يا ستي..و لو أني ناوي أستني المشمش لما يطلع الأول
:)
تحياتي

Mina said...

قادتني الصدفة لمدونتك
شيء جميل جدا وصدفة اجمل
تحياتي

دعاء مواجهات said...

تصفييق حااااااااد

تحياااتى لكلامك

اللهم آمييييييين

منتظراكى

هانى المصرى said...

كل سنه وانتى طيبه

syzef said...

تحليلك للموقف كان تحليل رائع ومتزن جدا ..سردك لاسباب فشلنا ونجاحهم ف افتقادنا للمصداقية والجماعية وحبنا للفردية كان تحليل ثاقب وفيه رؤية عميقة..مش عايز اقولك ان اكتر جملة عجبتني هي انبهارك بخطاب بوش ووصف بالتاريخي

استنيت ان البوست ينتهي بنفس قوة بدايته ونفس منطقيته..لكن للاسف ف النهاية رجعتي للصوت العالي واللوم علي 7 الاف سنة والتاريخ اللي ضاع

اول خطوات الحل هي مصداقية مع نفسنا ..استدعاءنا للتاريخ مش لازم يكون بندب وسب للحال الوقت..لازم استدعاءنا للتاريخ يكون دفعة لينا لقدام مش جرنا برده لورا

صوتك العالي ف نهاية البوست بلومك ع الحكام اللي بختلفش معاكي ف وصفك ليهم..لكنك شوية نسيتي برده الفرق بين شعوبنا وشعب اسرائيل ..شعوبنا اللي باعت هويتها وباعت حريتها وباعت جماعيتها برده قدام فرديتها..وشعب تاني مفيش ف عينيه غير الحلم اللي عاش وبيموت وهيموت وهو بيحلمه ومالوش شاغل غيره


كنت اتمني ان نهاية بوستك متنتهيش بنفس النهاية اللي بينتهي بيها اي متكلم ف الموضوع ده بدعواتنا بشلاتيت راسنا علي الحكام المستبدين الظلمة..بل بتحليل ثاقب مثلما بداتي باحتياجنا لشعب اولا يكون صادقا مع نفسه صادقا ف استرداد تاريخه وعروبته واسلاميته..واحتياجنا طبعا لحكام أكثر مصداقية

تعرفي احنا محتاجين ايه ياريري؟..احنا محتاجين نخرج بره الندب والبكا ودعوات الانكسار ونبدا بقي نغير..نبدا نشتغل زي ماهما اشتغلوا

ورغم ده كله ياستي..هقول امين زي مانتي طلبتي

كلام على بلاطة said...

كل عام وانت بخير

R.R said...

اااااامين
وحشانى يا رحاب ارجو ان تكونى بخير
اعجبتنى رؤيتك للموقف كثيرا الف تحيه لكى

Rosa said...

where r u ??????????????????? hope that u r ok

ديالا said...

مع احترامي لرايك ولمدونتك الي زي العسل بس اسرائيل لا دوله ولا اي حاجه ولا ديمقراطيه ولا اي شئ ورغم ان الدول العربيه نايمه صحيح بس شعبها كل خير والدليل انا والنتي وكل الناس الي عايزه تصلح اما اسرائيل دي اول رياح هتيجي مننا هتشيلها من علي الارض نهائي ولا ايي ياقمر

ديالا said...

مع احترامي لرايك ولمدونتك الي زي العسل بس اسرائيل لا دوله ولا اي حاجه ولا ديمقراطيه ولا اي شئ ورغم ان الدول العربيه نايمه صحيح بس شعبها كل خير والدليل انا والنتي وكل الناس الي عايزه تصلح اما اسرائيل دي اول رياح هتيجي مننا هتشيلها من علي الارض نهائي ولا ايي ياقمر

ديالا said...

بجد مع احترامي لراسك واعجابي بمدونتك الجميله الا ان ان اسرائيل لا هيا دوله ولا اي شئ دي والدول العربيه رغم انها نايمه الا انها شعوب ماليها الخير والدليل علي كده انا وانتي وكل الناس الي عايزين يتغيروا بلدهم بجد اما اسرائيل فصدقيني باذن الله رب العباد هينصرنا عليها

Van Gogh said...

فينك.......؟؟
لعل المانع خير
تحياتى

Van Gogh said...

و تستمر الغيبة
و يستمر السؤال